Sema Inpan-oonjon Na Angel A Naematid Cristo
4
Isonga, si-kak a iyaybalod tep naiyansilbiak cha Afo, ipasnek kon memidin cha si-kayo i ianam joy ogadi yod ma panbiyag a pinispis Afo Chiyos para cha si-kayo. 2 Pankombaba tan pan-anos kayod emiin a paras jo. Anosi yo pay i pankola-kolangan na echom jo tep gwariy semek jod sa-ki tan sa-ki, 3 tan ipahat jo a gwara na olay i pan-oonjon jon nain-i-kan na Ispirito Santo babaen na talnen mengipasa-kid si-kayo. 4 Tep gwariy sa-kin angel a sema iren iyayka-chom cha Cristo Jesus, tan gwariy sa-kin Ispirito Santon gwared man a angel. Gwara ngoy sa-kin namnama thayo tep tiya-gway to kiyen Afo Chiyos. 5 Gwariy sa-kin Afo, gwariy sa-kin pamati, gwariy sa-kin panbonjag. 6 Gwara ngoy sa-kin Afo Chiyos a Awa thayon emiin. Si-kathoy naiyantoray cha si-kathayon emiin. Si-kathoy naengiosal kiyen emiin say metongpal iwa plano tho. Si-kathoy gwared si-kathayon emiin.7 Nem si Cristo, in-i-kanan to kiyen emiin na kilasin daing a imonod chiwa niyemnem ton pankostoan tayo. 8 Tep kigwan tod ma esel Afo Chiyos maypangkep cha Cristo i:
“Nonta kimayang, iyodop toy chakel a igwak to,
tan gwariy in-i-kan to ngon rigalod too.” a
9 Nengoy piyan ton a-seden nonta kigwan to i kimayang? Piyan ton a-seden i sima-kod nin alid dangit, et kimowan chiwa kababaan a dogad na dobong. 10 Et sema sima-kod, si-katho ma kimayang cha dangit tan angken chiwa pay cha sa-pat to say mebedin a komplitoen ton emiin. 11 Tan si-katho ngoy engi-kan na kilasin daing a rigalod too tho. Chiyotohan toy echom a apostolis, sema echom a profita, sema echom a naiyan-aha-ahad a mengikaskasaba na mapteng a chamag maypangkep na kaysalakanan, tan sema echom a pastor a naengajo tan naengitoro iren ma naemati. 12 In-i-kan to ira jay a daing say metoroan i emiin a toon Afo Chiyos, tan mansagana iren mansilbid si-katho tan echom. Say ketongpalan niyay ma, si-kathayon naematin may-arig cha angel Cristo, onkedkedsang kiya 13 ingkathod manka-ka-chom kiyen emiin tep naemati kiyed Criston Anak Afo Chiyos tan gwariy paras tayod si-katho. Et may-arig kiyed ma iya-tengan a too, tan sema ogadi thayo, inges toy ogadin Criston nagwariy kolang to. 14 Nat may-arig kiya wed ma nga-ngen naiyansa-sa-dat i nemnem cha no gwariy chedngeden chen ngaaw a toro-toro iren ma piyan chen dingoen cha ira maypangkep na podno. Sema iren naiyansa-sa-dat i nemnem cha, inges to ira ma nainpan-odi-odi na chalojon, tan inges to ira ma nainpantinekjab na chahem. 15 Nem say pesing tayo koma kitdi, onoran tayo koma ma podnon naedafod Afo Chiyos tan konen tayo komed echom kagol na semek tayod si-kara say si-kathayon angel, ingesen tayos Criston toktok tayo, tan emiin a naimag-imag tayo, mebedin a inge-ingesen to pay i naima-imag Cristo. 16 Tep si Criston toktok, si-kathoy mahaamted si-kathayon angel, tan si-kathoy naengianam na partin ja angel to say man-aanam a kosto-kosto. Isonga, no tongpalen tayon emiin iwa obda thayo, onkedsang tan onba-deg iwa angel babaen na pansisinemek tayon naengipapaka-chom cha si-kathayo.
Sema Badon Biyag Cha Cristo
17 Sejay miy bilin kod si-kayon edafod Afo. Mesepol a pasiyen eg jo wa ono-onoran i ogadi iren ma eg naemati tep sema gwared nemnem cha, nagwariy pateg to. 18 Enbolinget iwa nemnem cha tep eg cha egwathan i podno, tan nagwared si-kara i biyag a nain-i-kan Afo Chiyos tep eg cha piyan a amtaen i maypangkep cha Afo Chiyos tep esolpeng ira. 19 Isonga, nagwara wiy baing cha tep angken nengoy piyan chen a-magen a ngaaw ono kababaing, naimag cha na olay. 20 Nem si-kayo, sema iyachal jon maypangkep cha Cristo, nat inges to ira man 21 tep chingel jo ngarod iwa maypangkep cha si-katho, tan iyachal jo ngarod i podnon toron esi-neng cha biyag to. 22 Amag jo wa ma iyachal jo. Benegi yo ma sigod a ogadi yo tep si-kathoy naedafoan na ngaaw a kamkam jon naenaol kayon oncharal cha si-kayo. Sa-dathi yon inges toy pena-dat jo na bakjot a baro yo. 23 Mesepol a mebadoan itha nemnem jon kosto-kosto. 24 Awat jo i badon ogadin naedafod Afo Chiyos a inges toy ogadi tho. Awat jon inges toy manbaro kayo na bado. Et sema kinachonong tan kinasanton naedafod podno, mesi-neng chiwa panbiyag jo.
25 Isonga, enog i itek, no diket kowan joy podnod ma echom jo tep si-kayon emiin i parti na sa-kin angel. 26 No onbonget kayo, enog i intolok a bonget joy panbesolan jo. Enog i niyemnemnem na ebayag, no diket isalcheng joy bonget jo asan ondenek i akow 27 say nagwariy gwayen Satanas a mengipabasol cha si-kayo. 28 No gwariy naengibot, mesepol a isalcheng to et onsedo wa say gwariy koston panbiyagan to. Et mebedin a oncha-ched ma toon gwariy kolang to. 29 Enog i esel na ngaaw a menokat, no diket kowan jo bengat i mapteng a oncha-ched ma mengiki-ngel tan sema panmaptengan cha. 30 Tan enog i inpa-ngos i Ispirito Santon Afo Chiyos tep si-kathoy in-i-kan Afo Chiyos cha si-kayon kasi-nengan ton si-kayoy too tho tan koston maybolos kayo no onmothok aliy akow a pinispis Afo Chiyos. 31 Ekal jod biyag joy tafi, owes, bonget, babakal tan sosongbat, tan omang, pati emiin a nemnem a oncharal na echom. 32 Say pesing jo koma kitdi, pantitinolong kayo, pankikinaasi kayo, tan panpipinakawan kayon inges toy inpamakawan Afo Chiyos cha si-kayo kagol Cristo.