3 No nemnemnemen tahejo, naiyansalamathak cha Afo Chiyos. 4 Tan no ikararagan tahejo, banay a pasiyay chaksak ko 5 tep natiyolongan joak a manpaamta na mapteng a chamag manipod nonta pilmiron akow a inpamati yo ingkathod niman. 6 Sigoradoak a si Afo Chiyos a engichogi na mapteng a pangkep tod biyag jo, itolo-toloy to ingkathod metongpal iwa pangkep to no akow na ikowan alin Jesu Cristo mowan. 7 Anam to wango no seman i kowan nemnema maypangkep cha si-kayon emiin tep banay a pasiyay kapategan kod si-kayo. Tep inpakida-kam jod si-kak i kaasin Afo Chiyos nonta iyaykalebosak tan tiyaktakchelan ko ngo tan piyanekneknekan koy podno na mapteng a chamag maypangkep Cristo. 8 Amten Afo Chiyos i banay i esaw kod si-kayon emiin tep ensemek tahejon inges toy penmek Cristo Jesus cha si-kayo.

9 Say kararag ko para cha si-kayo, onda-da-toy semek jod Afo Chiyos tan sema echom iy maramen ma-ma-choman i pengamta yo tan daing jon mengegwat na kosto 10 say mebedin a onoran jo ma kamaptengan. Tep no setan ma, say ogadi yo, sigoradon mapteng, tan nagwaren polos i kaybasolan jo no akow na ikowan mowan alin Cristo. 11 Babaen na tolong Jesu Cristo, sema mapteng a ogadi yo, manpa-nod banay a mapteng et say mechejaw si Afo Chiyos.

12 Aahi, piyan ko wen ipaamted si-kayo i sema epasamak cha si-kak, nat ngaaw i iyanbanagan, no diket i chima-chen engigwadsak na mapteng a chamag. 13 Tep emiin a solcharon naiyanbantay na palasiyo, tan sema iren echom chiyay, amta ra i sema kagol na ekalebosan ko, pansilbik cha Cristo. 14 Kagol na ekalebosan ko, sema piyal na karakelan a aahi tayod Afo, kimedsang say eg ira entahot, tan mas ontole-toled iren mengowan na esel Afo Chiyos.

15 Agpayson igwa iriy naiyankasaba maypangkep Cristo tep maapal ired si-kak tan piyan chen ipaamta i mas edaing ira iy say si-kak, nem igwa ngo iriy echom a naiyankasaben mapteng i pangkep cha. 16 Sejay ira, naiyankasaba tep ensemek chaak. Iyamtaan cha i say kagol na ekalebosan ko, chiyotohan toak Afo Chiyos a manpaneknek na mapteng a chamag. 17 Nem sema iren maapa-apal, sema pankasaba ra maypangkep Cristo, nat naedafod mapteng a pangkep tep piyan chen ikayang chiy angel cha. Say nemnem cha, no ikasabaan chiy maypangkep Cristo, a-choman chiy digat ko iy gwaraak cha kalebosan. 18 Nem kosto tep no mapteng i pangkep cha ono ngaaw, basta ikasabaan chiy maypangkep Cristo, kaimdengak. Et itoloy kon man-im-imdeng 19 tep amtak i babaen na kararag jo tan tolong na Ispiriton Jesu Cristo, ^a sema panpa-noan na diga-digat a kowan da-kami niman, metongpal i kaysalakanan ko. ^b 20 Namnamaen ko ngo tan piyan kon pasiyen nagwara komen polos i mengibaingak cha Afo Chiyos, no diket on-anay i toled ko niman a inges to nontan da say no manbiyagak ono metiyak, chejawen ches Cristo kagol cha si-kak. 21 Tep no si-kak ngo, no manbiyagak, mapteng iwan tep si Cristoy pangkep na biyag ko, tan no metiyak, mapmapteng pay iwan tep gwaraak cha si-katho. 22 Nem no ebiyagak pay laeng, mebedin men mansilbiak cha Cristo. Isonga, ekak amta pay no nengoy pispisen ko--manbiyag ono metiy. 23 Tep mandidigathak a chilin memispis na sa-ki. Piyan kon pasiyen bebtihan iya dobong say mekikadgwaak cha Cristo tep mas mapmapteng iwan. 24 Nem para cha panmaptengan jo, mesepol pay a on-onongak chiya dobong. 25 Menigoradoak niyay, isonga amtak i manbiyagak, et on-onongak cha si-kayon emiin say onkedkedsang i pamati yo, tan ma-ma-choman i chadsak jon naedafod pamati yo. 26 Piyan ko ngon man-iyan chiyay say no on-oliak mowan alid si-kayo, banay a pasiyay chadsak jod Cristo Jesus kagol cha si-kak.

27 Nem angken nengoy mepesamak, tanchaani yo say sema panbiyag jo, may-anam cha mapteng a chamag maypangkep Cristo say no onkowanak chithan a metaen tahejo ono enchi, iki-ngelan ko i mekisa-sa-kiy nemnem jon piyan ton a-seden, ekisa-sa-ki kayon mengitakchel na pamatin iyaybasar cha mapteng a chamag, tan 28 nat tekothan jo ngo ira ma naengontred si-kayo. Tep sema toled jo, kasi-nengan cha si-kara i no sa-ki din akow maysi-jan ired Afo Chiyos na ingked ingka, nem maysalakan kayo. Tan naedafod Afo Chiyos iyay. 29 Tep sema mapteng a in-i-kan Afo Chiyos cha si-kayo, nat pemati yod Cristo bengat, nem pandigat jo ngo kagol cha si-katho say mechejaw. 30 Tan sema digat a jowan da-kami, inges to ngoy digat kon sini-si-neng jo nontan da tan sema inki-ngelan jo ngon emangkepasamak med si-kak.