Say siyodad na Thessalonica, kapital na Macedonia a probinsiyen intorayan na Roma. Nonta maykafidgwen biyahin Paul a mankasaba na mapteng a chamag, sima-mad cha Thessalonica a mankasaba ired ma tothood man. Angken nat iyanbayag si Paul chiwan, chakel met laeng i toon ematid Cristo kagol na iyankasabaan to.

Sema iren Hodjos a gwared Thessalonica a nat emati, nonta iyamtaan cha i chakel miy ematid Cristo, imapal ma ira. Et inpanngalawngaw chiy too say kafidithan a on-ekal ires Paul chiwan.

Nonta imekal ma ires Paul cha Thessalonica, kimowan ired Berea et intoloy chen kimowan cha Athens. Nonta gwara pay si Paul cha Athens, inki-ngelan to i naedigathan ira ma ematin gwared Thessalonica. Isonga, into-no thos Timothy a echom tod Thessalonica say pekedsang Timothy i nemnem iren ma ematid man. Nem si Paul enan, timoloy cha Corinth. (Sejay a istoriya, naebased Inpasi-pasing 17:1-15.)

Nonta maramen gwares Paul cha Corinth, mimothok si Timothy tan si Silas alid Macedonia. Et ingwanggwang Timothy i maypangkep na kasasaad iren ma ematid Thessalonica. Et insolat Paul iyay ired ma ematid man say pekedsang toy nemnem cha. Sema timpo na inpangisolat ton jay, nonta A.D. 51 emo.

Say pilmiron insolat Paul chiyay, iyansalamat cha Afo Chiyos kagol na mahedsang a pamati iren ma ematid Thessalonica tan sema semek ched echom a too. Inbilin to pay ired ma emati i mesepol a itolo-toloy chen onoran i panbiyag a naiyapolbaran Afo Chiyos. Siyongbathan ngon Paul i salodsod cha maypangkep na ioli din Cristo tan sema mepesamak ired ma ematin iyangketiy da no onkowan alis Cristo mowan.