Sejay a solat, insolat Paul cha Timothy a balodahin ematid Jesu Cristo. Edafo dis Timothy cha siyodad na Lystra cha dogad a Asia Minor. Hodjoy ineton emati ngod Cristo. Greek ngoy aweto.

Nonta naiyankasabes Paul cha sahop na Lystra, iningsaan tos Timothy, tan iyapnek cha si-katho tep inpasnek Timothy a ematid Cristo. Isonga, nonta intoloy Paul i biyahi thon iyankasaba tan iyantoro, iyodop tos Timothy (Inpasi-pasing 16:1-3).

Sa-kin siyodad a naiyankasabaan cha, chiwed Ephesus. Iyan-iyan ires Paul chiwan na tedon tawen. Nonta niyemnem Paul a on-ekal cha Ephesus say mankasaba pay cha echom a dogad, kigwan tos Timothy i on-eket cha Ephesus say bidinen to iriy ematid man. Nonta iyan-iya-iyan si Timothy chiwan na piyen tawen, insolat Paul iyay cha si-katho. Imag to man nonta A.D. 63-65 emo la.

Sa-kin ainportantin timed ja solat, maypangkep iren ma naiyantoro na nat podno. Binidin Paul si Timothy i iparit toy pantoro iren ma tothoo tep naintoro cha i sema toon piyan ton maysalakan ket, mesepol a nat mengan iren ma iyayparit a mekan tan nat mengimbaliy ira ngo.

Sa-ki pay a inbilin Paul, maypangkep na pesing koma iren ma ematin cha Afo Chiyos no mesa-sa-nop ira. Inbilin to ngo i maypangkep na ogadi na bibiin emati tan sema panbiyag iren ma pinispis chen mengibalnay iren ma emati tan sema ngo iren ontolong ired ma naengibalnay. Sa-ki pay a bilin, maypangkep na ogadi koma iren ma emati ired ma echom chen ebalo, naengibalnay, tan bagaen. Inbilin ngon Paul i maypangkep na kamkam a onbaknang tan sema kainportantian na kapnekan na nain-i-kan Afo Chiyos cha si-kathayo. Inbilin pay ngon Paul i ipamapteng komen Timothy i panbiyag to tep bagaen Cristo.