Sema Panbiyag A Naiyapolbaran Afo Chiyos
4
Aahik, gwara pay i konen mid si-kayo. Binidin mi kayo nontan maypangkep na pesing jo komen manbiyag say apolbaran to kayon Afo Chiyos. Et sini-neng mi wa i jowan onori waliy kigwan mi. Isonga babaen na karebengan a in-i-kan Jesus a Afo thayod si-kawi, bidinen mi kayo i itolo-toloy jon echo-echoman i mapteng a ima-imag jo. 2 Amta yo wala ira ma inbilin mid si-kayo a edafod Jesus a Afo thayo. 3 Amta yo wa i say piyan Afo Chiyos, mesantoan kayo. Isonga, enog i chichog i nat imbaliy jo. 4 Si-kayon daleki, mesepol a achalen joy pesing a pantakchol na sambaliy say sema pesi-pesing jod imbaliy jo ket, mesantoan tan mapteng. 5 Eg kayo koma manpatoray cha kamkam na angel jo maypangkep na bibiin inges toy toon eg to amtes Afo Chiyos. 6 Eg jo koma charogen i imbaliy na echom jo tep no a-magen jo man, iyaboso yo tan iyanbasol kayod si-katho. Kigwan mi nontan da i eg jo koma a-magen iwan. Biyanchaanan mi kayo i chosaen Afo Chiyos i toon iyanbasol a inges to jay. 7 Tep nat pinispis to kiya chen Afo Chiyos say onoran tayoy ngaaw a panbiyag, no diket pinispis to kiya cha say onoran tayoy esantoan a panbiyag. 8 Isonga, sema toon eg to piyan a mengonod iren ja bili-bilin, nat tooy binekan to, no diket si Afo Chiyos a engi-kan na Ispirito Santod si-kathayo.9 Niman, maypangkep na semek jod echom jon naemati, nagwara wiy mesepol a isolat mid si-kayo tep intoroan to kayon Afo Chiyos a mansisinemek. 10 Et inbiybiy jo nowan i semek jod emiin a naematid intiron probinsiya na Macedonia. Nem aahik, pangpangaasi yo, itolo-toloy jon sesmeken pay i echom jo. 11 Mapteng no mekiolnos kayo tan eg jo biyangan i naimag na echom jo. Mesepol pay a masdo kayon man-obda say gwariy panbiyagan jo a inges toy kigwan mid si-kayo nontan. 12 Tep no seman na olay a ema-emagen jo, rispiktaren cha kayo na toon nat naemati, tan nagwara pay i panchinelan jo na mesepol jo.
Sema Mepesamak Ired Ma Ematin Iyangketiy Da
13 Aahik, piyan min amtaan joy podno maypangkep iren ma ematin iyangketiy mala say eg kayo ma-ngos a chilin inges toy toon nagwariy namnama ra i sema ahi ren etiy, mayka-chom cha Jesus a gwared dangit. 14 Napiyati thayo i etiy si Jesus et iyanpawil. Isonga, patien tayo koma i panpawil pay Afo Chiyos i tothoon iyangketiy a emati, et ipakadgwen Afo Chiyos si Jesus ali ched ma tothoo no on-oli di mowan.
15 Gwara pay i inpaamten Jesus a Afo thayod si-kawi maypangkep na ioli tho din konen mid si-kayo. Si-kathayon sibibiyag no on-oli dis Jesus, nat medebas kiyen mengaspol cha si-katho iy say sema iren iyangketiy a ematid si-katho. 16 Tep no seman alin akow, onsa-kod si Jesus alid dangit iy maramen onkeljaw i esel a manbilin tan onkeljaw pay i afo na anghilis tan mapkes aliy trompiten Afo Chiyos. No mekcheng mala man, sema iyangketiy a ematid Jesus, manpawil nin ira. 17 Et si-kathayon sibibiyag pay, mayka-chom kiya ngod si-kara, et onkayang kiyen emiin say maaspol si Jesus a Afo thayod kolpot a gwared iyaykayang. Et kadgwaen tayos Jesus a Afo thayo na ingked ingka. 18 Isonga, ipalagip jo na olay cha echom jo ma toro-toro say pekedsang joy nemnem cha.