3 Isonga, eg kayo koma mekibii tan mekidahi ono mengemag na kompormin ensekig a ogadi ono mengamkam na nat kokowa yo. Nagwara komen polos i kagol jon menabtabal i gwared si-kayoy naengamag iren jay. Tep nat iyay-anam cha si-kayon toon Afo Chiyos. 4 Say kababaing a ogadi tan esel a nagwariy silbi tho tan solo-solog maypangkep na bibii, nat iyay-anam ngo. Say pesing jo koma kitdi, pansalamat kayod Afo Chiyos. 5 Tep amta yo ngarod i sema mekibii tan mekidahi tan sema mengemag na ensekig, eg mayka-chom chiwa pantorayan Cristo tan si Afo Chiyos. Inges to ngo ma mengamkam na nat kokowa tho tep sema nakiyamkaman to, si-kathoy nachijaw to, nat si Afo Chiyos. 6 Et angken siyen toon mengowan i sejay iriy nat agpayson basol, enchek kayo mesaol maypangkep niwa nakigwan cha tep sema iren ogadin inges to jay, si-kariy kagol na penosaan Afo Chiyos iren ma eg cha piyan a mematid si-katho. 7 Isonga, mesepol a eg kayo mayka-chom chiwa toon inges to ira man.

8 Tep nontan singen si-kayoy enbolinget, nem niman singen si-kayoy silow tep iyayka-chom kayo wed Afo. Onori yo wa ma ogadin may-anam chiwa toon esilowan, 9 tan amag jon emiin i mapteng tan kosto tan podnon ketongpalan na biyag a esilowan. 10 Achal jo ngoy mengipaimdeng Afo Chiyos, et amag jo. 11 Sema iren inges toy enbolinget, enog i echom chiwa naimag chen nagwariy silbi tho, no diket itolok jo ma kinamapteng na ogadi yon menidow na ngaaw a ogadi ra. 12 Tep sema naimag chen iyay-emot, kababaing a pasiyen metabtabal. 13 Nem emiin ira jay a naaamag cha enbolinget, no mesidowan, mesi-neng i ngaawes a itsora ra. 14 Et emiin a esilowan, manbalin na silow. Inges to ja ese-esel a kigwan to i:

15 Matha yo wiy itsora na panbiyag jo say eg jo onoran i ogadi na toon nagwariy silbi tho, no diket sema iyangkedaing tan manemnemnem. 16 Osal jon emiin i gwaya jon mengemag na mapteng tep chakel i ngaaw niman a timpo. 17 Isonga, enog i amag na nagwariy silbi tho, no diket nemnem jo i piyan Afon a-magen jo. 18 Enog i botheng tep oncharal, nem kapno kayo na panakabalin na Ispirito Santo. 19 No mansi-si-nop kayo, pantitinebal kayo na psalmo, esel na kansiyon a manchayaw cha Afo Chiyos, tan echom a aispiritoan a kansiyon. Pankansiyon kayo ngo na panchejaw cha Afo. Tan nat cha temi yo bengat i mankansiyon, nem angken cha nemnem jo. 20 Tan pansalamat kayon emiin na olay cha Afo Chiyos a Awa thayo tep iyansa-sa-ki kayo wed Jesu Criston Afo thayo.

21 Pantinoray joy angel jod sa-ki tan sa-ki tep gwariy chayaw jod Cristo. 22 Si-kayon bibii, ipatoray joy angel jod imbaliy jon inges toy pengitoray jo na angel jod Afo Cristo. 23 Tep say dahi, si-kathoy toktok na imbaliy ton inges tos Criston toktok na emiin a naematin may-arig cha angel to. Tan si-katho ngoy mengisalakan cha si-kara. 24 Niman sema pesing na naematin manpatoray cha Cristo, si-katho koma i pesing na bibiin manpatoray na emiin cha imbaliy cha.

25 Si-kayon daleki ngo, semek joy imbaliy jon inges toy inpanmek Cristod emiin ira ma emati nonta in-i-kan toy biyag to para cha si-kara. 26 Inpasing to jay say manbalin ira na esantoan a toon Afo Chiyos babaen na ingkadinis cha na chanom tan sema esel Afo Chiyos. 27 Say kagol na engamagan Criston man, sejay a no onkowan alin ta-gwayen to ira, egwathen to iren imbaliy ton marikit a nagwariy koyot, mansa, tan malka. Tep say piyan Cristo, mesantoan ira tan nagwaren polos i basol cha. 28 Isonga, si-kayon daleki, semek joy imbaliy jon inges toy penmek jo na angel jo. Tep sema dahin ensemek toy imbaliy to, ensemek to ngoy angel to. 29 Nagwariy toon en-owes toy angel to, nem napikan to et, tan nakiyajoan ton inges toy nainpangajon Cristo ired ma naematid si-katho 30 tep singen inges to kiyen parti na angel to. 31 Tep gwariy iyaysolat cha esel Afo Chiyos maypangkep na sambaliy a kigwan to i “Isonga bebtihan na dahiy aweto tan ineto say maytipon cha imbaliy to et manbalin iwa chegwa na sa-ki.” ^a 32 Igwan i koston epateg a podnon ma-gwathan chiyay, et si-kak, iarig kod Cristo tan sema iren naematid si-katho. 33 Nem gwara ngoy banag a may-arig cha sambaliy. Si-kam a dahi, semek moy imbaliy mon inges toy penmek mo na angel mo. Tan si-kam ngon bii, chayaw moy imbaliy mo.