Sema Pesing A Panbiyag A Onoran Koma Na Naemati
3
Kowan mo mowan ired ma naematid tan i mesepol a ipatoray chiy angel ched gobirno tan sema iren echom a naiyantoray cha si-kara. Mesepol a patien cha ira tan isagana ra na olay a mengemag na mapteng. 2 Kowan mo ira i nagwara komay omangen cha tan nat mabekal koma ira, no diket man-anos ira tan mansingsingpet ira na olay cha emiin a tothoo.3 Tep nontan sema nemnem tayo maypangkep Afo Chiyos, kolang ngo. Nat piyan tayon patien si Afo Chiyos tan esaol kiya. Bagaen to kiya na ekila-kilasin kamkam na angel tayo tan sema iren ngaaw a kina-kinas tayo. Ngaaw i nemnem tayod echom tayo, tan naiyan-inapal kiya cha. En-owes cha kiya na echom tayo, tan en-owes tayo ngo ira. 4 Nem nonta mimothok i inpangibiybiy Afo Chiyos na kaasi tho tan semek tod si-kathayo, 5 insalakan to kiya. Sema engamagan ton man, nat kagol na mapteng a imag tayo, no diket kaasi tho. Insalakan to kiya babaen na Ispirito Santon iyandinis cha si-kathayon inpanbalin to kiya na badon singen iyay-anak kiya mowan. 6 In-i-kan Afo Chiyos i Ispirito Santod si-kathayo babaen Jesu Criston engisalakan cha si-kathayo, tan sema tolong na Ispirito Santo, on-anay cha emiin a mesepol tayo. 7 Imag Afo Chiyos iwan say gwariy sigoradon namnama thayon mekitawid na biyag a nagwariy pengingkaan to. Gwara tan a namnama thayo tep inbilang to kiyen Afo Chiyos a maronong kagol na kaasi tho. 8 Agpayson podno ira ma kigwan ko. Piyan kon itoled mon mantoro-toro iren man say sema iren naematid Afo Chiyos chithan, onsedo ira na olay a mengemag na mapteng.
Mapteng ira man tan gwariy panmaptengan tod tothoo. 9 Nem mesepol a nat mekisongbat ked ma nagwariy silbi tho, tan enog i tiyabtabal i maypangkep na tonton, tan enog i songbat maypangkep na dinteg Moses. Seman ira, nagwariy silbi tho, tan nagwariy panmaptengan tod pamati thayo. 10 No gwariy toon naiyantoro na nat podnon nainpansi--jan to ira ma naemati, bilin mo i isalcheng to. Nem no pidgwaen mon bidinen et nat onpati pay iwa too, enog i kiyadgwaan. 11 Tep amtam i sema toon inges to man, binekan toy podno, tan nainchorog ton onbaso--basol. Amta tho i ngaaw i naima-imag to.
Sema Kaonoran A Bili-bilin
12 Ito-nok si Artemas ono si Tychicus chithan ded kad-an mo. No onmothok ded tan, ipahat mon onkowan ali say aspolen moak cha Nicopolis tep niyemnem kon man-iyan chiwan no siteg-inan ali. 13 Ipahat mon tolongan si Zenas a abokaro tan si Apollos say gwariy mesepol cha et mebedin a itoloy chiy biyahi ra. 14 Sema iren echom tayon naematid tan, mesepol a ingsaan chen mengemag na mapteng say ontolong ired man a mahasafol a chili na tolong, et say sema biyag cha, gwariy mapteng a pantongpalan to.
15 Emiin a echom kod jay, chiyan komostai ka. Miyan komostai ngo iriy naematid tan a mahasmek cha si-kawi kagol na pamati thayo.
Sapay koma gwariy kaasin Afo Chiyos cha si-kayon emiin.