3 No ikararagan mi kayo, naiyansalamat kawi na olay cha Afo Chiyos a Awen Jesu Criston Afo thayo 4 tep inki-ngelan miy maypangkep na pamati yod Cristo Jesus tan sema semek jod emiin a toon Afo Chiyos. 5 Tan sema pamati yo tan semek jo, iyaybasar ired ma jowan sigoradoen namnamaen a egwathen jo na sa-ki din akow iwa indasin Afo Chiyos chiwed dangit para cha si-kayo. Iyamtaan joy maypangkep niyay a jowan namnamaa nonta inki-ngelan jo ma podnon minsahin sema mapteng a chamag. 6 Et sejay a mapteng a chamag, iyaychamag cha intiron dobong. Towan sa-dathiy panbiyag na chakel a iyanki-ngel tan emati. Inges to ngod ma diya-da-kam jo manipod nonta inpangi-ngel jo maypangkep na kaasin Afo Chiyos tan iyamtaan joy podnon kay-ingesan to. 7 Sema engitoron jay cha si-kayo ket, si Epaphras a kadgwa win ensemek mi. Naepiyal a bagaen Cristo, tan si-kathoy naengiriprisintar cha si-kawid si-kayo. 8 Si-katho pay i engigwanggwang cha si-kawi maypangkep na semek jod emiin a toon Afo Chiyos a naedafod Ispirito Santo.

9 Isonga, manipod nonta inki-ngelan miy maypangkep cha si-kayo, nainkararagan mi kayo na olay. Nainbaga wid Afo Chiyos i i-kan ton emiin i daing tan pengegwat jo babaen na Ispirito Santo say amtaen jon kosto iwa piyan ton a-magen jo. 10 Tep no setan ngarod, kabaalan jon onoran i panbiyag a may-anam cha naematid Afo, tan a-magen jo na olay i pan-imdengan to. Tan sapay koma onda-ton emiin i mapteng a naimag jo tan ma-choman i pengamta yo maypangkep Afo Chiyos. 11 Sapay koma ta pekedsang to kayo na kaskasdaaw a panakabalin Afo Chiyos say angken nengoy mepesa-pesamak, man-anos kayo tan kebedinan jon imingel na chadsak. 12 Pansalamat kayo ngod Afo Chiyos a Awa thayon engi-kan na karebengan tayo et say mekibingay kiya niwa insagana thon para cha too thon iyayka-chom cha pantorayan ton manihal. 13 Indibchi tho kiyed pantorayan na enbolinget a naiyantorayan Satanas, tan inka-chom to kiyed pantorayan na Anak ton ensemek to. 14 Tan sema Anak to, in-i-kan toy biyag to say maydibchi kiya, a sema piyan ton a-seden, mepekawanan i basol tayo babaen na ingkay-echom tayod si-katho.

15 Si Cristoy engibiybiy na kay-ingesan Afo Chiyos a eg naesi-neng. Gwara des Cristo nonta nat eparsowa pay laeng i dobong, tan si-kathoy kahejangan iy say sema iren emiin a eparsowa. 16 Tep si Cristoy engiparsowaan Afo Chiyos na emiin a gwared dobong tan dangit, a naesi-neng tan nat naesi-neng, pati emiin a afo tan ofisiyalis na anghilis tan ispiritos. Sema emiin a gwared dobong tan dangit, eparsowa babaen Cristo, tan eparsowa ngo para cha si-katho. 17 Gwara des Cristo nonta nagwaren polos i echom, tan si-kathoy naengipatoloy tan naengipaolnos na emiin a parsowa. 18 Si Cristo pay i mahaamta cha si-kathayon emiin a naemati, isonga singen si-kathoy toktok tayo tan si-kathayoy angel to. Si Cristo pay i naedafoan na bado thayon biyag tep si-kathoy edagwas a iyanpawil say si-kathoy kahejangan iy say sema iren emi-emiin. 19 Tep piyan Afo Chiyos a gwaren emiin i kinachiyos tod Anak to. 20 Et niyemnem ton ipaoli tho did si-kathon emiin i eparsowed dobong tan dangit babaen Cristo. Isonga ingkal Afo Chiyos iwa naengisi-jan cha si-kara. Imag to man babaen na chalen Criston imayos nonta etiy chiwa koros.

21 Angken si-kayo nontan, iyay-aragwi kayod Afo Chiyos, tan kiyonkontra yo babaen na ngaaw a nemnem jo tan ngaaw a aramid jo. 22 Nem niman inpaoli tho kayo din Afo Chiyos cha si-kathon mismo babaen na ingkathiy Cristo nonta iyanbalin si Cristo na too. Epasamak iwan say no onkowan kayod sangoanan Afo Chiyos, mesantoan kayo, nagwariy basol jo, tan nagwariy kagol a pengicharoman ched si-kayo. 23 Nem mesepol pay a memasig kayon memati say onnaneng i pamati yo tan maychalek a kosto. Mesepol a eg kayo maytolok i kepokaw na sigoradon namnama na kaysalakanan a nakigwan tod ma mapteng a chamag. Seja mapteng a chamag a inki-ngelan jo, iyaychamag maled intiron dobong, tan sejay ngo liy nainkaskasabak a si Paul cha sirbisiyok para cha Cristo.

24 Et niman manchadsahak tep naedigathanak kagol na pankasabaan kon panmaptengan jo, tan sema iren digat a kowan da-kamed angel ko, naiyayka-chom cha digat a inmingel Cristo para cha emiin a ematin inges toy angel to. 25 Tep pinispis toak Afo Chiyos a mansilbi ired ma naemati, tan inpiyal tod si-kak i obden koston pengamtaan na ese-esel ton panmaptengan jon Gentiles. 26 Sejay a kowan ipaamta-amta, nat aamtaan nonta bayag da angken cha sa-kin too tep nat inpaamten Afo Chiyos nontan. Nem niman niyemnem Afo Chiyos a ipaamted tothoo tho. 27 Imag to jay say amtaan cha i iyayka-chom kayon Gentiles chiwa kaskasdaaw tan epateg a plano tho. Tan sejay i plano thon gwared si-kayos Cristo, tan si-kathoy iyaybasaran na sigoradon namnama yon may-a-chom cha kinakayang Afo Chiyos. 28 Isonga, si Cristoy miyan ikaskasaba. Naiyosal min emiin i daing min manbancha tan mengitoro na emiin a too say itolod mi chen emiin cha sangoanan Afo Chiyos a toon nagwariy kolang na ogadi ra tep iyayka-chom ired Cristo. 29 Nainpahat kon emiin i kababaalan ko say metongpal ira jay babaen na panakabalin a nain-i-kan Cristod si-kak.