3 Chejawen tayos Afo Chiyos a Chiyos tan Awen Jesu Criston Afo thayo tep in-i-kan tod si-kathayoy emiin a aispiritoan a bindisjon a gwared dangit tep iyayka-chom kiyed Cristo. 4 Tep nonta aneng meparsowiy dobong, iyakcheng a pinispis to kiyen Afo Chiyos a mematid Cristo say mesantoan kiya tan nagwariy basol tayod sangoanan to. 5 Kagol na semek tod si-kathayo, sigod a niyemnem ton panbalin to kiyen anak to babaen na inpasing Jesu Cristo. Inpasing Afo Chiyos iwan tep si-kathoy piyan to. 6 Isonga, chejawen tayo kagol na kaskasdaaw a kaasi thon inbiybiy tod si-kathayo tep iyayka-chom kiyed Jesu Criston ensemek ton pasiya. 7 Tep sema chalen Jesus a imayos, si-kathoy kagol na iyaydibchian tayo a sema piyan ton a-seden, epakawanan i basol tayo. Epasamak a emiin ira jay cha si-kathayo tep banay a pasiyay kaasin Afo Chiyos 8 a in-i-kan tod si-kathayon nagwariy pengingkaan to. Chakel ngoy in-i-kan ton daing cha si-kathayo say egwathan tayon pasiyay maypangkep cha si-katho tan sema mapteng a panbiyag a onoran tayo koma. 9 Tep inpaamta thod si-kathayo ma plano thon eg aamtaan nontan a niyemnem to i si Cristoy menongpal. 10 Et sejay i plano tho. No onmothok aliy koston timpo, emiin a gwared ma dangit tan dobong, pansa-sa-ki tho ira, et si Cristoy afo ra.

11 Emiin a mepesamak, on-onod chiwa sigod a planon Afo Chiyos, tan say sa-kin parti niwa plano, pinispis to kiyen manbalin na too tho tep iyayka-chom kiyed Cristo. Sejay i niyemnem Afo Chiyos nonta kapkapoanan, 12 et say si-kawin edagwas a ematid Cristo, si-kawiy kagol na kechejawan na kinachiyos to. 13 Et si-kayo ngo, idi inki-ngelan joy podnon mapteng a chamag maypangkep na kaysalakanan jo, emati kayod Cristo. Isonga, inpan-iyan Afo Chiyos cha si-kayoy Ispirito Santon inkari tho say si-kathoy malka i si-kayoy too tho. 14 Et sema pan-iyan na Ispirito Santod si-kathayo, si-kathoy kaamtaan to i egwathen tayon emiin i inkarin Afo Chiyos cha tothoo tho no tongpalen toy kaybolos tayo say mechejaw i kinachiyos ton kaskasdaaw a pasiya.

15 Isonga, manipod na inpanki-ngel ko maypangkep na pamati yod Jesus a Afo thayo tan semek jod emiin a toon Afo Chiyos, 16 naiyansalamathak na olay cha Afo Chiyos kagol cha si-kayo, tan nainkararagan tahejo pay. 17 Sema nain-ado-adok kod echayaw a Awa thayon Chiyos Jesu Criston Afo thayo, sejay a i-kan Afo Chiyos i daing jo tan pengegwat jo babaen na Ispirito Santo say amtaen jon kostos si-katho. 18 Naekialohak pay cha Afo Chiyos i silowan toy nemnem jo say si-kayon pinispis to, egwathan joy namnamen sigoradon da-kamen jo. Nain-adok ko pay i da-kamen joy karakelan tan kapategan na bindisjon ton inkari thod too tho. 19 Nain-adok ko i amtaen jo ngoy kedsang na panakabalin ton mantotolong cha si-kathayon naemati. Sejay a panakabalin a nagwariy kay-ingesan to, inges toy panakabalin ton 20 inbiybiy to nonta inpanpawil thos Cristo et inpatokkong tod gwanan tod dangit. ^a 21 Sema pantoray Cristo, mas ekayang iy say emiin a mantotoray tan ofisiyalis. Sema ngaran to ngo, mas ekayang iy say emiin a gwariy karebengan to niman a timpo tan timpo alin onmothok. 22 Inpatoray Afo Chiyos a emiin cha Cristo, tan chiyotohan to ngon afo na emiin, pati emiin a naemati. 23 Sema emiin a naematid Cristo, may-arig ired angel to, tan si Cristo, si-kathoy toktok to. Isonga, komplitoen toy naematid si-katho tep nain-i-kan ton emiin i kolang cha iy maramen komplitoen to ngon emiin i eparsowa tep gwares si-kathod emiin a gwared dobong tan dangit.