Sema Kinachonong A Naedafod Pamatid Cristo
3
Aahik cha pamati, igwa pay i sa-kin konen kod si-kayon panchadsak kayo tep iyayka-chom kayod Afo. Nem no si-kak ngo, ekak on-apton mansola-solat cha si-kayo maypangkep iren jay tep panmaptengan jo jay. 2 Tanchaani yo ira ma naengamag na ngaaw a singen ensekig a aso. Nainpilit cha i mesepol a mekogit i too no maysalakan. 3 Nem si-kathayo ira i ibilang Afo Chiyos a podnon ekogit, nat si-kara tep nachijaw tayos Afo Chiyos babaen na Ispirito Santon gwared si-kathayo. Maradsak kiya ngo tep iyayka-chom kiyed Cristo Jesus. Eg tayo ichinel i pankogit tan echom a dinteg ono sema iren ogadin nakigwan na too i mesepol a maonoran.4 Nem no gwariy toon kayen mengichinel na inges to ira jay, nagwariy echom no nat si-kak. No gwariy toon mengowan i insalakan Afo Chiyos kagol na imag to ono ogadi tho, igwak ko pay. 5 Tep ekogithak nonta maykagwalon akow na ingkay-anak ko. Poli thoak Israel, tan edafoak cha tribon Benjamin. a Si-kak i podnon Hebrew tep Hebrew i awak tan inak. b Sema maypangkep cha dinteg a in-i-kan Afo Chiyos cha Moses, inpahat kon onoran a emiin i bilin to tep Phariseeak. 6 Tan kagol a banay i pemateg kod man a dinteg, pidigathan ko ira ma ematid Jesus. Sema maypangkep na pengonod na dinteg, podnon maronongak tep nagwariy maypabasol cha si-kak. 7 Nem emiin a inbilang kon panmaptengan ko nontan, ibilang ko niman a nagwariy silbi tho tep iyayka-chomak med Cristo. 8 Tan nat setan bengat, nem ibilang kon emiin a nagwaren polos i silbi tho no iinges tod kapateg na pengamten Cristo Jesus a Afok tep setan i mas epateg iy seman iren emiin. Kagol cha Cristo, inpayas kon emiin tan sema emiin a inpayas ko, ibilang kon singen basora bengat say mayka-chomak cha Cristo, 9 tan koston mekisa-kiak cha si-katho. Say kinachonong ko niman, nat si-kathon iyaybasar cha inpangonod ko na dinteg, no diket sema kinachonong a nain-i-kan Afo Chiyos kagol na pamatik cha Cristo. 10 Say banay kon kamkam, si-kathoy pengamtak Criston kosto tan panda-kam ko na panakabalin ton iyaybiybiy nonta iyanpawil ali. Piyan ko ngon da-kaman i digat to tan mekipathiyak cha si-katho. 11 Et babaen niyay, namnamaen kon panpawil toak Afo Chiyos.
Nainpahat Paul A Menongpal Na Pangkep Cristo
12 Ekak konen i tiyongpal ko len emiin ira jay, tan ekak konen ngo i nagwara wiy kolang ko. Nem nainpahat kon menongpal na pangkep Cristo Jesus a panbedin toak na too tho. 13 Aahi, agpayson ekak tiyongpal ira jay, nem say sa-kin kowan amaga niman, nat kowan nemnema i imag ko nontan, no diket kowan ipo-tok i nemnem kod mesebi. 14 Nainpahat kon emiin i kabaalan kon singen mandomdombaak say onsagwiak cha pengingkaan to tep say egwathen koy kongkonen i-kan Afo Chiyos cha emiin a tiya-gway ton mekiechom cha si-kathod dangit babaen Cristo Jesus.
15 Si-kathayon emiin a mahedsang i pamati tho, say pannemnem tayo, inges komen jay. Nem no gwared si-kayoy toon afil i nemnem to, ipaamten Afo Chiyos cha si-kathoy kosto. 16 Nem say kasepolan tayon emiin, itolo-toloy tayo komen onoran i koston inpaamta len Afo Chiyos cha si-kathayo.
17 Aahi, kay-echom kayo ired ma naengonod cha si-kak, et ingesen jo ira. Si-neng jo ira ma naengonod na panbiyag mi, et onori yo. 18 Tep sema kigwa-kigwan kod si-kayo nontan, konen ko wed si-kayo mowan, tan penangis toak. Chakel i naengontred Cristo tep endam sis chiy ingkathiy to babaen na ngaaw chen panbiyag. 19 Sema panbanagan na biyag cha, maysi-jan ired Afo Chiyos na ingked ingka tep sema chiyos cha, sema kamkam na angel cha. Tan sema nainki-tek cha, sema et a kababaing a naimag cha. Sema naiyaypo-tok cha nemnem cha, sema gwared ja dobong. 20 Nem no si-kathayo, sema ili thayo, gwared dangit, tan si-katho ngoy kedepoan na mesmesked malen mengisalakan cha si-kathayo, a sema piyan ton a-seden, si Jesu Criston Afo thayo. 21 Sema angel tayon kakaasi tan metiy, panbalin Criston singen inges toy angel ton mimapteng nonta iyanpawil. Et kaya thon a-magen iyay babaen na panakabalin ton mantoray na emiin.