Sejay a solat, insolat Paul ired ma ematid Philippin siyodad cha probinsiya na Macedonia. Si-kariy pilmiron gropon ematin sini-nop Paul cha Europe (Inpasi-pasing 16:6-40). Nonta insolat Paul iyay, iyaykalebos cha Roma emo nonta A.D. 60–62. Say nemnem na echom a naengachal na Biblia, si-katho ngoy timpo na inpansolat Paul ired Ephesus, ired Colosse, tan cha Philemon.

Sa-kin kagol a iyansolathan Paul, pansalamat to ired ma ematid Philippi na tolong a inpapaw-it ched si-katho. Gwara ngoy kigwan to say onkedsang i pamati ra tan nat medismaya ira kagol na ekalebosan to tan sema diga-digat a diya-da-kaman cha.

Gwara ngo iriy inbilin Paul cha si-kara. Sa-kin kigwan to, mesepol a mekisa-sa-kiy nemnem cha tan pangkep cha. Isonga, inbilin tod si-kara i mekikombaba iren inges toy pankombaben Cristo nonta gwara ded ja dobong. Sa-ki pay, biyanchaanan to iren eg cha koma onoran i toro-toron nat podno. Inpalagip to ira i iyaybasar i kaysalakanan ched kaasin Afo Chiyos tan pamati red Cristo bengat, nat sema pengonod cha na dinteg Moses tan ogadi na too. Sa-ki pay a kigwan to, talnen nain-i-kan Afo Chiyos ired naiyankararag cha si-katho maypangkep na digat cha, tan kongkonen i-kan to no sa-kin akow cha emiin a ematid Cristo no mayka-chom cha si-kathod dangit.