Sema Pekisa-sa-ki Babaen Na Pankombaba
2
Amta yo i iyaypakedsang i nemnem jo tep iyayka-chom kayod Cristo, tan iyaypamapteng i dekna yo tep ensemek to kayo. Mekikadkadgwa kayo ngod Ispirito Santo, tan mankikinaasi kayo. 2 Kagol na kinapodno na emiin iren jay, pangaasi yo, pekisa-sa-ki kayo. Pansisinemek kayo tan pansa-sa-kiy nemnem jo say metongpal i imdeng ko. 3 Angken nengoy a-magen jo, say pangkep jo, nat pengikayang jo koma na angel jo ono onpahi-tek kayo, no diket mankombaba kayo koma, tan ibilang joy echom a mas ainportanti iy say si-kayo. 4 Enog i niyemnem i mapteng para cha si-kayo bengat, no diket para cha echom ngo.5 Iinges joy nemnem jod pannemnem Cristo Jesus. 6 Tep angken gwared si-kathoy kosto-koston kinachiyos Afo Chiyos manipod nonta pilmiro, eg to inpilit a memetpet na kinainges tod Afo Chiyos, 7 no diket indasin to babaen na panbalin ton bagaen. Iyanbalin na too tan inges to ngoy itsora thod echom a too. 8 Et idi iyanbalin a too, iyankombaba, tan piyati thos Afo Chiyos ingkathod ingkathiy to angken sema kababaing a ketiy cha koros. 9 Isonga, inkayang Afo Chiyos si Cristo, et in-i-kan tod si-katho i ngaran a mas ekayang iy say emiin a ngaran 10 et say no mekegwan iwa ngaran Jesus, emiin a gwared dangit tan cha dobong tan cha chalem to, mantalimohod iren manchayaw cha si-katho. 11 Seja iren emiin, konen cha i si Jesu Cristoy Afo. Et setan i kagol na kechejawan Afo Chiyos a Awa thayo.
12 Si-kayon ensemek ko, nonta gwaraak cha si-kayo, napiyati yo na olay si Afo Chiyos, isonga mesepol a angken mas memati kayo no nagwaraak med si-kayo. Ipahat jon a-magen a emiin i piyan Afo Chiyos ingkathod metongpal i mapteng a pangkep ton inchogi thod si-kayo nonta insalakan to kayo, tan tahoti yos Afo Chiyos tan rispiktar jo iy a-magen jo. 13 Tep si Afo Chiyos, towan tongpaliy pangkep to. Si-kathoy naengi-kan na kamkam jo tan kebedinan jon mengemag na piyan to.
14 Emiin a ma-mag, amag jo tan enog i riri ono songbat 15 say nagwariy maypabasol cha si-kayo tan nagwariy ngaaw cha nemnem jo. Tep no inges niyay i aramid jo, anak to kayon Afo Chiyos tan nagwariy basol jo. Et angken gwara kayod toon ngaaw tan mabesol, ingesen joy pasingsing a nanimihal nem medebi 16 iy ipaamta yod si-kariy esel Afo Chiyos a naengi-kan na biyag a nagwariy pengingkaan to. Et no akow a ikowan mowan alin Cristo, iki-tek ko i nat kimawas i bediy ko. 17 Sema pamati yod Jesu Cristo, inges toy tangdal jod Afo Chiyos, tan seja biyag ko, inges toy inom a mayka-chom cha tangdal. Isonga, angken bonoen chaak et mayso-jat i chalak, kaimdengak ngorechan tan mekichadsahak cha si-kayon emiin. 18 Tan si-kayo ngo, man-imdeng kayo koma, tan mekichadsak kayo komed si-kak.
Sema Maypangkep Timothy Tan Si Epaphroditus
19 No itolok Jesus a Afo thayo, namnamaen ko i ito-nok si Timothy cha si-kayon chakos say paimdeng toak no iki-ngelan koy chamag to maypangkep cha si-kayo. 20 Nagwared jay i echom cha si-kak a podnon mengisahit cha si-kayo, malaksid cha si-katho bengat. 21 Tep emiin a echom, nat chiyan nemnema i piyan Jesu Cristo, no diket sema panmaptengan cha ngo bengat. 22 Nem si Timothy, amta yo i maronong. Amta yoy pesing ton naekiobded si-kak a manpaamta na mapteng a chamag a inges toy pesing na nga-ngen naekiobded aweto. 23 Isonga, namnamaen ko ngarod a mengito-nod si-kayo apaman a amtaen ko i mepesamak cha si-kak, 24 tan no itolok Afo, namnamaen ko i manbisitaak ngo mismod si-kayon chakos.
25 Niyemnem ko ngo i mesepol a ipabtik koy ahik cha pamatin si Epaphroditus a kaobdaan ko tan kasolcharoan kod Cristo. Into-no yon tolongan toak na mesepol ko, nem kowan ito-no ngo led tan cha si-kayo 26 tep iya-saw cha si-kayo ngon emiin, tan paladoy chanag to tep iyamta yo i iyansahit. 27 Agpayson iyansahit, et chanchanin metiy nowan, nem kiyaasian Afo Chiyos. Tan nat si-katho bengat i kiyaasian Afo Chiyos, nem angken si-kak, nahol ni mema-may engos ko. 28 Isonga, piyan kon chilin ito-nod si-kayo say on-imdeng kayo no metaen jo mowan, tan ma-kalan i chanag ko. 29 Isonga, pan-imdeng kayon mengegwat cha si-katho tep iyayka-chom ngod Afo. Chayaw joy toon inges tos Epaphroditus 30 tep istay metiy kagol na obda tho para cha Cristo. Inposta thoy biyag ton tolongan toak nonta nat piyosi yon tiyolonganak.