3 Nonta chanchanin ondayathak cha Ephesus say onkowanak cha Macedonia, kigwan taha i on-eket ked Ephesus. Niman kowan ipidgwed si-kam mowan i kigwan ko nontan. Itoloy mon man-iyan cha Ephesus tep igwan iriy naengitoro na nat podno tan mesepol a konen mo i isalcheng cha. 4 Kowan mo pay cha si-kara i nat tabtabtabalen cha komiy is-istoriya na too nontan den nat podno tan sema iren enchokiy a tonton na afo-afo ra la tep say panpa-noan to, mansosongbat ira. Seman ira, nagwariy itolong tod pantongpalan na planon Afo Chiyos tep sema pesing tayon pengamta tan pengonod na plano tho, babaen na pamati. 5 Kowan ibilin ira jay say mansisinemek ira ma naematid tan. Say naedafoan nitha semek, edinis a nemnem, edinis a konsinsiya, tan ainposoan a pamati. 6 Sema echom a too, imaragwi ired jay, tan say naimag cha kitdi, natiyabtabal cha ira ma nagwariy silbi tho. 7 Piyan chen mantoro na dinteg Afo Chiyos, angken nat egwathan cha i nakigwan cha tan sema banag na naintoled chen naintoro.

8 Amta thayo i mapteng i dinteg Afo Chiyos, no sema toon naengoqsal ket, kostoy pengosal to. 9 Sema inpangamag Afo Chiyos na dinteg, nat para cha toon naengamag na mapteng, no diket toon naengamag na ngaaw. Sema iren naengamag na ngaaw, si-kara ira ma naenaral na dinteg tan sema iren nat piyan chen patien iriy gwariy karebengan to, sema iren nat piyan chen manchejaw cha Afo Chiyos tan sema iren mabesol, sema iren nat naiyanrispiktar cha Afo Chiyos tan sema iren naiyandamsis iren ma maypangkep Afo Chiyos, sema iren naemono na awecha tan inecha tan sema iren naemono na echom cha. 10 Mesepol ngoy dinteg Afo Chiyos kagol iren ja tothoo: sema iren naenarog na nat imbaliy cha, sema iren dalekin naenarog na echom chen daleki tan sema iren bibiin naenarog na echom chen bibii, sema iren naiyanmet na too say panbedin cha na bagaen, sema iren naiyan-itek tan sema iren naengisangba na nat podno, tan emiin iren ma naengontra na podnon toro-toro. 11 Sema podnon toro-toro, naedafod mapteng a chamag. Si Afo Chiyos a kahejangan a echayaw, inpiyal tod si-kak iwa mapteng a chamag say ipaamtak cha echom.

12 Mansalamathak cha Cristo Jesus a Afo thayon engikedsang cha si-kak say mebedin a a-magen ko ja obda tep inbilang toak a naepiyal a too tan chiyotohan toak a mansilbid si-katho. 13 Imag Cristo man angken nontan kigwan koy ngaaw maypangkep cha si-katho. Inpadiga-digat ko ira ma ematid si-katho, tan nabiyai-baingan ko ira ngo. Nem angken ima-imag ko ira man, kiyaasian toak ngorechan Afo Chiyos tep ekak nin emati, isonga ekak amta i ngaaw i naimag ko. 14 Epaladoy kaasin Afo Chiyos a inbiybiy tod si-kak tep in-i-kan toy pamatik cha Cristo Jesus tan semek kod echom ko. Sema pamati tan semek, si-kathoy nain-i-kan Afo Chiyos cha emiin a iyayka-chom cha Cristo Jesus. 15 Seja konen ko ket, podnon toro, et patien koma na emiin a too. Seja podnon toro, kigwan to i kimowan alis Cristo Jesus chiya dobong say isalakan toy managbasol. Et dagedak cha si-kara. 16 Et say kagol na engaasian Afo Chiyos cha si-kak, say mebedin a ibiybiy Jesu Cristo i anos ton nagwariy pengingkaan to babaen na pan-anos tod si-kak a daged ired ma mabesol. Inpanbalin toak Afo Chiyos a singen arig say egwathan na too i anosan ngo pay iren Cristo, et say no memati ired si-katho ket, gwared si-kariy biyag a nagwariy pengingkaan to. 17 Isonga, si Criston Arin nagwariy pengingkaan na pantorayan to, sapay koma merispiktar tan mechejaw na ingked ingka. Si-katho bengat i Chiyos a sema nat mesi-neng a nat meti-metiy. Amen.

18 Timothy, si-kam a singen anak ko, seja iren kowan ibilin cha si-kam, inges toy iyaypadto maypangkep cha si-kam nontan. Nemnemnem mo tan a padto say ontoled ken mandaban na emiin a ngaaw. 19 Petpetim ithan a pamatim tan amag mo na olay i piyan Afo Chiyos say edinis aliy konsinsiyam. Tep igwan iriy toon naenaral na pamati ra tep inchorog chen engamag na amta ra i ngaaw. 20 Chegwa iren naenaral na pamati ra, si Hymenaeus tan si Alexander a in-awat kod Satanas say achalen chen nat konen chiy ngaaw maypangkep Afo Chiyos.