Sema Bilin Cha Aanak Tan Parintis
6
Si-kayon aanak, pati yoy awejo tan inejo tep iyayka-chom kayo wed Afo tan si-kathoy koston pesing jo. 2 Tep kigwan tod ma bilin Afo Chiyos a pilmiron gwariy kari thod ma emati i “Chayaw mos awam ni inam 3 say da-kaman moy mapteng, tan onbayag i biyag mod ja dobong.” a4 Si-kayo ngon parintis, enog i inbonget i anak jon pasiya, nahol ni onbonget ira, no diket bilin jo ira tan itoroi yo iren inges toy pengemag na Afo no si-kathoy parintis cha.
Sema Bilin Para Cha Bagaen Tan Afo Ra
5 Si-kayon bagaen, pati yoy afo yod ja dobong. Rispiktar jo ira, tan ipahat jon a-magen iwa ibaga ren singen si Cristoy naengibaga. 6 Sedo kayo na olay, nat sema bengat no gwariy afo yon manbanbantay cha si-kayo say ichayaw cha kayo, no diket pan-obda kayon singen mansilsilbi kayod Cristo, tan ipahat jon a-magen i piyan Afo Chiyos. 7 Si-met kayon man-obden inges toy Afo i pansilbian jo, nat too bengat. 8 Tep amta yo i emiin a toon naengamag na mapteng, i-kanan iren Afo na kongkona, angken bagaen ono enchi.
9 Si-kayo ngon afo, mesepol a mapteng i ogadi yod ma bagaen jo. Enog iriy tiya-ta-kot tep amta yo i si-kayo tan bagaen jo, gwariy sa-kin Afo yod dangit, et man-iinges i ogadi thod emiin a too.
Sema Nain-i-kan Afo Chiyos A Sa-din
10 Niman sejay i kaonoran a konen kod si-kayo. Awat joy panakabalin a naedafod Afo Chiyos say onkedkedsang i pamati yo. 11 Osal jo pay i emiin a sa-din a in-i-kan Afo Chiyos say nat agwahen to kayo na ngaaw a saol Satanas tep sejay a sa-din, inges toy almas tan baro na solcharo. 12 Tep sema iren kakontra thayo, nat too ira, no diket aafo tan ofisiyalis ira na dimonyos chiwa iyaykayang tan echom a mangkahedsang a eg naesi-neng a naiyantoray na kawad-an na enbolinget a naiyan-iyanan na tood ja dobong. 13 Mesepol men osalen jon emiin i sa-din a in-i-kan Afo Chiyos say no kontraen to kayo iren ma dimonyos, kabaalan jon mekidaban ingkathod onsalcheng i daban, et nat mebedin a polos a egwahen cha kayo.
14 Isonga, pansagana kayo na olay a mekidaban. Say ibalkes jo, si-kathoy kinapodno na emiin a konen jo tan a-magen jo. Say isa-din jod pahow jo, si-kathoy mapteng a panbiyag jo. 15 Say isapatos jo ngon eg onkiros, si-kathoy mapteng a chamag maypangkep na talnen nain-i-kan Afo Chiyos. 16 Say isa-din jon menangka tan mengchep na aafoyan a nainpanen Satanas, si-kathoy pamati yod Cristo. 17 Say bistohol jo, si-kathoy kaysalakanan jo. Et say ispada yo, si-kathoy esel Afo Chiyos, et tolongan to kayo na Ispirito Santon mengosal niwan.
18 Pankararag kayo na olay, tan ibaga yo angken nengoy i-jan na Ispirito Santod nemnem jo. Ipasnek jo tan pemasig kayo na kararag. Ikararagi yo ngon emiin ira ma toon Afo Chiyos. 19 Et si-kak ngo, pangaasi yo, ikararagi yoak say itoroan toak Afo Chiyos na konen ko et say itoled kon ipaawat i mapteng a chamag a eg aamtaan nontan. 20 Tep into-no thoak Criston naengiriprisintar cha si-katho say ipaamtak iya mapteng a chamag, et si-kathoy kagol na iyaykadinaan ko tan iyaykalebosan ko niman. Isonga, pankararag kayo i itoled kon itoroy mapteng a chamag tep si-kathoy mesepol a a-magen ko.
Sema Kaonoran Na Solat
21 Si Tychicus a sa-kin ahi tayon ensemek kon naepiyal a mansilbid Afo, si-kathoy mengipaamted si-kayo na emiin a emangkepasamak cha si-kak. 22 Kowan ito-nod si-kayo say ipaamta thoy emangkepasamak cha si-kawid jay tan pekedsang toy nemnem jo.