Sema Naengontred Afo Chiyos
2
Niman, aahik, gwariy piyan min konen cha si-kayo maypangkep na ioli din Jesu Criston Afo thayo tan sema kesi-nop tayod kad-an to. 2 Pangaasi yo, enchek kayo inam-ay a medingo tan onchanag no gwariy iki-ngelan jon istoriyen mimothok miy akow a ioli din Jesus a Afo thayo. Enog i piyati, angken gwara konoy engipadto ono gwariy engigwanggwang ono gwara konoy solat a edafod si-kawi. 3 Pantanchaan kayo say eg kayo mesaol. Tep nat mebedin a onmothok iwa akow ingkathod onchakel nin ira ma naengontred Afo Chiyos, et manparang ngoy toon Naengontred Afo Chiyos. Sema too, si-kathoy nat mahapiya-piyan a mengonod iren ma dinteg Afo Chiyos. Isonga, insagana walen Afo Chiyos i chosa thon nagwariy pengingkaan to. 4 Kontraen tos Afo Chiyos tan emiin a sinan chiyos tan emiin a nachijaw na too. Ikayang toy angel tod emiin a man, angken si Afo Chiyos, say onkowan a ontokkong chiwa timplon Afo Chiyos, et konen to i “Si-kak si Afo Chiyos.”5 Sigoradon eg jo diningding i kigwan kod si-kayo maypangkep niyay nonta iyan-iyanak cha kad-an jo. 6 Amta yo i gwara wiy naeniped niwa Naengontred Afo Chiyos say nat onparang ingkathod onmothok iwa akow a pinispis Afo Chiyos. 7 Angken nat iyanparang nin iwa too, sema panakabalin na ngaaw, inchogi tho walen menaol na too say kontraen cha ngos Afo Chiyos. Nem iyay-emot ma iwa panakabalin, et ontoloy a may-emo-emot nin ingkathod ma-kal iwa naeniped. 8 No ma-kal mala ma naeniped, manparang iwa Naengontred Afo Chiyos. Et no on-oli dis Jesus a Afo thayo, bonoen to ma too. Si-pohen to bengat et metiy a chakos iwa Naengontred Afo Chiyos. Sema panparang Jesus, kolpin a-gwahen to ma too.
9 No manparang iwa Naengontred Afo Chiyos, gwariy panakabalin ton edafod Satanas, tan a-magen toy ekila-kilasin sinjal tan milagron ite-itek. 10 A-magen to pay i ekila-kilasin ngaaw say saolen toy tothoon maysi-jan cha Afo Chiyos na ingked ingka tep bidaw chen pategan tan patien iwa podno maypangkep Jesus say maysalakan ira. 11 Kagol a binekan chiy podno, intolok Afo Chiyos a mesaol ira say patien chiy ite-itek. 12 Sema pantongpalan to, mekowis et mechosa iren emiin tep eg cha piyatiy podno, no diket kiyana-kanas chen manbaso-basol.
Sema Iren Pinispis Afo Chiyos A Maysalakan
13 Nem si-kayon aahik, mesepol a mansalamat kawi na olay cha Afo Chiyos kagol cha si-kayon ensemek Jesus a Afo thayo. Tep angken nonta nat eparsowa nin i dobong, pinispis to kayon Afo Chiyos a maysalakan babaen na pemati yo na podnon toro-toro maypangkep Jesus a Afo thayo tan babaen na Ispirito Santon engipabalin kayo na esantoan a toon Afo Chiyos. 14 Tiya-gway to kayon Afo Chiyos a maysalakan babaen na mapteng a chamag a inkaskasaba wid si-kayo say mayka-chom kayod kinakayang Jesu Criston Afo thayo. 15 Isonga aahik, petpeti yo tan itolo-toloy jon patien iwa toro-toron in-elbat mid si-kayo babaen na kaskasaba wi tan sola-solat mi.
16 Sejay i kararag mid Jesu Criston Afo thayo tan si Afo Chiyos a Awa thayon mahasmek cha si-kathayo. Kagol na semek Afo Chiyos cha si-kathayo, nainpakedkedsang toy nemnem tayo na ingked ingka tan nainpasigorado thoy namnama thayo na maypangkep na mapteng a i-kan tod si-kathayo tep kiyaasian to kiya cha. 17 Isonga, nainkararag mi i pekedsang Afo Chiyos i nemnem jo tan tolongan to kayo say mapteng i emiin a a-magen jo tan a-seden jo.