Sema Badon Biyag Iren Ma Iyayka-chom Cha Cristo
2
Nontan a aneng i pemati yo, singen etiy kayo tep iyanbaso-basol kayo. 2 Nontan a timpo, iyono-onoran joy ngaaw a ogadi iren ma eg naemati, tan piyati-pati yoy afo iren ma dimonyos cha iyaykayang a naiyantoray iren ma nat naematid Afo Chiyos. 3 Si-kathayon emiin nontan, nainpasing tayoy kompormin piyan tayon ngaaw. Angken nengoy piyan na angel tan angken nengoy gwared nemnem, si-kathoy naiyonoran tayo. Isonga, echosa kiya komen inges to ira ma echom a eg cha a-magen i piyan Afo Chiyos.4 Nem banay a pasiyay kaasi tan semek Afo Chiyos cha si-kathayo. 5 Tep angken singen etiy kiya tep iyanbaso-basol kiya, inpaki-kan to kiya na badon biyag a inges tos Cristo. Tep sema kaasin Afo Chiyos i naedafoan na kaysalakanan tayo. 6 Inpakikayang to kiya ngon Afo Chiyos a inges tos Cristo Jesus say mekitoray kiyed si-kathod ma dangit. 7 Inpasing to ira man say sema karakelan a kaasi thon iyaybiybiy cha si-kathayo babaen Cristo Jesus, masi-neng na ingked ingka. 8 Tep sejay a kaasin Afo Chiyos, si-kathoy naedafoan na kaysalakanan jo babaen na pamati yod Cristo. Nat naedafoy kaysalakanan jod ma naimag jo, no diket sema rigalon naedafod Afo Chiyos. 9 Nat naedafoy kaysalakanan jod ma mapteng a naimag jo, nahol ni gwariy mandastog. 10 Tep si Afo Chiyos, si-kathoy naemado na biyag tayo tep iyayka-chom kiyed Cristo Jesus say a-magen tayoy mapteng a sigod a niyemnem Afo Chiyos i a-magen tayo.
Iyansa-kiy Hodjos Tan Gentiles Tep Iyayka-chom Ired Cristo
11 Isonga, si-kayon iyay-anak na Gentile, nemnem jo i sigod a itsora na biyag jo. a Naiyomang cha kayo na Hodjos i eg kayo ekogit iy nakigwan cha i si-kara bengat i toon Afo Chiyos tep ekogit ira, nem say kogit, si-katho bengat i nainpasing na tood angel cha. 12 Nemnem jo i nontan da iyaysi-jan kayod Cristo. Iyaydasin kayod ma poli-polin Israel a pinispis Afo Chiyos a too tho. Isonga, eg kayo iyayka-chom chiwa tothoon inkarian Afo Chiyos i onkowan ali ma mengisalakan. Idi iyono-onoran joy sigod a ogadi yo, nagwariy mapteng a namnama yo, tan eg jo amtes Afo Chiyos. 13 Nem niman, si-kayon aragwi nontan da, iyayka-chom kayod Cristo Jesus, isonga iyay-esop kayod Afo Chiyos. Epasamak iyay kagol na chalen Criston imayos nonta ingkathiy to. 14 Tep si Criston mismoy kagol na iyan-oonjonan tayon Hodjos tan Gentiles. Inpansa-sa-ki tho kiya tep ingkal toy naedafoan na owes tayod sa-ki tan sa-kin inges toy alad a nainpandinasin to kiya. 15 Tep idi etiy si Cristod koros, iyomas toy dinteg na Hodjos a chakel i bilin to say si-kawin Hodjos tan si-kayon Gentiles, badoan to kiya, tan panbalin to kiya na singen sa-kin angel tep iyayka-chom kiyed si-katho. Inpasing Cristo jay say man-inawatan kiya cha. 16 Idi etiy cha koros, ingkal toy owes tayod sa-ki tan sa-ki, isonga iyansa-ki kiya wa cha. Inpasing to jay say si-kawin Hodjos tan si-kayon Gentiles, ipaoli tho kiyen emiin cha Afo Chiyos. 17 Ahow, kimowan alis Cristo, et inkaskasaba thoy mapteng a chamag a mebedin a mayka-chom kiyed Afo Chiyos. Inkaskasaba tho jay cha si-kayon aragwid Afo Chiyos tan si-kawin iyay-esop cha si-katho. 18 Et mahaesop kiyed Afo Chiyos a Awa thayo kagol na ingkathiy Cristo tan tolong na Ispirito Santon gwared si-kathayon emiin.
19 Isonga, si-kayon Gentiles, nat bisita kayo wa, nem iyayka-chom kayo wed toon Afo Chiyos a towan torayi. Iyayka-chom kayo wed pamiljen Afo Chiyos. 20 Inges joy parti na timplon niyan-amagen Afo Chiyos. Sema iren apostolis tan profita, si-kariy iyaytegwenan na timplo, et si Cristo Jesus i kapategan a bathod ma sohong na iyaytegwenan a naengibahed niwa intiron timplo. 21 Si-katho ma iyaytobtoban na emiin a parti say ma-mag i esantoan a timplo para cha Afo. 22 Si-kayon iyayka-chom cha Cristo, iyaybilang kayod emiin a naematin niyan-osalen Afo Chiyos a a-magen ton pan-iyanan to babaen na Ispirito Santo tho.