Sema Obden Paul Para Cha Gentiles
3
Emiin ira jay, si-kariy kagol a naiyankararagan kod si-kayo. Si-kak a si Paul, iyaykalebos tep naiyansilbiak cha Cristo Jesus para cha panmaptengan jon Gentiles. 2 Chingel jo emo i inpiyal Afo Chiyos cha si-kak iya obden mengikaskasabed si-kayo maypangkep na kaasi tho. 3 Inpaamta thod si-kak iwa plano thon eg aamtaan nontan den intabtabal ko na otik chiya insolat ko. 4 No basaen jo, amtaen joy inpangawat kod jay a planon eg aamtaan nontan den tongpalen Afo Chiyos babaen Cristo. 5 Sigod a nat inpaamten Afo Chiyos iya plano ired ma too, nem niman ma, inpaamta thod ma apostolis tan profita babaen na Ispirito Santo. 6 Et sejay i planon inpaamta tho wa. Si-kayon Gentiles a naematin ma iyaykaskasaba maypangkep Cristo, mekida-kam kayod ma chakel a bindisjon Afo Chiyos a igwat min Hodjos. Iyayka-chom kayo ngod si-kawin emiin a inges toy angel Cristo. Et mekibingay kayod ma inkarin Afo Chiyos a i-kan tod si-kawin emiin a naematid Cristo Jesus.7 Si-kak, kiyaasian toak Afo Chiyos tep inpanbalin toak na bagaen ton mengikaskasaba niya mapteng a chamag a mebedin a a-magen ko babaen na panakabalin to. 8 Angken si-kak i kababaan cha emiin a toon Afo Chiyos, in-i-kan tod si-kak i ispisiyal a obden mengipaamted Gentile na kinamapteng na bindisjon Criston nagwariy inges to. 9 Into-no thoak Afo Chiyos pay a mengipaamted emiin a tothoo no nengoy pesing niwa plano thon metongpal. Tep si Afo Chiyos a emarsowa na emiin, sigod a eg to inpaam-amta ma plano tho 10 say maypaamta wa ired ma mantotoray tan ofisiyalis cha dangit babaen iren ma emiin a emati. Tep sema iren gwared ma dangit, no metaen chiy ketongpal niwa planon Afo Chiyos maypangkep na emati, amtaen cha wiy daing to tan emiin a kilasin esi-neng. 11 Sejay a inpasing Afo Chiyos, imonod chiwa niyemnem ton a-magen nontan da, et tiyongpal to babaen Cristo Jesus a Afo thayo. 12 Isonga, mebedin men manchinel kiyen on-esop cha Afo Chiyos, tan amta thayo i chedngeden toy piyan tayon konen tep gwariy pamati thayod Cristo Jesus. 13 Isonga, pangaasi yo, enchek kayo medismaya tep naepadigathak para cha si-kayo tep para cha chayaw jo.
Sema Toloy Na Kararag Paul
14 Isonga, no nemnemnemen koy daing Afo Chiyos tan plano tho para cha emiin a gwared ja dobong tan chiwa dangit, naiyantalimohorak a mankararag cha Afo Chiyos a Awa thayon 15 naedafoan na emiin a pamiljed ja dobong tan chiwa dangit. 16 Naiyadok ko i pekedsang na Ispirito Santoy nemnem jo babaen na panakabalin tan kinakayang Afo Chiyos a nagwariy kay-ingesan to 17 say man-iya-iyan si Cristod si-kayo tep gwariy pamati yod si-katho. Naiyadok ko i ondamot et onkeneg i semek jod Afo Chiyos tan sema echom jo 18 say si-kayo tan emiin a toon Afo Chiyos, mahaawat joy kapategan tan kabanayan na semek Criston nagwariy pengingkaan to. 19 Et naiyadok ko i amtaen jo tan pechasen jo pay i semek to angken nat mahaawat na toon emiin. Naiyadok ko pay i onmapmapteng na olay i ogadi yo ingkathod ingesen toy ogadin Afo Chiyos a nagwariy kolang to. a