Chegwen Kilasin Kinachonong
10
Aahi, piyan kon chilin maysalakan i echom kon Hodjos, et setan i nainkararag ko na olay cha Afo Chiyos. 2 Amtak i nainpahat chen patien si Afo Chiyos, nem nat egwathan chen agpaysoy piyan to. 3 Tep nat egwathan chiy nainpasing Afo Chiyos a manpachonong na too, no diket nainparas chen onchonong babaen na naimag chen mapteng. Et isonga nat manpakombaba iren mengonod na pesing Afo Chiyos a mengipachonong na too. 4 Tep sema podno wa, si Cristoy engingkaan na dinteg say emiin a naematid si-katho, ibilang Afo Chiyos a maronong.5 Sejay i insolat Moses maypangkep na pengibilang Afo Chiyos na toon maronong kagol na pengonoran cha na dinteg. Kigwan to i “Sema toon naengonod na emiin a bili-bilin na dinteg, gwared si-kathoy biyag.” a Nem nat mebedin iyay tep nagwaren polos i mahaonod na emiin a dinteg. 6 Nem gwara ngoy iyaysolat maypangkep na pengibilang Afo Chiyos na toon maronong kagol na pamati red Cristo, et kigwan to i nat edigat. Kigwan to i “Enog i kigwan cha nemnem mo i ‘Siyay onkowan cha dangit’ ” say a-daen to dis Cristo iy kimowan mala. b 7 “Et enog ngoy kigwan i ‘Siyay onsa-kod cha kawad-an na etiy’ ” say ipawil tos Cristo iy iyanpawil mala. 8 Tep sema kigwan to, sejay: “Sema esel Afo Chiyos, iyay-esop cha si-kayo. Gwared nemnem jo tan mebedin a a-seden jo.” Sejay a esel Afo Chiyos, si-kathoy esel maypangkep na pamatid Criston nainkasaba wi. c 9 Tep no igwanggwang jo i si Jesus i Afo tan podnon napiyati yo i inpanpawil Afo Chiyos, maysalakan kayo. 10 Tep no podnon naematiy too, ibilang Afo Chiyos a maronong, tan no igwanggwang na tood echom i napiyati tho, isalakan Afo Chiyos. 11 Kigwan tod esel Afo Chiyos i “Emiin a naematid si-katho, nat mebaingan ira.” d 12 Nagwariy iyandasinan na Hodjos ired ma Greeks. e Si Afoy Afo na emiin, tan esolok i nain-i-kan to ired ma manbaged si-katho. 13 Tep kigwan tod esel a Afo Chiyos i “Emiin a mekikaasid Afo Chiyos, maysalakan ira.” f
14 Nem kas-anon manbagay tothood si-katho no eg ira naematid si-katho? Et kas-anon memati ired si-katho no eg cha inki-ki-ngelan i maypangkep cha si-katho? Et kas-anon mengi-ngel ira maypangkep cha si-katho no nagwariy mengikasabed si-kara? 15 Et kas-anon mengesabay tothoo no nagwariy mengito-nod si-kara? Nem igwan iriy into-non Afo Chiyos tep iyaysolat chiwa esel to i “Mapteng a pasiyay ikowan ali iren ma mankasaba niwa mapteng a chamag!” g 16 Nem nat emiin a tooy emati ira niwa mapteng a chamag. Tep kigwan Isaiah i “Afo, singen nagwariy emati na kigwan mi.” h 17 Isonga, memati wa iriy tothoo tep inki-ngelan chiy maypangkep Cristo, tan inki-ngelan cha tep iyaykasabay mapteng a chamag maypangkep Cristo.
18 Nem ijay i ibagak a: Sema iren Hodjos a nat emati, nat inki-ngelan cha emoy minsahin maypangkep Cristo? Inki-ngelan cha wango tep kigwan tod ma esel Afo Chiyos maypangkep iren ma naengikasaba i:
“Sema ese-esel cha, iyayki-ngelan cha intiron dobong,
tan sema kigwan cha, iyaypaamta waled emiin a soli na dobong.” i
19 Gwariy sa-ki pay a ibagak a: Sema iren Hodjos, eg cha emo igwathan i inki-ngelan cha? Igwathan cha wango, nem enbalaw chen patien. Tep sejay i iyaysolat cha esel Afo Chiyos. Pilmiro gwariy insolat Moses maypangkep na kigwan Afo Chiyos ired ma Hodjos a:
“Pan-aapal tahejo no bindisjonan ko ira ma kigwan jo i nat tribo ira.
Pebonget tahejo no tolongan ko ira ma nagwariy pengegwat ched si-kak.” j
20 Et gwariy intoled Isaiah a insolat a kigwan Afo Chiyos maypangkep na Gentiles a:
“Sema iren nat enganap cha si-kak, si-kariy enafol cha si-kak.
Sema iren nat iyanbaga maypangkep cha si-kak, si-kariy iyanparangan ko.” k
21 Nem maypangkep iren ma Hodjos a poli-polin Israel, kigwan Afo Chiyos i “Ebayag a in-okjad koy diwak cha si-kara, nem nat patien chaak tan benged ira.” l