Mesepol A Man-iinawat Kiya
15
Si-kathayon mahedsang i pamati tho, mesepol a ma-nosan i iyankolangan iren ma toon ekapsot i pamati tho. Mesepol a nat paimdeng tayoy angel tayo. 2 Si-kathayon emiin, mesepol kitdin paimdeng tayoy echom tayo, tan a-magen tayoy panmaptengan cha say pekedsang toy pamati ra. 3 Tep si Cristo ket, nat paimdeng toy angel to, no diket imag toy piyan Afo Chiyos. Tep iyaysolat cha esel Afo Chiyos maypangkep Cristo i “Sema ngaaw a kigwan na tothoo maypangkep cha si-kam, Afo Chiyos, pichas ko ngo.” a 4 Emiin a iyaysolat cha esel Afo Chiyos nontan da, iyaysolat say toroan to kiya. Tep babaen na esel Afo Chiyos, nakiyaya thayon enosan i digat tan pekedsang toy nemnem tayo say maytoloy a namnamaen tayoy emiin a inkarin Afo Chiyos. 5 Si Afo Chiyos a naedafoan na anos tan kedsang na nemnem, sapay koma si-kathoy ontolong cha si-kayo say man-iinawat kayon inges toy ogadin Cristo Jesus. 6 Et no seman ma, mansa-sa-ki kayod panchejaw cha Afo Chiyos a Chiyos tan Awen Jesu Criston Afo thayo.7 Isonga, pan-inawat kayon inges toy inpangawat Cristod si-kayo say mechejaw si Afo Chiyos. 8 Tep konen kod si-kayo i kimowan alis Criston ontolong ired ma Hodjos say ibiybiy to i podnoy kigwan Afo Chiyos. Tep kimowan alis Cristo say tongpalen toy inkarin Afo Chiyos ired ma afo-afo la na Hodjos. 9 Tan kimowan ali ngo say chejawen iren ma Gentiles si Afo Chiyos kagol na kaasi thod si-kara. Tep iyaysolat chiwan a esel Afo Chiyos i:
“Isonga, mayka-chomak cha Gentiles a manchejaw cha si-kam.
Mankansiyonak na panchejaw cha si-kam.” b
10 Kigwan to ngod man i:
“Si-kayon Gentiles, pekiimdeng kayo ired toon Afo Chiyos.” c
11 Sa-ki pay, kigwan to i:
“Si-kayon emiin a Gentiles, chayaw joy Afo.
Si-kayon emiin a too, chayaw jo.” d
12 Et gwara ngoy kigwan Isaiah a:
“Igwa ngo aliy polin Jesse a onkowan ali,
itorayan toy Gentiles
tan si-katho diy pannamnamaan cha.” e
13 Si Afo Chiyos a naedafoan na namnama tayo, sapay koma i-kan toy banay a chadsak tan talna cha si-kayo kagol na pamati yod si-katho say sema namnama yod si-katho, onkedkedsang pay babaen na panakabalin na Ispirito Santo.
Sema Obden In-i-kan Afo Chiyos Cha Paul
14 Aahi, nagwariy chegwa-chegwak i mapteng i ogadi yo. Egwathan jon chiliy maypangkep na pamati thayo, tan mebedin a manbibinidin kayo. 15 Nem gwara pay iriy intoled kon insolat chiyay say eg jo dingdingen. Igwan i karebengan kon man-a-sel cha si-kayon inges to jay kagol na obden in-i-kan Afo Chiyos cha si-kak. 16 Tep pinispis toak a mansilbi cha Cristo Jesus say tolongan ko ira ma Gentiles. Singen pariak a naiyankasaba na mapteng a chamag Afo Chiyos ired ma Gentiles. Naimag ko man say egwathen iren Afo Chiyos a singen tangdal a inpasanto na Ispirito Santo. 17 Isonga, angken amtak i nat onpahi-tehak koma, iki-tek ko ngorechan i obdak para cha Afo Chiyos tep biyaelan ko bengat a ima-imag ko man tep ekisa-kiak cha Cristo Jesus. 18 Tep nat iki-tek koy ima-imag kon mismo, no diket sema ima-imag Cristo bengat babaen cha si-kak say egwisen Cristo iriy Gentiles a onpatid Afo Chiyos. Imag to man babaen na kigwan ko tan imag ko, 19 babaen na toray na kaskasdaaw a sinjal tan milagro, tan babaen na panakabalin na Ispirito Santo. Isonga, kincheng koy obdak a mankasaba na mapteng a chamag maypangkep cha Cristo manchogid Jerusalem ingkathod Illyricum. 20 Say pangkep ko na olay, mankasabaak na mapteng a chamag ired man a dogad a nat inki-ngelan na too nin i maypangkep Cristo. Tep say obdak, nat sema menobtob na inchogi wala na echom. 21 No diket kowan tongpalay iyaysolat cha esel Afo Chiyos a:
“Sema iren nat iyaygwanggwanggwangan maypangkep cha Cristo, si-nengen cha.
Sema iren nat iyanki-ki-ngel maypangkep cha Cristo, egwathan cha.” f
Sema Planon Paul A Manbisita Iren Ma Ematin Gwared Roma
22 Kagol na chakel a siyodad i naiyankasa-kasabaan ko, eminchakel a etaktahak a onkowan ded ta kad-an jo. 23 Nem niman nagwara wiy obdak ired ja sahop, tan kagol na chakel den tawen i piyan kon onkowan chitha kad-an jo, 24 namnamaen kon mebedin a si-nengen tahejo no onchalanak cha kad-an jo no manbiyakiak cha Spain. No mekiadibayak cha si-kayo na kemtang, mebedin a cha-chaan joak a mengitoloy na biyahik. 25 Nem niman onkowanak nin cha Jerusalem a mengitolod na tolong ired ma toon Afo Chiyos chiwan. 26 Tep sema iren naematin gwared Macedonia tan cha Achaia, ena-nop ira na tolong para cha iyangkebitheg a naematin gwared Jerusalem. 27 Kaimdeng iren ontolong. Et iyaybagay a a-magen cha man tep singen aothangan ired Hodjos. Tep kagol na Hodjos, ekika-chom miy Gentiles cha si-kara maypangkep na aispiritoan a bindisjon Afo Chiyos. Isonga, ontolong ngo komay Gentiles na mesepol cha. 28 Et no kekchengen ko wala jay, a piyan kon a-seden, no i-kan ko wala ired ma Hodjos i tolong a esa-nop, onchalanak chitha kad-an jo no manbiyakiak ded Spain. 29 Et amtak i no onmothohak ded ta kad-an jo, kenasen tayoy esolok a bindisjon a naedafod Cristo.
30 Aahi, ijay i ibagak. Kagol Jesu Criston Afo thayo tan kagol na semek tayod sa-ki tan sa-kin in-i-kan na Ispirito Santo, pangaasi yo, kayka-chom kayod si-kak a mankararag i tolongan toak Afo Chiyos. 31 Pankararag kayo i sema iren nat naematid Judea, eg chaak sogathan. Pankararag kayo ngo i sema toon Afo Chiyos cha Jerusalem, on-imdeng iren mengegwat na tolong a itolod kod si-kara. 32 Et no mekcheng ma, no piyan Afo Chiyos, banay i chadsak ko no onsagwiak ded ta kad-an jo. Et sema panbisitak cha si-kayo, badoan toy kedsang ko. 33 Sapay koma ta si Afo Chiyos a naengi-kan na talnay gwared si-kayon emiin. Amen.