Kaasin Afo Chiyos Ired Ma Hodjos
11
Isonga, gwara pay i ibagak a: Binekan ayen Afo Chiyos ira ma too thon Hodjos? Enchi! Tep si-kak mismo, Hodjoak. Poli thoak Abraham tan iyaybilangak cha tribon Benjamin. 2 Nat binekan Afo Chiyos i too thon pinispis to nonta kapkapoanan. Sigoradon amta yoy kigwan tod esel Afo Chiyos maypangkep Elijah. Iyanriris Elijah cha Afo Chiyos maypangkep na naimag na tood Israel a kigwan to i: 3 “Afo, biyono ra iriy profitam, tan biyangbang chiy tangdalan ched si-kam. Si-kak bengat i ebay-anan et chiyan anafaak say bonoen chaak.” a 4 Nengoy insongbat Afo Chiyos cha si-katho? Kigwan to i “Igwan pay iriy pithon dibon took a ebay-anan a eg iyantalimohod a iyanchayaw cha Baal.” bc 5 Et inges to wa niman. Igwan iriy otik a Hodjos a naemati tep pinispis iren Afo Chiyos kagol na kaasi tho. 6 Isonga, sema nainpamispis Afo Chiyos na too, nat sema kagol na mapteng a naimag na too, no diket sema kaasin Afo Chiyos. Tep no pinispis Afo Chiyos i too kagol na mapteng a naima-imag niwa too, nat mebedin ngarod a mekegwan i kagol na kaasin Afo Chiyos iwan.7 Nengo ngarod i piyan niyay a a-seden? Sema iren Hodjon poli-polin Israel, nat sipol chiy kinachonong a chiyan ana-anafa. Sema otik a pinispis Afo Chiyos, si-kara bengat i enafol niwan. Nem sema echom, nat intolok Afo Chiyos a egwathan chiy podno. 8 Tep iyaysolat i:
“Ingkathod niman, inpajonget Afo Chiyos i nemnem cha;
kiyorab to ira say eg ira mahasi-neng,
tan tiyoleng to ira say eg ira mahaki-ngel.” d
9 Tan kigwan ngon David i:
“Sapay koma sema nakinas cha, manbalin a singen balchow tan saol.
Sapay koma si-kathoy kaysokbaban cha tan kechosaan cha.
10 Sapay koma mekorab i matha ra say eg ira mahasi-neng.
Sapay koma mebelbel-athan ira na olay na digat a singen naiyansakbat na kalken enbel-at.” e
11 Isonga, ibagak i: Kagol na iyanbenekan na Hodjos cha Cristo, maomas ira na ingked ingka? Enchi! Nem kagol na basol chen nat naemati, insalakan Afo Chiyos iriy Gentiles. Imag to man say on-apal ira ma Hodjos tan piyan cha ngon maysalakan. 12 Niman ma sema basol na Hodjos, iyanpa-nod chakel a bindisjon para cha dobong, tan sema kolang chen nat emati, iyanpa-nod chakel a bindisjon para ired Gentiles. Isonga, onchakel pay iriy bindisjon no emiin a Hodjos a pinispis Afo Chiyos, memati wa ira!
Kaysalakanan Iren Ma Gentiles
13 Niman si-kayon Gentiles, kowan koned si-kayo. Chiyotohan toak Afo Chiyos na apostolis say toroan tahejo, isonga napiyategan ko ja obdak. Nainpahat koy kabaalan ko 14 say sema iren echom kon Hodjos, on-apal et maynemneman ma ira say sema echom, memati komed Jesu Cristo et maysalakan ngo ira. 15 Tep sema inpanbeneg Afo Chiyos cha Hodjos, iyanpa-nod inpan-oli di na Gentiles cha si-katho. Isonga, sema pengegwat to na Hodjos a singen iyangketiy, manpa-nod panpawil cha. 16 Sema iren Hodjos, may-inges cha maydotho na tinapay. Say sa-kin bi-nik na maydotho, no maytangdal cha Afo Chiyos, kegwen ton emiin. May-inges ngoy Hodjos cha kejow. No maytangdal i damot tod Afo Chiyos, kegwen to ngo pay i panga tho.
