2 Naiyansalamat kawi na olay cha Afo Chiyos kagol cha si-kayon emiin tan nainkararagan mi kayo pay na olay. 3 Naiyansalamat kawid Afo Chiyos a Awa thayo tep naniyemnemnem miy maypangkep na mapteng a naima-imag jo kagol na pamati yo. Nat nadiningding mi pay i sedo yon natimolong na echom kagol na semek jod si-kara tan sema anos jo na diga-digat kagol na namnama yon ioli di mowan Jesu Criston Afo thayo. 4 Aahi win ensemek Afo Chiyos, naiyansalamat kawi pay tep amta wi i pinispis to kayon Afo Chiyos say manbalin kayon tothoo tho. 5 Amta wi tan tep nonta inkaskasaba wiy mapteng a chamag cha si-kayo, nat esel mi bengat i inki-ngelan jo, no diket diya-kaman jo ngoy panakabalin na Ispirito Santo, tan iyamtaan jo pay i sigorado kawin chili a podno ma inkaskasaba wi. Tep mita yo pay i panbiyag mi nonta iyan-iya-iyan kawid kad-an jo, et amta yo wa i sema ima-imag min emiin, para cha panmaptengan jo. 6 Amta wi pay i pinispis to kayon Afo Chiyos tep iyonoran joy panbiyag mi tan sema panbiyag Jesu Criston Afo thayo. Tep angken epadigat kayo tep piyati yoy esel Afo Chiyos, diya-kaman jo met laeng i chadsak a edafod Ispirito Santo tep iyayka-chom kayo wed Cristo. 7 Kagol nithan, iyanbalin kayo na arig cha emiin a naematid probinsiya na Macedonia tan Achaia. 8 Tep sema esel Afo Chiyos maypangkep Jesus a kigwan jod echom, aamtaan cha Macedonia tan Achaia. Tan nat setan bengat, nem sema chamag maypangkep na pamati yod Afo Chiyos, chingel ched emiin a siyodad. Isonga nagwara wiy mesepol a konen mid too maypangkep cha si-kayo. 9 Tep sema iren tothood man, si-kara ngoy naengigwanggwang cha si-kawi i imimdeng kayo nonta kimowan kawid ta kad-an jon iyantorod si-kayo. Nakigwan cha kawi pay i binekan joy sinan chiyos say mansilbi kayod podnon Afo Chiyos a sibibiyag. 10 Nakigwan cha kawi pay i jowan sekeriy ioli din Jesus a Anak Afo Chiyos a medepo did dangit. Inpanpawil Afo Chiyos si Jesus, et si Jesus i engisalakan cha si-kathayo say nat meda-kaman i bonget alin Afo Chiyos.