Mansagana Kiya Koma Na Ioli Din Jesus A Afo Thayo
5
Aahik, nagwara waliy mesepol a isolat mid si-kayo maypangkep na timpo na ioli din Jesus a Afo thayo. 2 Tep amta yo wala i biglen onmothok si Jesus a inges toy nainmothok na mahibot na kalebian. 3 Mepesamak iyay no kin na too i etalnay emiin tan nagwariy chanagan cha. Et biglen onmothok i chosa ren inges toy biglen sahit na biin chanchanin man-anak. Et eg cha baalan a bebtihan iwa chosa.4 Nem si-kayon aahik, nagwara kayod kawad-an na enbolinget a inges to ira ma nat emati. Isonga, eg kayo koma mekibtot no onmothok i akow na ioli din Criston inges toy biglen imothok na mahibot. 5 Tep naiyan-iyan kayod kawad-an na silow tan kaakawan. Eg kiya naiyan-iyan cha kawad-an na enbolinget tan kalebian. 6 Isonga, eg tayo koma onoran ira ma toon eg emati tep singen manjo-jo-kow ira, no diket mansagana kiya koma tan maytifel i piya-piyan na angel tayo. 7 Tep kalebian i timpo na ijo-kow na too, tan kalebian pay i timpo na nainpanbotheng na too. 8 Nem si-kathayo, naiyan-iyan kiyed kawad-an na kaakawan, isonga itifel tayoy piya-piyan na angel tayo. Memasig kiyen memati-patid Cristo tan memasig kiya pay a menmek na echom tayo tep sema pamati tan semek, inges toy isa-din na solcharod pahow to. Mesepol pay ngon maytoloy a menamnamiy kaysalakanan tayo tep sema namnama thayo, singen bistohol na solcharo. 9 Tep nat pinispis to kiyen Afo Chiyos say da-kaman tayoy chosa tho, no diket pinispis to kiya say isalakan to kiya babaen Jesu Criston Afo thayo. 10 Tep etiy si Cristo para cha si-kathayo say angken sibibiyag pay ono etiy kiya na ioli tho di, mekiiyan kiyed si-katho. 11 Isonga, pekedsang joy nemnem na echom jo tan pekedsang joy pamati ren inges toy jowan amaga wa.
Sema Kaonoran A Bilin Paul Ired Ma Ematid Thessalonica
12 Niman ma, aahik, gwara pay i konen mid si-kayo. Pangaasi yo rispiktar jo ira ta toon naengibalnay cha si-kayon naemati. Tep masdo iren naiyan-obda para cha Afo Chiyos, tan pinispis iren Afo Chiyos a mengitorong tan memidin cha si-kayo. 13 Pategi yo iren chili tan semek jo ira tep naiyan-obda ira para cha panmaptengan jo. Pankikinompas kayo.
14 Gwariy sa-ki pay a konen mid si-kayon aahi wi. Ibonget jo ira ma toon iyangkesarot say man-obda ira. Pekedsang joy nemnem na tothoon iyangkedismaya, tan tolongi yo ira ma ekapsot i pamati ra. Anosi yo iren emiin. 15 No gwariy mengemag na ngaaw cha si-kayo, enog i bales, no diket mapteng na olay i a-magen jod echom jo tan emiin a tothoo.
16 Chadsak kayo na olay, 17 itolo-toloy jon mankararag, 18 tan angken nengoy mepesamak cha si-kayo, pansalamat kayod Afo Chiyos. Amag jo ira jay tep sejay i piyan Afo Chiyos kagol na ingkayka-chom jod Cristo Jesus.
19 Enog i tiniped i obda na Ispirito Santo. 20 Enog i dinisjon i konen na toon inpaamten Afo Chiyos cha si-katho. 21 Nem paras jo nin a emiin iwa in-insel cha say amtaan jo no podnon edafod Afo Chiyos. Petpeti yo ma mapteng. 22 Benegi yoy emiin a ekilasin ngaaw.
23 Sapay koma si Afo Chiyos a naengi-kan na talna, ipasanto tho kayon pasiya. Tan sapay koma bantayan toy nemnem jo tan ispirito yo tan angel jo say nagwariy maypabasol cha si-kayo no on-oli di mowan si Jesu Criston Afo thayo. 24 Si Afo Chiyos a emispis cha si-kayo, naepiyal et a-magen to ira jay.
25 Aahik, pangaasi yo ikararagi yo kawi.
26 Komostai yoy aahi thayod tan a mengibiybiy na pansisinemek jo.
27 Babaen na karebengan kon in-i-kan Criston Afo thayo, bidinen tahejo i besaen jo jay a solat ired ma emiin a aahi tayod tan.
28 Sapay koma gwared si-kayoy kaasin Jesu Criston Afo thayo.