Sema Mapteng A Ogadi Iren Paul Cha Thessalonica
2
Aahik, amta yo ngo i nonta binisita wi kayo, gwariy mapteng a iyanbanagan na biyag jo. 2 Amta yo pay i nonta kimowan kawid Philippi, piyadigat cha kawi tan biyaingan cha kawi, nem inpakedsang Afo Chiyos i nemnem mi. Isonga, nonta mimothok kawid kad-an jo, intoled min iyankasabed si-kayo na mapteng a chamag a edafod Afo Chiyos angken chakel i tood tan a engontred si-kawi. 3 Tep sema nainkaskasaba wi, nat naedafod afil a nemnem ono ngaaw a kakara. Tan nat nasiyaol miy tothoo. 4 No diket nakigwan mi na olay i inbilin Afo Chiyos cha si-kawi. Tep iyapolbaran to kawin Afo Chiyos tan inpiyal tod si-kawiy pengikaskasaba niwa mapteng a chamag. Et say nainkaskasaba wi, nat sema piyan na toon konen mi, no diket sema piyan Afo Chiyos a mahaamta na emiin a nemnem mi. 5 Amta yo pay i eg mi inbili-biling a inki-ki-tek mi kayo, tan eg mi iyosal i ese-esel a menaol cha si-kayo say panpilahan mi kayo. Amten Afo Chiyos i podno jay. 6 Nagwared nemnem mi i iki-tek jo kawi tan nagwara ngod nemnem mi i iki-tek cha kawi na echom a too, 7 angken banay i karebengan mi tep apostolis to kawin Cristo. Nem iyanosan mi kayon inges toy nainpankajo na ina na aanak to. 8 Kagol na banay i semek mid si-kayo, imimdeng kawin pasiyen mantorod si-kayo na mapteng a chamag a edafod Afo Chiyos. Nat setan bengat, nem esagana kawin metiy para cha si-kayo tep epaladon epateg kayod si-kawi. 9 Aahik, sigoradon niyemnem jo i simedo kawin pasiya nonta gwara kawid kad-an jo. Tep nonta maramen mantotoro kawid si-kayo na mapteng a chamag a edafod Afo Chiyos, iyandagdagbo kawi pay na gwiya-gwa-gwa tan angken kalebian say eg kayo mebel-athan kagol cha si-kawi.10 Si-kayo tan si Afo Chiyos i mebedin a mantistigo i sema inpasing mid si-kayon naemati ket, mapteng. Sema ogadi wi, esantoan tan maronong, tan nagwariy maypabasol cha si-kawi. 11 Amta yo pay i sema inpasing mid si-kayon emiin, singen inges toy nainpasing awed aanak to. 12 Inpakedkedsang miy nemnem jo, inpamapmapteng miy dekna yo, tan nabinili-bilin mi kayo i onoran joy panbiyag a iyaybagay ired ma naematid Afo Chiyos. Tep tiya-gway to kayon Afo Chiyos say mayka-chom kayod pantorayan to, tan say mekida-kam kayo na kinakayang to.
Sema Digat Iren Ma Ematid Gwared Thessalonica
13 Tan naiyansalamat kawi pay na olay cha Afo Chiyos tep nonta inki-ngelan joy esel Afo Chiyos a inkaskasaba wid si-kayo, piyati yo tep igwathan jo i nat esel na too, no diket sema podnon esel Afo Chiyos. Et seja esel Afo Chiyos, naengi-ngi-kan na mapteng a pantongpalan tod biyag jon naemati. 14 Aahik, amta wi i podnon naemati kayo tep inges jo wa ira ma tothoon Afo Chiyos cha Judea a iyayka-chom cha Cristo Jesus. Tep sema echom chen Hodjos, pidigat cha ira kagol na pamati ra. Et inges to ngod si-kayo tep sema iren kaidian jo, pidigat cha kayo ngo kagol na pamati yo. 15 Sema iren Hodjoy emono ira na profita nonta bayag da, tan si-kariy emonon Jesus a Afo thayo. Si-kara pay i enagchag cha si-kawi. Nakiyontra riy piyan Afo Chiyos, et singen si-kariy kabakal na emiin a tothoo 16 tep no ikasaba wiy mapteng a chamag ired ma Gentile say maysalakan ira, nainparas chen meniped cha si-kawi. a Inges niwan i inpasi-pasing iren ma Hodjos a menga-ka-chom na basol cha. Et niman iyagchengan miy basol cha, et mimothok miy chosen Afo Chiyos cha si-kara.
Sema Esaw Iren Paul Ired Ma Ematid Thessalonica
17 Aahik, nonta magenon iyaysi-jan kawid si-kayo, epaladoy esaw mid si-kayo. Naniyemnemnem mi kayo na olay angken nagwara kawi led tan. Isonga, inpahat miy kabaalan min on-oli ded tan say bisitaen mi kayo mowan. 18 Tep piyan min pasiyen on-oli ded tan mowan. Agdaloak a si Paul, eminchakel a pichas kon onkowan ded tan, nem natiniped to kawin Satanas. 19 Piyan min bisitaen kayo mowan tep miyan namnamaa i naemasi-masig kayon memati. Isonga, si-kayoy panchadsahan mi, tan singen inges jo pay iwa kongkona win pategan min pasiya no gwara kawid sangoanan Jesus a Afo thayo na ioli tho di mowan. Tep si-kayoy kasi-nengan i sema nainpansilbi wid Afo Chiyos ket, mapteng i iyantongpalan to. 20 Agpayson podno tan. Si-kayoy panchadsahan mi tan sema kagol a kaychejawan mi.