Sema Maypangkep Na Panchejaw No Mesa-sa-nop Ira Ma Naemati
2
Gwara pay i ibilin kod si-kam. Pilmiro, mesepol a ikararagan tayoy emiin a too. Kekchegwen tayo koma i tolongan iren Afo Chiyos, tan mansalamat kiya ngo komed Afo Chiyos kagol na mapteng a naima-imag tod si-kara. 2 Ikararagan tayo koma ngo iriy ari tan emiin a echom a gwariy karebengan to say etalna tan aolnos i biyag tayo. No a-magen tayo man, a-magen tayoy piyan Afo Chiyos tan mapteng i a-magen tayod echom tayon too. 3 No mankararag kiyen inges to man, mapteng tan si-kathoy panchadsahan Afo Chiyos a engisalakan cha si-kathayo. 4 Tep piyan Afo Chiyos a maysalakan i emiin a too, tan piyan to ngo i amtaen cha i podnon toro-toro maypangkep cha si-katho. 5 Tep sa-ki bengat i Afo Chiyos, tan sa-ki ngoy naengitakchel na emiin a tood sangoanan Afo Chiyos. Si-kathos Cristo Jesus a iyanbalin na too 6 a engi-kan na angel ton metiy say si-kathoy kasa-dat na emiin a too et say nat mechosa ira kagol na basol cha. Epasamak iwan nonta koston timpon pinispis Afo Chiyos. Tan sema imag Cristo, si-kathoy engipaamta i piyan Afo Chiyos a maysalakan i emiin a too. 7 Seman ngoy kagol na emispisan Afo Chiyos cha si-kak a manbalin a apostolis. Into-no thoak a mankasaba maypangkep na kaysalakanan ired ma Gentiles. a Piyan to i itorok i podnod si-kara say patien cha. Podno ja kowan kona. Nat man-ii-tekak.8 Isonga, say piyan ko, dalekiy mengibalnay na pankararag cha emiin a dogad a naesa-nofan na naematin manchejaw. Nem sema iren daleki, esantoan koma ira, tan nagwara koma ngoy ibonget cha tan songbathan cha no ikayang chiy diwa ren mankararag.
9 Say bibii ngo, say piyan ko, manbaro ira na iyaybagay cha bibiin disinti tan mapteng i ogadi ra. Nat paladoen cha komay pan-arti na bowek cha, tan nat manbaro koma ira na palit. Nat man-osal pay koma ira na iyangkebanol a arti na angel cha. 10 Tep sema kinamapteng na bii, nat mesi-neng cha naiyosal ton palit, no diket cha naimag ton mapteng a iyaybagay cha biin naengowan i naematid Afo Chiyos. 11 On-eket koma iriy bibii no gwariy mankakasaba na esel Afo Chiyos say man-achal ira, tan ibaba ra komay angel ched mantotoro. 12 Ekak naintolok i bibiiy mantoro ired ma daleki tan mengitoray cha si-kara. On-eket koma ira bengat. 13 Tep nonta piyarsowen Afo Chiyos i too, si Adam i digwas to, et inpan-onod tos Eve. 14 Et nat si Adam i siyaol Satanas, no diket sema biin si Eve. Isonga, biiy edagwas a iyanbasol cha Afo Chiyos. 15 Isonga egwathen koma na bibiiy obden in-i-kan Afo Chiyos cha si-karen inges to ma pan-anak. Maysalakan ira ngo no itolo-toloy chen mematid Cristo, sesmeken chiy echom cha, onoran chiy esantoan a panbiyag, tan singpeten chen emiin i naimag cha.