Sejay a solat, insolat Paul ired ma ematid Colosse a siyodad cha dogad na Asia Minor. Insolat to iy maramen ekalebos cha Roma nonta emo A.D. 61. Nontan a timpo, insolat to pay i tedon echom a solat. Sema sa-ki, para ired ma Ephesus; sema sa-ki, para ired ma Philippi; tan sema sa-ki, para cha Philemon.

Idi gwares Paul cha kalebosan, inki-ngelan to i gwara iriy naiyantoro na nat podnod emati ired Colosse. Say naintoro-toro ra ket, angken siyen toon piyan ton maysalakan tan mengamten Afo Chiyos a kosto, nat on-anay konoy pamati thod Cristo. Mesepol konon patien toy echom a parit tan dinteg a naintoro ra, tan manchayaw pay na anghilis.

Isonga, insolat Paul iyay ired ma ematid Colosse say ipaamta thod si-kariy podno maypangkep Jesu Cristo. Kigwan to i si Cristoy engiparsowaan Afo Chiyos na emiin a gwared dobong tan dangit, isonga si-kathoy kahejangan iy say emiin a anghilis tan ispiritos. Gwara ngod Cristoy emiin a kinachiyos Afo Chiyos a Aweto, tan nagwariy echom a kedepoan na kaysalakanan, nem si-katho bengat. Isonga, mesepol a nat mesaol ira ma ematid dinteg tan ogadi na too, no diket si Cristo bengat i onoran cha koma tan panchinelan cha.