Sema Maykadgwen Solat Paul Ired Ma Gwared
THESSALONICA
1
Si-kawis Paul, Silas, tan si Timothy. Sejay i solat mid si-kayon naiyansa-sa-nop a naiyanchayaw chithed Thessalonica a ekika-chom cha Afo Chiyos a Awa thayo tan si Jesu Criston Afo thayo. 2 Sapay koma gwared si-kayoy kaasi tan talnen naedafod Afo Chiyos a Awa thayo tan si Jesu Criston Afo thayo.Sema Inpansalamat Iren Paul Kagol Na Ematin Gwared Thessalonica
3 Aahik, mesepol a mansalamat kawi na olay cha Afo Chiyos kagol cha si-kayo. Mapteng no a-magen mi tan tep mankedkedsang a chiliy pamati yo tan emangka-ka-chomiy pansisinemek jo. 4 Isonga, nain-etek mi kayo ired ma naematin naiyansa-sa-nop a naiyanchayaw cha Afo Chiyos cha echom a doga-dogad tep naemasig kayon memati, angken emangkadiga-digathi kayo tan gwariy diga-digat jo kagol na pamati yo.
Sema Pengowis Afo Chiyos Na Tothoo
5 Sejay iren emiin, si-kathoy kasi-nengan i kostoy pengowis Afo Chiyos. Tep ibilang to kayon Afo Chiyos a maykarin mayka-chom cha pantorayan to tep itolo-toloy jon mematid Cristo angken emangkadiga-digathi kayo kagol na pamati yo. 6 Sema pesing Afo Chiyos a mengowis, kosto-kosto, isonga pedigathen to ira ma naemadigat cha si-kayo. 7 Et isalcheng toy diga-digat jo, et inges to ngoy pesing tod si-kawi. Mepesamak ira jay no manparang alis Jesus a Afo thayo na timpo na ioli tho did dangit. Tan no onkowan alis Jesus, kadgwaen iren ma mahedsang a anghilis to, 8 tan gwariy afoy a mandikmot cha si-katho. Chosaen to ira ma toon eg cha piyan a amtaen si Afo Chiyos tan sema iren toon eg cha patien i mapteng a chamag maypangkep Jesus a Afo thayo. 9 Sema chosa iren ma tothoo, nagwariy pengingkaan to. Maysi-jan ired Jesus a Afo thayo na ingked ingka, tan eg cha si-si-nengen i kaskasdaaw a panakabalin to. 10 No seman alin akow, on-oli dis Jesus a Afo thayo say mechejaw pay kagol na inpangisalakan to na tothoo to. Merispiktar nowan kagol na imag to ired ma emiin a ematid si-katho. Et maybilang kayo pay ired ma too tho tep piyati yoy kigwan mi maypangkep cha si-katho.
11 Isonga, nainkararagan mi kayo na olay say panbalin to kayon Afo Chiyos a tothoon maykarin mayka-chom cha si-katho tep si-kathoy kagol a emispisan tod si-kayo. Babaen na panakabalin to, sapay koma tolongan to kayo say emiin a mapteng a kakara yo, metongpal tan emiin a naimag jo kagol na pamati yo ket, mekcheng. 12 Tep no seman ma, mechejaw si Jesus a Afo thayo kagol cha si-kayo, tan mechejaw kayo ngo tep iyayka-chom kayod si-katho. Mepesamak ira jay a emiin kagol na kaasin Afo Chiyos tan si Jesu Criston Afo thayo.