Mesepol A Mepati Ira Ma Gwariy Karebengan To
13
Emiin a too, mesepol a patien chiy gwariy karebengan ton mantoray. Tep nagwara wiy karebengan to ampet itolok Afo Chiyos iwan. Sema iren gwariy karebengan to, si Afo Chiyos i engitakchel cha si-kara. 2 Isonga, sema mengontra ired ma gwariy karebengan to, kontraen to ngos Afo Chiyos tep si Afo Chiyos i iyanchotok cha si-kara. Et sema mengontred si-kara, mechosa. 3 Tep sema naengamag na mapteng, nat si-kathoy entahot ired ma gwariy karebengan to, no diket sema naengamag na ngaaw. Isonga, no nat piyan jon entahot ired ma gwariy karebengan to, amag joy mapteng et chejawen cha kayo. 4 Tep sema iren gwariy karebengan to, bagaen iren Afo Chiyos para cha panmaptengan jo. Nem no a-magen joy ngaaw, mesepol a entahot kayo tep gwariy karebengan chen onchosa. Tep bagaen iren Afo Chiyos, et naiyosal iren Afo Chiyos a menosa iren ma naengamag na ngaaw. 5 Isonga, mesepol a mepati ira ma mantoray, nat chafot entahot kiyen mechosa, nem amta thayo ngoy koston ma-mag.6 Setan ngoy kagol a naiyanbayaran jo na binis tep sema iren mantoray, naiyansilsilbid Afo Chiyos babaen na penongpal ched obda ra. 7 Isonga, panbayad kayo na mesepol a bejaran jo. No binis, panbayad kayo na binis; no alos, pan-alos kayo. Et rispiktar jo tan chayaw jo ngo ira ma mantotoray.
Mesepol A Mansisinemek Kiya Cha
8 Enog i inbiyang i othang jo. Nem sema risponsibilidad jon mansisinemek, ibilang jo na othang a nagwariy pengingkaan to. Tep sema mahasmek na echom to, tiyongpal toy dinteg Afo Chiyos. 9 Kigwan tod ma bili-bilin na dinteg i “Enog i charog na nat imbaliy mo. Enog i bono. Enog i kibot. Enog i kiyamkaman i nat kegwen mo.” a Seja iren bili-bilin tan echom, iyaykasahiy chiya sa-kin bilin a: “Semek moy echom mon inges to ngoy penmek mo na angel mo.” b 10 Tep no ensemek tayoy echom tayo, nagwariy ngaaw a ma-mag cha si-kara. Isonga, no ensemek tayoy echom tayo, tiyongpal tayoy dinteg.
Sema Panbiyag A Maybagay Ired Ma Gwared Silow
11 Mesepol a a-magen jo jay tep egwathan joy banag na timpo niman. Amta yo ngo i niman i timpon ibangon a pansagana. Tep sema ketongpal na kaysalakanan tayo, mas iyay-esop ma iy say inpanchogi na inpanpamati thayo. 12 Singen chanchanin mekcheng i dagwi, et chanchanin onkowan aliy kaakawan. Isonga, mesepol a maysalcheng a mengemag na ngaaw a naiyay-anam cha enbolinget, tan may-almas i mapteng a naiyay-anam cha silow. 13 Mesepol a ma-mag i mapteng a may-anam cha toon naiyanbiya-biyag na kaakawan. Mesepol a nat mekika-chom kiya na ngalawngaw a kasa-sa-nofan tan nat manbothe-botheng kiya. Mesepol a nat mekibii-bii tan mekidahi-dahi kiya tan nat mengemag kiya pay na ensekig tan kababaing. Tan mesepol a nat mekibeka-bekal kiya tan nat on-apa-apal kiya. 14 Onori yo et i ogadin Jesu Criston Afo thayo say singen ibaro yo, tan enog i tiyongpal i ngaaw a kamkam na angel jo.