2
Kowan kona jay cha si-kayo tep piyan kon amtaen jo i kowan ipahat i kababaalan ko para cha si-kayod Colosse, sema ired Laodicea, tan sema emiin a echom a nat engaspolak. 2 Kowan amaga jay say onkedsang i nemnem jo tan mekisa-ki kayo babaen na pansisinemek jo. Kowan amaga pay iyay say eg kayo manchegwa-chegwa, no diket egwathan jon kostoy planon nat inpaamten Afo Chiyos nontan maypangkep Cristo. 3 Et si Cristoy naengipaamten emiin na daing tan pengegwat Afo Chiyos a esa-nop. 4 Kowan kona ira jay say eg cha kayo saolen na echom angken mengegwis i esel cha. 5 Tep angken nagwaraak chitha kad-an jo, naniyemnemnem tahejo, tan imimdengak a pasiyen engi-ngel na inpansa-sa-ki na nemnem jo tan kedsang na pamati yod Cristo.Sema Panbiyag Iren Ma Naemati Tep Ekisa-ki Ired Cristo
6 Niman a napiyati yo i si Cristo Jesus i Afo, mesepol a onoran joy panbiyag a iyay-anam cha si-kayon ekisa-kid si-katho. 7 Sema pamati yod si-katho, inges to komay kejow a enchokiy i damot to, ono inges toy baliy a chiyan itakchel a mahi-det i tohod to. Onori yoy iyaytorod si-kayo maypangkep Cristo say onkedkedsang i pamati yo iy itolo-toloy jon mansalamat cha Afo Chiyos.
8 Pantanchaan kayo say eg kayo mesaol babaen na toro-toron nat podnon nagwariy silbi tho tep seman iren toro-toro, nat naiyaybasar cha Cristo, no diket sema ogadi na too nonta bayag tan toro-toro na dobong. 9 Tep si Cristo, iyanbalin a too, nem gwara pay cha si-kathon emiin i kinachiyos Afo Chiyos. 10 Isonga, nagwara pay i mesepol jo tep ekisa-ki kayod Criston kahejangan iy say emiin a anghilis tan ispiritos a gwariy panakabalin tan karebengan to.
11 Nonta ekisa-ki kayod Cristo, gwariy diya-kam jon sinjal a anak to kayon Afo Chiyos. Sema diya-kam jo, may-arig cha kogit, nem nat sema kogit a naimag na tood angel, no diket sema inpangkal Cristo na ngaaw a ogadi yo. 12 Tep nonta ebonjagan kayo, singen ekibeka kayod Cristo, tan ekipawil kayo ngod si-katho tep emati kayod panakabalin Afo Chiyos a engipawil Cristo. 13 Nontan da si-kayon Gentiles a nat ekogit, singen etiy kayo tep naiyanbaso-basol kayo tan eg jo iyamtes Afo Chiyos. Nem niman in-i-kanan to kayon Afo Chiyos na badon biyag a inges tos Cristo tep piyakawanan ton emiin i basol tayo. 14 Sema imag Afo Chiyos cha si-kathayo ket, may-arig chiyay: ida thoy distaan na basol tayon banag na nat pemeti thayon ma dinteg to, et indansa thod koros. Sema piyan niyay a-seden, babaen na ingkathiy Cristod ma koros, inkepil Afo Chiyos iwa distaan, pati sema dinteg a naengipaamta i naiyanbaso-basol kiya. 15 Et idi etiy si Cristod koros, ingkal Afo Chiyos pay i karebengan tan panakabalin na ngaaw a ispiritos a mantotoray, tan inbiybiy tod emiin a piyarsowa tho i aagwak ira ma ispiritos.
Sema Bilin A Nat Mesaol Ira Ma Ematid Toro-toron Nat Podno
16 Isonga, enog i piyati ira ma naengipabasol cha si-kayon naengowan i mesepol a onoran joy dinteg cha maypangkep na mekan tan inom tan sema akow a naiyaydasin a inges toy piyasta ono ogadi na nainbo-day na bolan ono timpo na Sabbath. a 17 Tep sejay iren emiin a naaono-onoran nonta bayag, singen inges to bengat i alichon a naedagwas iy say sema toon mahaalichon. Sema piyan ton a-seden, sejay i nainpangawat na too nonta bayag da i gwara aliy mena-dat iren ma dinteg. Et niman kimowan alis Cristo, tan si-kathoy podnon sa-dat cha, isonga si Cristo bengat komay maonoran. 18 Enog pay i piyati ira ma naiyandisjon cha si-kayon naengipilit a mankombaba kayo tan manchejaw kayo na anghilis. Sejay iren tothoo, nakigwan cha i mita riy singen inges toy kokokip a iyaybasaran na iyaydasinan cha, nem sema dastog cha, nagwariy koston iyaybasaran to tep edafo met bengat cha nemnem chen mabesol. 19 Iyaysi-jan ired Criston inges toy toktok iren ma naematid si-katho, nem si-kathayo ngo, iyayka-chom kiyed si-katho tep iyay-inges kiyed angel to. Et sema toktok, si-kathoy mahaamta na emiin a parti na angel say egwathen chiy mesepol cha tan kosto-kostoy pan-aanam cha. Isonga, nabimadeg iwa angel a naiyaybasar cha planon Afo Chiyos.
20 Si-kayon naemati, singen ekipathiy kayod Cristo, isonga iyaydibchi kayod toro-toro na dobong. Apay nga naiyono-onoran yo ira ma toro-toro? Apay nga napiyati-pati yo iriy bilin a inges to ira jay: 21 Enog i iyagnian! Enog i nimathan! Enog i kiyapkap! 22 Tep emiin a mekan tan sema echom a nakigwan tod ma dinteg, nat ainportanti tep no aosal, naiya-pos. Tan sema naedafoan iren ma dinteg tan toro-toro, too bengat. 23 Singen mapteng mango ira ma dinteg tep sema iren naengonod, nasiningpet chen mengonod na panchejaw cha, nainbaba riy angel cha, tan napiyadigat chiy angel cha. Nem say podno, nagwariy kenkenchat iren jay a naiyanngel na piyan na angel.