Sema Kaonoran A Bilin Paul
4
Isonga, si-kayon aahik cha pamatin ensemek ko, pemasig kayon mematid Afo. Ensemek tahejo, tan iya-sawak a pasiyed si-kayo tep si-kayoy naengipaimdeng cha si-kak, tan si-kayo ngoy singen kongkonak para cha bediy ko.2 Si-kayon Euodia tan si Syntyche, pangaasi yon man-inawatan kayo tep iyayka-chom kayon chegwed Afo. 3 Si-kam ngon naepiyal a kadgwak, pangaasim, tolongim ira ma bibii tep masdo iren mekiobded si-kak a mankasaba na mapteng a chamag. Tiyolongan chaak, pati si Clement tan sema iren echom a kaobdaan ko say ngaran cha, gwared dibchon iyaysolathan na ngaran iren ma gwariy biyag chen nagwariy pengingkaan to.
4 Panchadsak kayo na olay tep ekiechom kayod Afo. Konen ko mowan i panchadsak kayo. 5 Ibiybiy joy anos jod emiin a too tep chanchani diy ikowan alin Afo. 6 Angken nengoy mepesamak cha si-kayo, enog i chanag na emiin, no diket ikararag jon emiin cha Afo Chiyos. Ibagai yo na mesepol jo, tan pansalamat kayo ngod si-katho. 7 Et gwared si-kayoy talnen nain-i-kan Afo Chiyos a nat mahaawat tayo. Et setan a talna, ipakna thoy nemnem jo tep iyayka-chom kayo wed Cristo Jesus.
8 Aahi, say kaonoran a konen kod si-kayo, nemnem joy podno, epateg, kosto, esantoan, naiyasmek, tan aapolbaran. Angken nengo pay i mapteng ono echayaw, nemnem jo ira jay. 9 Angken nengoy iyachal jod si-kak ono igwat jod si-kak, tan angken nengoy inki-ngelan jon kigwan ko ono sini-neng jod panbiyag ko, onori yo. Et si Afo Chiyos a naengi-kan na talna, gwared si-kayo.
Sema Inpansalamat Paul Ired Ma Ematid Philippi
10 Banay a pasiyay chadsak kod Afo tep niman mebedin a tiyolongan joak mowan. Angken ebayag da manipod nonta engamag kayo na panmaptengan ko, amtak i gwariy pengisahit jod si-kak, nem nagwara bengat i gwaya yon ontolong nontan da. 11 Ekak konen iyay kagol na kahodang na mesepol ko tep aingsaak na olay a iyapnek angken nengoy kasasaad ko. 12 Diya-kaman kon gwariy kolang cha si-kak, tan diya-kaman ko ngon gwariy esolok cha si-kak. Angken nengoy mepesamak cha si-kak, no iyapselak ono aofaak, tan no gwariy esolok cha si-kak ono kolang, amtak a memnek. 13 Kebedinan kon mengemag a emiin babaen Criston mengikedsang cha si-kak.
14 Nem angken seman, mapteng a inpabiybiy joy pengisahit jod si-kak nonta iyandiga-digathak babaen na inpanpaw-it jo na tolong cha si-kak. 15 Si-kayon gwared Philippi, amta yo met i nonta bintihan koy Macedonia na pilmiron inpankasabak na mapteng a chamag chithan, nagwariy gropon ematin timolong cha si-kak, no diket si-kayo bengat. 16 Angken nonta gwaraak cha Thessalonica, inpaw-ithan joak na tolong a nat pinsak bengat. 17 Say kagol a kowan kona jay, nat sema piyan kon gwariy egwathen ko mowan cha si-kayo, no diket piyan kon ma-choman i kongkona yo. 18 Nagwara wiy mesepol ko, no diket esolok pay tep igwat kon emiin i inpatolod jo did Epaphroditus. Tan sema iren inpaw-it jo, singen inges toy manseng-ow a tangdal cha Afo Chiyos a iyapolbaran to tan iyan-imdengan to. 19 Et si Afo Chiyos a gwariy kinabaknang ton eg ma-ma-pos, i-kan ton emiin i mesepol jo kagol na iyay-echoman jod Cristo Jesus. 20 Sapay koma mechejaw si Afo Chiyos a Awa thayo na ingked ingka. Amen.
21 Kowan komostain emiin i toon Afo Chiyos chithan a ekiechom cha Cristo Jesus. Sema iren aahi tayod pamatin kadgwak chiyay, chiyan komostai kayo. 22 Emiin a toon Afo Chiyos chiyay, agdalo ira ma naiyan-obded baliy Caesar, a chiyan komostai kayo ngo. 23 Sapay koma ta gwared si-kayoy kaasin Jesu Criston Afo thayo.