17 Sema iren Hodjos, singen kejow iren olive a intanem Afo Chiyos a biyantayan to. Tan si-kayon Gentiles, singen kejow kayon olive a simimit bengat. Niman engetnos Afo Chiyos na panga na kejow a intanem to, et si-kayon singen panga na kejow a simimit bengat, intobtob to kayod ma kejow a intanem to. Isonga, mekibingay kayo wed ma deta tan damot niwan a kejow. Sema piyan niyay a a-seden, mekibingay kayod mapteng a inkarin Afo Chiyos ired ma Hodjos. 18 Nem enog i dinisjon iwa panga-pangen eketno. Nemnem jo et men panga-panga kayo ngo bengat, tan nat si-kayoy memadeg na damot, no diket sema damot i memadeg cha si-kayo. 19 Konen jo emo i “Ahow, nem kiyetnon Afo Chiyos ira ma panga-panga say maytobtob kawi et maysa-dat kawid si-kara.” 20 Podno tan, nem sema inpangetnon Afo Chiyos cha si-kara, kagol a nat emati ired Cristo, nem sema ingkaytobtob jo, kagol bengat a naemati kayod si-katho. Isonga, enog i pahi-tek, no diket tahoti yos Afo Chiyos. 21 Tep no kiyetnon Afo Chiyos iwa sigod a panga-panga, ketnoen to kayo ngarod ngo. 22 Nemnem jo i kinamapteng tan kinaistrikton Afo Chiyos. Sema iren nat ematid Cristo, inbiybiy tod si-kariy kinaistrikto tho nonta chiyosa tho ira, nem si-kayon naemati, inbiybiy tod si-kayoy kinamapteng to nonta kiyaasian to kayo. Et itoloy ton ibiybiy i kinamapteng tod si-kayo basta itoloy jon memati. Nem no eg jo itoloy, ketnoen to kayo ngo. 23 Et angken sema iren echom, no memati ired Cristo, itobtob iren Afo Chiyos mowan chiwa kejow a eketnoan cha tep igwed si-kathoy panakabalin a mengemag niwan. 24 Tep si-kayon singen panga-panga na kejow a olive a simimit bengat, no mebedin a itobtob to kayon Afo Chiyos cha kejow a olive a intanem to, angken afil a kejow, mas inam-ay pay a itobtob Afo Chiyos mowan i sigod a panga-panged ma kejow.
Sema Kaasin Afo Chiyos Cha Emiin A Tothoo
25 Aahi, ijay i piyan kon egwathan jon nat inpaamten Afo Chiyos nontan. Say kagol na pengipaamtaan kod si-kayo, say nat ondastog kayo tep si-kayon Gentiles i igwat Afo Chiyos, nat sema iren Hodjos. Say piyan kon egwathan jo, angken sema karakelan a Hodjos, enbalaw chen mematid Cristo niman, eg cha itolo-toloy na ingked ingka, no diket itolo-toloy cha bengat ingkathod sema iren Gentiles a naematid Cristo, metongpal i karakel cha. 26 Et emiin a Hodjos a pinispis Afo Chiyos, maysalakan ira. Tep iyaysolat cha esel Afo Chiyos i:
“Sema mengisalakan, medepod Zion;
a-kalen toy ngaaw cha poli-polin Jacob.” f
27 “Et seman i pantongpalan
na inkarik a a-kalen koy
baso-basol cha.” g
28 Sema iren Hodjos, nat naemati ira na mapteng a chamag, isonga kiyontra wa iren Afo Chiyos, nem say inpanpa-noan to, sema panmaptengan jo. Nem kagol na emispisan Afo Chiyos cha si-kara na tothoo to, on-onong i semek tod si-kara kagol iren ma kari thod afo-afo ra la nontan da. 29 Tep si Afo Chiyos, no gwariy toon pinispis to tan gwariy bindisjon a in-i-kan to, nat sa-sa-dathan to. 30 Si-kayon Gentiles, nontan da nat piyati yos Afo Chiyos, nem niman kiyaasian to kayon Afo Chiyos tep nat napiyati iren ma Hodjos si-katho. 31 Tan sema iren Hodjo, nat napiyati res Afo Chiyos niman say sema inpasing Afo Chiyos a mengaasid si-kayo, si-katho ngoy pesing ton mengaasid si-kara no sa-ki din akow. 32 Tep intolok Afo Chiyos a emiin a too, manbalin na balod kagol na basol cha et say kaasian to iren emiin.
Sema Chayaw Cha Afo Chiyos
33 Epaladoy kaasi tan daing tan pengamten Afo Chiyos! Nat mebedin a maamtay niyemnem to, tan nat mebedin a ma-gwathan i nainpasing to!
34 “Tep nagwariy mahaamta
na nemnem Afo Chiyos,
tan nagwariy mebedin a
memidin cha si-katho.” h
35 “Nagwariy engi-kan cha
si-kathon pan-othangan to.” i
36 Tep si Afo Chiyos i naedafoan na emiin, naengitorong na emiin, tan naengingkaan na emiin. Sapay koma mechejaw na ingked ingka. Amen.