Sema Adok Paul I Ikararagan Cha
3
Aahik, gwara pay i konen kod si-kayo. Pangaasi yo, ikararagi yo kawi say magenon maygwadsak i esel Afo Chiyos, et say patien iren ma mengi-ngel a inges jo. 2 Ikararag jo pay i iaragwi to kawin Afo Chiyos cha ngaaw a too tep nat ematin emiin i tood Afo Chiyos.3 Nem angken seman, naepiyal si Jesus a Afo thayo, et pekedsang to kayo tan iaragwi tho kayod ngaaw a naimag Satanas. 4 Et kagol na ingkayka-chom tayod Jesus a Afo thayo, sigorado kawi i jowan tongpaliy kigwan mid si-kayo, et itolo-toloy jon a-magen ira man. 5 Sapay koma da-da-toan Afo Chiyos i pengawat jo na semek tod si-kayo. Sapay koma echo-echoman to pay ngoy anos jo say inges to ngoy kinaanos Cristo.
Mesepol A Man-obdiy Tothoo
6 Aahik, gwariy bilin a konen mid si-kayo kagol na karebengan min in-i-kan Jesu Criston Afo thayo. Enchek kayo mekikadgwed ahi thayon naematin esarot. Nat chiyan onoriy toro-toron in-elbat mid si-kayo 7 Tep amta yo i mesepol a onoran joy naimag mi. Tep nonta iyan-iyan kawid tan, nat esarot kawin man-obda. 8 Bijaran min emiin i in-i-kan jon kiyakan mi. Masdo kawin iyan-obda. Iyandagdagbo kawi na gwiya-gwa-gwa tan angken kalebian say eg kayo mebel-athan kagol cha si-kawi. 9 Gwariy karebengan min mengibaga i i-kanan jo kawi na mesepol mi, nem iyandagbo kawi ngorechan say si-kathoy arig a onoran jo. 10 Tep nonta gwara kawi pay laeng chithan, binidin mi kayo i no gwariy toon eg to piyan a man-obda, enog i pikan.
11 Miyan kona mowan iyay tep gwara konoy echom cha si-kayoy esarot a eg to piyan a man-obda. Say naimag cha kitdi, naekibiyang ired ma naimag na echom cha. 12 Kagol na karebengan min in-i-kan Jesu Criston Afo thayo, miyan bilina ira ta esarot a too tan miyan banchaani ira i mesepol a isi-pet chiy panbiyag cha tan onsedo iren man-obda say gwariy panbiyagan cha.
13 Si-kayon aahik, enog i apton mengemag na mapteng. 14 No gwariy tood tan a eg to piyan a onoran iwa inbilin mid ja solat, tanchaani yo tan a too, tan enchek kayo mekikadgwed si-katho say onbaing. 15 Nem enog i inbilang a kakontra yo, no diket selkag jon singen ahi yo.
Sema Kaonoran Na Solat
16 Sapay koma si Jesu Criston Afo thayon naedafoan na talna, i-ka-i-kan toy talned si-kayo angken nengoy mepesamak cha si-kayo. Sapay koma ngo gwares Cristod si-kayon emiin.
17 Sejay a iyaysolat chiya kaonoran, si-kak a si Paul i engisolat. Inges niyay i naima-imag kod emiin a solat ko say maamtaan i sema iren solat, edafod si-kak tep sema nainpasing kon mansolat, naepeschian.
18 Sapay koma gwared si-kayon emiin i kaasin Jesu Criston Afo thayo.