2 Pemasig kayon emiin a mankararag iy maramen tanchaani yo ngon eg ontayab i nemnem jo no mankakararag kayo, tan pansalamat kayod Afo Chiyos. 3 Ikararagi yo kawi pay i i-kanan to kawin Afo Chiyos na gwayen mengikaskasaba niwa minsahi maypangkep Criston eg aamtaan nontan. Tep sejay a kaskasabak, si-kathoy kagol na iyaykalebosan ko niman. 4 Ikararagi yoak i kayaen kon mengiiksplikar niwan a minsahi say ma-gwathan a chili tep sejay i mesepol a pesing ko.

5 Osal joy emiin a gwaya yon mengemag na mapteng cha eg naemati say nagwariy disjonen ched si-kayo tan say mansagana kayo na olay a mengipaamten Cristod si-kara babaen na esel jo tan sema ogadi yo. 6 Sema pesing jon on-esel, mesepol a dododop na olay iy ekanas pay komen mayki-ngedan say amtaen jon menongbat na koston angken siyen toon mansalodsod et say may-enam i songbat jo. ^a

7 Si Tychicus, si-kathoy mengipaamted si-kayo na emiin a emangkepasamak cha si-kak. Si-kathoy sa-kin ahi tayon ensemek ko, kadgwak ngon naepiyal a ontolo-tolong, tan kaobdaan ko pay a naekisilbid Afo. 8 Isonga, kowan ito-nod si-kayo say ipaamta thoy emangkepasamak cha si-kawid jay tan pekedsang toy nemnem jo. 9 Kowan pekito-nod si-kathos Onesimus a naepiyal a ahi tayon ensemek min kaidian jo. Igwanggwang ched si-kayon emiin i emangkepasamak chiyay.

10 Si Aristarchus a kadgwak chiya kalebosan tan si Mark a kasingsing Barnabas, chiyan komostai kayo. Igwat jo waliy bilin maypangkep Mark. Sintil jon pasiya no onmothok did tan. 11 Si Jesus a nangiyaranan cha na Justus, towan komostai kayo ngo pay. Sejay bengat iren tedoy Hodjos a naematin naekiobded si-kak a mengigwanggwang maypangkep na pantorayan Afo Chiyos. Chakel i tolong chen engipaim-imdeng cha si-kak.

12 Si Epaphras a sa-ki pay a kaidian jon naiyansilbid Cristo Jesus, towan komostai kayo pay. Nainpasnek ton mankararag na olay para cha si-kayo i onnane-naneng i pamati yo tan nagwariy kolang jo say amtaan jon chiliy piyan Afo Chiyos a nagwariy chegwa-chegwa yo. 13 Paneknekan ko i sedon Epaphras a man-obda para cha si-kayo tan sema pay ired Laodicea tan Hierapolis. 14 Si Luke a epateg a doktor mi tan si Demas pay, chiyan komostai kayo.

15 Si-kak pay, kowan komostai ira ma aahid Laodicea, pati si Nympha tan sema gropon naematin naiyansi-si-nop cha baliy to. 16 No mekcheng men besaen cha jay a solat cha si-kayo, ipaw-it jod ma gropon naematid Laodicea say besaen cha ngo, tan sigorado yo ngon besaen iwa solat a inpaw-it kod si-kara. 17 Sa-ki pay, kowan jos Archippus i mesepol a tongpalen to ma obden inpiyal Afod si-katho.

18 Si-kak a si Paul, kowan isolat a mismoy pankomostak cha si-kayo. Nemnemnem jo jay a kadinak. Sapay koma ta gwariy kaasin Afo Chiyos cha si-kayo.