Sema Sigod A Biyag Tan Sema Badon Biyag
3
Ekipawil kayod Cristo, isonga pate-pategi yo ira ma gwared dangit a timokkongan malen Cristod gwanan Afo Chiyos. a 2 Nemnemnem jo na olay ira man a gwared ma dangit, nat seja iren gwared ja dobong. 3 Tep singen etiy kayo maypangkep na sigod a biyag jo, et gwara wed si-kayoy badon biyag a niyan-egchiin Criston ekisa-kid Afo Chiyos. b 4 Si Cristo i podnon biyag tayo, isonga no manparang mowan ali, mayka-chom kayo pay cha si-katho, tan mekida-kam kayo ngo na kinamapteng to tan kinakayang to.5 Isonga, beneki yo ira ma sigod a ngaawes a nemnem jo tan ogadi yon inges to iriy pekibii tan pekidahi tan sema iren kompormin ensekig a ogadi, emiin a ngaaw a piya-piyan na angel to tan ngaaw a kamkamkam to, tan sema pengamkam niwa nat kokowa yo tep sema kamkam na too, singen inges toy chiyos to. 6 Tep sejay ira, si-kathoy kagol na penosaan Afo Chiyos iren ma nat mengemag na nakigwan to. 7 Et sejay i kay-ingesan na panbiyag jo nonta eg kayo pay emati. 8 Nem niman enog i imag ira jay: enog i owes, enog i bonget, enog i nemnem na oncharal na echom, enog i omang, tan enog i esel na ngaaw. 9 Salcheng kayon man-ini-tek tep siya-dathan joy sigod a ogadi yon inges toy inpana-dat jo na bakjot a baro yo et inkepil jo, 10 tan igwat joy badon ogadi yon in-i-kan Afo Chiyos a inges toy inpanbaro yo na bado. Sema badon ogadi yo, nabiyado-badoan Afo Chiyos ingkathod amtaen jon kostos si-katho et ingesen jo ngos si-katho. 11 Isonga, nagwara wiy iyan-afilan na toon biyadoan Afo Chiyos. Angken Gentile ono Hodjo, angken ekogit ono eg ekogit, angken bisita ono emanekot a too, tan angken bagaen ono nat bagaen, man-iinges iren emiin cha nemnem Afo Chiyos. Tep si Cristo bengat i kainportantian tan gwares si-kathod emiin a naemati.
12 Isonga, kagol na inpamispis Afo Chiyos cha si-kayon too thon ensemek to, amag jo ira jay: pengaasi ka, penolong ka, pankombaba ka, tan pan-anos ka. 13 Anosi yo pay i pankola-kolangan na echom jo. No gwariy eg jo pan-iinawatan ono gwariy iyanbasol cha si-kayo, panpipinakawan kayon inges toy inpamakawan na Afod si-kayo. 14 Et sema kainportantian a mesepol a a-magen jo, pansisinemek kayo tep say semek ket, si-kathoy naengisiltob iren ja mapteng a ogadi say man-iinawatan kayo tan sema sa-kin nemnem jo, nagwariy kolang to. 15 Sema talna ngo tan olnos a nain-i-kan Cristo, sapay koma itorong toy nemnem jo tep pinispis to kayon Afo Chiyos a man-echom med angel Cristo say da-kamen jo ira jay. Tan pansalamat kayo na olay cha Afo Chiyos. 16 Nemnemnem jo na olay i naintoro-toron Cristo say egwathan jon chili. Osal jo pay i emiin a daing a nain-i-kan to say mantinoro kayo tan manbinilin kayo. Pankansiyon kayo na psalmo, kansiyon a manchayaw cha Afo Chiyos, tan echom a aispiritoan a kansiyon iy maramen ipasnek jo pay a mansalamat cha Afo Chiyos. 17 Angken nengoy a-magen jo tan a-seden jo, isigorado yon may-anam cha tothoon iyayka-chom cha Jesus a Afo thayo. Tan pansalamat kayo na olay cha Afo Chiyos a Awa thayo babaen Cristo.
Sema Bilin Cha Pamilja
18 Si-kayon bibii, manpatoray kayod imbaliy jo tep si-kathoy iyay-anam cha naematid Afo Cristo. 19 Si-kayon daleki ngo, semek joy imbaliy jo. Enog i inbonge-bonget cha si-kara, no diket anosan jo koma ira.
20 Si-kayon aanak, pati yo na olay i awejo tan inejo tep sejay i piyan na Afo. 21 Si-kayo ngon parintis, enog i inbonget i anak jon pasiya, nahol ni medismaya ira.
Sema Bilin Cha Bagaen Tan Afo
22 Si-kayon bagaen, tongpal jon emiin i ibilin na afo yod ja dobong. Amag jo jay a nat sema bengat a manbanbantay ired si-kayo say ichayaw cha kayo, no diket ipahat jon tongpalen i piyan chen a-magen jo tep narinispiktar joy Afo. 23 Angken nengoy a-magen jo, si-meti yon a-magen a inges toy Afon pansilbian jo, nat too bengat. 24 Tep amta yo i si Criston Afo thayo, i-kanan to kayo na kongkonen inkari tho ired too tho tep si Cristoy pansilsilbian jo. 25 Tan no gwara pay ngoy mengemag na ngaaw, may-anam i chosa thod ma imag to, tan nagwariy pengidasinan Afo Chiyos na too no timpo na pengowis to did si-kara.