Mesepol A Nat Pabasolan Tayoy Sa-ki Tan Sa-ki
14
No gwariy toon ekapsot i pamati tho, awat jo, et enog i siyongbathan no afil i pengegwat tod si-kayo. 2 Kaspangarigan, sema sa-kin too, patien to i kosto no mengan na kompormi, nem sema echom a toon ekapsot i pamati tho, naengan na natnateng bengat. 3 Sema naengan na kompormi, mesepol a eg to disjonen i naengan na natnateng bengat. Et sema naengan na natnateng bengat, mesepol a nat ibasolan toy naengan na kompormi tep igwat ngon Afo Chiyos. 4 Siya ka ngon mengibasol na bagaen na echom? Afo tho bengat i gwariy karebengan ton mengowan no mapteng ono ngaaw i naimag na too. Et sema naimag to, podnon mapteng tep sema Afo thon si Cristo, gwariy panakabalin ton menolong.5 Sema sa-kin too, nainbilang toy sa-kin akow a mas epateg iy say echom a akow. Nem sema echom a too, nainbilang to i iyan-iinges i kapateg na akow. Say sa-ki tan sa-ki, mesepol a sigoradoen to no nengoy koston ma-mag maypangkep niyay. 6 Sema toon naengibilang na sa-kin akow a mas epateg, naimag to man say chejawen toy Afo. Sema ngon toon naengan na kompormi, naimag to ngo man say chejawen toy Afo tep mansalamat cha Afo Chiyos maypangkep na nakiyakan to. Angken sema ngon toon nat naengan na bohi, naimag to say chejawen toy Afo tep mansalamat ngod Afo Chiyos. 7 Nat manbiyag kiya para cha chayaw tayo bengat, tan nat metiy kiya para cha chayaw tayo bengat. 8 Nem no manbiyag kiya, manbiyag kiyen manchejaw cha Afo, tan no metiy kiya, metiy kiyen manchejaw cha Afo. Isonga, no manbiyag ono metiy kiya, kegwen to kiya na Afo. 9 Tep say kagol na ingkathiy Cristo tan inpanpawil to ket, say si-katho diy Afo iren ma sibibiyag tan sema iren iyangketiy. 10 Apay nga jowan ibasoliy ahi yod pamati? Tan apay nga jowan disjonay ahi yod pamati? Tep on-akgwat kiyen emiin cha sangoanan Afo Chiyos, et kowisen to kiya cha 11 tep iyaysolat cha esel Afo Chiyos i:
“Kigwan na Afo i ‘Sejay a kowan kona, podno.
Mantalimohod a emiin i tood si-kak.
Tan konen na emiin a too i si-kak si Afo Chiyos.’ ” a
12 Isonga, si-kathayon emiin, mesepol a songbathan tayod Afo Chiyos i maypangkep na imag tayo.
Mesepol A Eg Tayo Solisogen I Echom
13 Isonga, mesepol a nat maybasolan miy sa-ki tan sa-ki, no diket menemnem komay ma-mag say nagwariy ma-mag a onsaol ono onsolisog na ahi thayod pamati. 14 Kagol a ekisa-kiak cha Jesus a Afo thayo, sigoradoen ko i nagwariy mekan a ensekig. Nem no patien na too i gwariy mekan a ensekig, ensekig med si-katho. 15 No ensahit i nemnem na ahi yod pamati kagol na nakiyakan jo, nat jowan ibiybiy miy semek cha si-katho. Isonga, enog i intolok a sema nakiyakan jo, chechalen toy pamati tho tep etiy si Cristo para cha si-katho. 16 Say naimag jo, no ibilang na echom jon ngaaw, angken amta yo i mapteng, isalcheng jo say nat konen cha i ngaaw i naimag jo. 17 Tep say ainportantid pantorayan Afo Chiyos, nat sema pengan tan pan-inom, no diket chonong, talna, tan chadsak a naedafo did Ispirito Santo. 18 No sejay i pesing tayon mansilbid Cristo, egwathen to kiyen Afo Chiyos, tan apolbaran cha kiya na too. 19 Isonga, ma-nosan a ma-mag ira man a mengitorong cha pansa-sa-ki thayo tan mengikedsang na pamati na sa-ki tan sa-ki. 20 Enog i chichal i niyan-amagen Afo Chiyos cha biyag na echom jo kagol na mekan. Sema emiin a mekan, edinis, nem ngaaw ngo no sema nakiyakan jo, panbasolan na echom jo. 21 Mapteng no nat mengan kiya na bohi tan menginom na adak tan nat mengemag na kompormin panbasolan na ahi tayod pamati. 22 Angken nengoy patien jo maypangkep iren jay, mesepol a si-kayo tan si Afo Chiyos bengat i mahaamta say nat ensahit i nemnem iren ma afil i pengegwat cha. Sema toon edinis i konsinsiya tho no patien to i kostoy towan amaga, kaimdeng. 23 Nem sema manchegwa-chegwa i mapteng iwa mekan, manbesol no kakanen to ngorechan tep napiyati tho i ngaaw. Tep no manchegwa-chegwa kiya i kostoy ma-mag, nem a-magen tayo ngorechan, basol iwan.