Sema Maypangkep Iren Ma Hodjos a Nat Piyan Chen Mematid Cristo Jesus
9
Seja kowan koned si-kayo, podno. Kagol na iyayka-choman kod Cristo, ekak naiyan-itek. Sema konsinsiyak a naintorong na Ispirito Santo, napiyaneknekan to i kowan konay podno. 2 Ensahit a pasiyay nemnem ko, tan naebel-athanak na olay kagol na echom kon Hodjon nat naematid Cristo. 3 No mebedin, si-kak a mismoy mechosa tan maysi-jan cha Criston maysa-dat para cha bona-bonat ko say maysalakan ira. 4 Sema iren bona-bonat ko, poli-poli iren Israel a pinispis Afo Chiyos a too tho. Si-kariy inpanbalin Afo Chiyos a anak to. Inbiybiyan to na nihal na kinachiyos to. Tiyolag to tan in-i-kanan to na dinteg to. Intoroan to na pesing chen manchejaw cha si-katho, tan inkarian to ira. 5 Sema afo-afo ra liy ainportantin toon Afo Chiyos nontan da. Et si Criston mismo, iyay-anak a polin Israel, tan si-kathoy Criston Afo Chiyos a naiyantoray na emiin. Sapay koma mechejaw na ingked ingka. Amen.6 Nem angken chakel i echom kon Hodjos a eg ira naematid Cristo, nat piyan ton a-seden i nat tiyongpal Afo Chiyos i inkari tho ired too tho. Tep sema iren poli-polin Israel, nat podnon too iren Afo Chiyos a emiin. 7 Tan sema iren poli-polin Abraham, nat podnon poli-poli tho iren emiin. Tep kigwan Afo Chiyos cha Abraham i “Si Isaac bengat i kedepoan na poli-polim ali.” ab 8 Sema piyan niyay a a-seden, nat poli-polin Abraham a emiin i ibilang Afo Chiyos a aanak to. Sema poli-polin Isaac bengat tep si Isaac, si-kathoy anak a inkarin Afo Chiyos cha Abraham. 9 Tep sejay i inkarin Afo Chiyos i “No medebas miy sa-kin tawen, on-oliak ali et man-enak si Sarah na dahi.” c 10 Et nat sejay bengat i timpon inpaamten Afo Chiyos i pesing ton memispis iren ma mayka-chom cha si-katho. Gwara ngos Rebecca a epin i bechel to. Sa-sa-kiy awechen si Isaac a afo thayo la. 11 Sema pesing Afo Chiyos a memispis na tothoo tho, nat iyaybasar cha naimag cha, no diket chiwed pena-gway Afo Chiyos cha si-kara. Isonga, sema aanak Rebecca a si Esau tan si Jacob, d nonta nat iyay-anak pay laeng ira tan nagwariy imag chen mapteng ono ngaaw, 12 kigwan Afo Chiyos cha Rebecca i “Sema pangodowan, mansilbid orichiyan.” e 13 Iyaysolat a kigwan to pay i “Ensemek kos Jacob a orichiyan, nem enbalaw kos Esau a pangodowan.” f
14 Nengo ngarod i mekegwan? Piyan niyay ayen a-seden i nat maronong si Afo Chiyos tep pinispis toy sa-ki iy enchiy sa-ki? Enchi! 15 Gwariy karebengan Afo Chiyos a memispis na piyan ton pispisen tep kigwan tod Moses i “Kaasian koy piyan kon kaasian. Tan sesmekan koy piyan kon sesmekan.” g 16 Isonga, sema pesing Afo Chiyos a memispis na too, nat sema kagol na piyan na too ono sema naimag to, no diket sema kaasin Afo Chiyos. 17 Tep iyaysolat chiwa esel Afo Chiyos a kigwan Afo Chiyos cha Pharaoh i “Inpanbalin tahen ari say ibiybiy koy toray ko kagol cha si-kam et say maypaamtay ngaran kod intiron dobong.” hi 18 Isonga, kaasian Afo Chiyos i piyan ton kaasian, tan pebenged toy piyan ton pebenged.
19 Gwara emoy sa-kid si-kayon mengowan cha si-kak i “No seman ngarod, apay nga nainbasolan pay Afo Chiyos i tothoo? Tep nagwariy mahakontred si-katho.” 20 Enog i kigwan iwan. Siya ka ngo? Too ka bengat. Nengoy karebengan mon menongbat Afo Chiyos? Kosto aya no konen na banga cha engamag i “Apay nga imag moak na inges niyay?” 21 Sema naengamag na banga, gwariy karebengan ton mengemag na piyan to. Mebedin a a-daen toy sa-kin boknol a degdeg et mengemag na chegwen banga, sa-kin mapteng para maosal na ainportanti tan sa-kin nat mapteng para maosal na gwiya-gwa-gwa. 22 Inges tos Afo Chiyos. Igwan i karebengan ton mengemag na piyan to. Tep angken piyan Afo Chiyos a ibiybiy i bonget to ired ma iyaybagay a maomas tan piyan ton ipaamtay panakabalin ton menosed si-kara, iyanosan to et ma ira. 23 Iyanosan to ira tep piyan ton ibiybiy i banay a kinamapteng to ired ma kaasian to a sigod a insagana tho say da-kaman chiy kamaptengan a biyag cha dangit. 24 Et si-kathayo ira ma tiya-gway to, nat si-kawi bengat a Hodjos, nem si-kayo ngon Gentiles. 25 Tep sejay i inpasolat Afo Chiyos cha Hosea maypangkep iren ma Gentiles a:
“Sema iren nat took nontan,
si-kariy ngaranan kon ‘took’ niman,
Tan sema nat ensemek ko nontan,
si-kathoy ngaranan kon ‘ensemek ko’ niman.” j
26 “Tan chiwan a koston dogad a
kigwanan kod si-kara i ‘Nat too tahejo,’
mengaranan iren ‘aanak na sibibiyag a Afo Chiyos.’ ” k
27 Tan sejay i inkeljaw Isaiah maypangkep iren ma Hodjon poli-polin Israel a “Angken sema karakel na poli-polin Israel a inges toy pasil cha kilig na baybay, manmanoy maysalakan. l 28 Tep tongpalen Afo Chiyos i chosa thod tothood ja dobong, tan sema pesing to di, mageno tan kosto.” 29 Sejay ngoy inpadton Isaiah maypangkep na poli-polin Israel a:
“Si Afo Chiyos a manakabalin, no eg to kiya biyay-anan na poli-poli thayo,
aomas kiya komen emiin a inges toy tood Sodom tan Gomorrah.” mn
Nat Naematiy Hodjos Cha Cristo
30 Nengo ngarod i mekegwan? Say mekegwan, sema iren Gentiles a eg engipahat a onchonong cha nemnem Afo Chiyos, chimonong ira kagol na pamati red Cristo. 31 Nem sema iren poli-polin Israel a engipahat a engonod na dinteg Afo Chiyos say onchonong, eg cha piyosin tiyongpal i dinteg. 32 Niyana wango? Kagol na emiyalan cha na mapteng a naimag cha, nat sema pamati red Jesu Cristo. Isonga, iyanbasol ira maypangkep Criston singen bathoy iyaysokbaban cha. 33 Tep iyaysolat cha esel Afo Chiyos i:
“Si-neng jo, mengiamagak na bathod Zion a
mengisokbab na tothoon
mengi-kas cha si-kara. o
Nem sema naematid si-katho, nat mebaingan.” p