3 Naiyansalamathak cha Afo Chiyos a naiyansilbian ko na edinis a konsinsiyen inges toy inpansilbi na afo-afok da. Naiyansalamathak kagol cha si-kam na nainpankararag ko para cha si-kam na gwiya-gwa-gwa tan diyabi-dabi. 4 Iya-sawak a pasiyed si-kam, agdalo no nemnemnemen koy nangis mo nonta dimayathak ma alid tan. Isonga piyan kon pasiyen si-nengen taha mowan say mechadsahanak. 5 Naniyemnem ko ngoy ainposoan a pamatim, tan nagwariy chegwa-chegwak a sema pamatim, inges toy pamati na lolam a si Lois tan inam a si Eunice. Edagwas i pamati ra iy say si-kam, et niman sema pamatim, inges toy pamati ra. 6 Isonga kowan kona mowan cha si-kam i osalen mon chiliy daing a in-i-kan Afo Chiyos cha si-kam nonta insagpat koy diwak cha si-kam. ^a 7 Tep in-i-kan Afo Chiyos i Ispirito Santod si-kathayo, nat say ontahot kiya, no diket gwariy kabaalan tayon mansilbid Afo Chiyos tan sesmeken tayoy echom tayo tan itifel tayoy piyan na angel tayo.

8 Isonga, enog i baing a menistigo maypangkep Cristo Jesus a Afo thayo. Enog ngoy inbaingak tep iyaykalebosak ma kagol na pansilbian kod Cristo, no diket pekida-kam kayo na digat a nadiya-kaman tayo kagol na pankaskasabaan tayo na mapteng a chamag. Pekedsang token Afo Chiyos say mebedin a ano-anosan mo ira man a digat. 9 Insalakan to kiyen Afo Chiyos, tan pinispis to kiya say manbalin kiyen esantoan a tothoo tho. Say kagol na engamagan ton man, nat sema ima-imag tayo, no diket sema plano thon onkaasid si-kathayo. Tep nonta aneng parsowaen Afo Chiyos iya dobong, niyemnem to walen kaasian to kiya kagol Cristo Jesus. 10 Et niman inbiybiy Afo Chiyos cha si-kathayoy kaasi tho tep kimowan alis Cristo Jesus a mengisalakan cha si-kathayo. Igwak Cristoy panakabalin na pathiy, et inpaamta tho i sema iren memati na mapteng a chamag, gwara did si-kariy biyag a nagwariy pengingkaan to. 11 Et pinispis toak Afo Chiyos a manbalin na apostolis say ikasabak tan itorok iyay a mapteng a chamag. 12 Setan i kagol na naedigathan ko niman. Nem nat onbaingak ma tep amtak i sema naengipiyalan ko, si Afo Chiyos, tan sigoradoak i gwariy panakabalin ton manbantay niya obden inpiyal tod si-kak ingkatho did akow a pan-oli din Cristo.

13 No mantoro ka, koston onorim i podnon intorok cha si-kam. Ibiybiy mo ngoy pamati tan semek a in-i-kan Cristo Jesus ired ma iyayka-chom cha si-katho. 14 Bantayim i epateg a toron inpiyal Afo Chiyos cha si-kam say nat mesa-sa-dathan. Amag mo jay babaen na panakabalin na Ispirito Santon naiyan-iyan cha si-kathayo.

15 Amtam i gwa-gwa-chen naematid Asia, binekan chaak, pati si Phygelus tan si Hermogenes. 16 Nem sapay koma kaasian Afo Chiyos si Onesiphorus, pati pamilja tho tep nainpakedsa-kedsang to na olay i nemnem ko. Nat inbaing toy ingkaykalebos ko. 17 Tep nonta mimothok chiya Roma, ina-inap toak ingkathod sipol toak. 18 Sapay koma kaasian Afo Chiyos si Onesiphorus no akow ali na pengowis to na tothoo. Tep amtam ngo i banay i tolong tod si-kak nonta gwaraak chithed Ephesus.