Into-non Paul Si Timothy Ired Ma Gwared Thessalonica
3
Isonga, nonta eg mi wa inmingel i esaw mid si-kayo, niyemnem mi i on-onong kawin Silas chiya Athens 2 et ito-no wi led tan si Timothy a ahi tayod pamati tan bagaen Afo Chiyos cha pankaskasaba na mapteng a chamag maypangkep Cristo. Into-no wi say pekedsang toy nemnem jo tan say onkedkedsang pay i pamati yo. 3 Imag mi man say nagwariy manbebneg na pamati tho kagol na diga-digat a jowan da-kama. Amta yo ngo wala i say planon Afo Chiyos ket, meda-kam i diga-digat. 4 Tep nonta iyan-iya-iyan kawid tan, nabiyanbanchaanan mi kayo i gwara diy diga-digat a onmothok cha si-kathayon naemati. Et amta yo i si-kathoy epasamak ma. 5 Epaladoy chanag kod si-kayo kagol na diga-digat jo. Isonga, nonta ekak ma inmingel, into-nok des Timothy chithan say amtaan ko no sa-noy pamati yo. Tep niyemnem ko i siyolisog to kayo emon Satanas et binekan joy pamati yo. Et no seman ma, singen nagwariy silbi na inpantoro wid si-kayo.6 Nem ahay mothok Timothy did kad-an jo, et mapteng a pasiyay ingwanggwang tod si-kawi. Kigwan to i natimolo-toloy a mahedsang i pamati yo tan ensemek joy echom jo. Kigwan to pay i naniyemnemnem jo kawi na olay tan sema esaw jod si-kawi, inges to ngoy esaw mid si-kayo. 7 Isonga aahik, angken chakel i diga-digat mi tan gwara iriy naiyanpadigat cha si-kawi, kimedsang i nemnem mi kagol na pamati yo. 8 Et echadsahan kawi tep jowan petpetpeti pay i pamati yod Jesus a Afo thayo. 9 No mansalamat kawid Afo Chiyos para cha si-kayo, eg mi amten mengowan na epaladon chadsak mi kagol na mahedsang a pamati yo. 10 Isonga, angken kaakawan ono kalebian, naiyado-adok mis Afo Chiyos i si-nengen mi kayo mowan say a-choman miy kolang na pamati yo.
11 Sapay koma si Afo Chiyos a Awa thayo tan si Jesus a Afo thayo, a-kalen chiy meniped cha si-kawi say mebedin a onkowan kawi led tan. 12 Sapay koma si Jesus a Afo thayo, echo-echoman toy semek jod echom jon naemati tan emiin a too say banay i semek jod si-karen inges toy semek mid si-kayo. 13 Tep no ma-ma-choman i semek jo, si Jesus a Afo thayo, pemasi-masig to kayon mengemag na mapteng say mebedin a mesantoan kayo, tan say nagwariy kolang jod sangoanan Afo Chiyos a Awa thayo no on-oli dis Jesus a Afo thayon odofen ton emiin i too tho.