4
Niman kowan bilina ked sangoanan Afo Chiyos tan si Cristo Jesus a mengowis na emiin a tothoo, angken sibibiyag pay ira ono etiy mala ira. Tep on-oli did jay si Criston mantoray. 2 Isonga, kowan ibilin i ikasabam i esel Afo Chiyos. Pansagana ka na olay a mengikaskasaba, angken piyan na toon manki-ngel ono enchi, angken kostoy timpo ono enchi. Ipaamtam cha si-kara no iyanbasol ira et panbabawim ira. Pekedsang moy nemnem chen mengemag na mapteng. Pan-ano-anos ka no toroan mo ira. 3 Tep onmothok aliy timpon nat piyan na toon manki-ngel na podnon toro-toro. Piyan cha bengat a a-magen i ngaaw a gwared nemnem cha. Isonga, sema iren toon mahasmek na ngaaw, ta-gwayen chiy chakel a naiyantoro say toroan cha ira ma too na piyan chen iki-ngelan. 4 Mantoleng ired ma podnon toro-toro, tan onoran chiy is-istoriya na too nontan den nat podno. 5 Nem si-kam, isingpet mon emiin i naimag mo. Pan-anos ka no da-kaman moy digat, ikasabam i mapteng a chamag, tan tongpal mon emiin i obden inpiyal Afo Chiyos cha si-kam.6 Si-kak ngo, may-arig i biyag kod inom a mayso-jat no maytangdal i animal cha Afo Chiyos. Mimothok i timpon ibetik ko led ja dobong. 7 Kincheng koy inpangidaban ko na obden in-i-kan Afo Chiyos cha si-kak. Sibik i engingkaan na dongbaan. Koston iyonoran koy podnon toro-toro na pamati thayo. 8 Isonga, igwan i kongkonak a iyaykamid cha dangit tep mapteng i inpanbiyag kod nemnem Afo Chiyos. Si Criston Afo thayon mengowis na kosto, i-kan tod si-kak iwa kongkona no akow a pengowis to di na emiin a too. Tan nat si-kak bengat i i-kanan Cristo na kongkona, nem sema emiin a mahapiyan a pasiyen on-oli dis Cristod jay.
Sema Kaonoran A Bili-bilin
9 Ipahat mon onkowan alin chakos. 10 Tep si Demas, in-olay toak et kimowan ded Thessalonica tep say piyan to, sema iren mekongkoned ja dobong. Si Crescens, kimowan ded Galatia, tan si Titus ngo, kimowan cha Dalmatia. 11 Si Luke bengat i kadgwak chiyay. No onkowan ka did jay, sa-mad mos Mark tep mebedin a tolongan toak na obdak. 12 Si Tychicus, into-nok cha Ephesus. 13 No onkowan ka did jay, sa-mad mo ngo diy ko-mon kon inpayas kod kad-an Carpus cha Troas. Alam ngo diy dibdibchok, agdalo ira ma iyaysolat cha bedat.
14 Si Alexander a para selbit na danchok, chakel i ngaaw a imag tod si-kak. Nem chosaen Afo Chiyos ngod ma iyaykosto-kostod ma imag to. 15 Tanchaanim itha too tep nakiyonkontra thon pasiyay toro-toro thayo.
16 Sema pilmiron inpamistigal ched si-kak, nagwariy engitakchel cha si-kak, no diket in-aw-awan chaak. Sapay koma nat chosaen iren Afo Chiyos kagol na imag ched si-kak. 17 Nem angken in-olay chaak, kiyadgwaan toak Criston Afo thayo, et inpakedsang toak. Isonga, mebedin a inkasabak i emiin a minsahi na mapteng a chamag say iki-ngelan na emiin a Gentiles. Et tiyolongan toak ngon Cristo say eg chaak bonoen. 18 Amtak i tolongan toak Criston Afo thayo cha emiin a ngaaw a mepesamak cha si-kak ingkathod odofen toak cha dangit a naiyantorayan to. Sapay koma mechejaw na ingked ingka. Amen.
Sema Kaonoran Na Solat
19 Komostaim si Priscilla ni Aquila, pati si Onesiphorus tan pamilja tho. 20 Igwan pay si Erastus cha Corinth, tan inpayas kos Trophimus cha Miletus tep mansekit. 21 Ipahat mon onkowan alid jay no aneng pay i siteg-inan.
Si Eubulus, si Pudens, si Linus, si Claudia, tan sema iren emiin a echom a naematid jay, chiyan komostai ka ngo.
22 Sapay koma kadgwaan toka na olay Afo Chiyos. Sapay koma gwariy kaasi thod si-kayon emiin.