Sema Kaysi-jan Tayod Toray Na Basol Babaen Na Biyag Cristo
6
Nengo ngarod i mekegwan? Maytolo-toloy ayen manbeso-besol kiya et say onda-da-to pay i kaasin Afo Chiyos? 2 Enchi! Tep no iyayka-chom kiyed Jesu Cristo, singen etiy kiya, et iyaysi-jan kiyed toray na basol. Isonga, nat mebedin a maytolo-toloy a manbeso-besol kiyen inges to nontan da. 3 Amta yo ngarod i no iyanbonjag kiya say maamtaan i ekika-chom kiya wed Cristo, singen ekipathiy kiya ngod si-katho. 4 Isonga, idi iyanbonjag kiya, singen ekipathiy tan ekibeka kiya ngod si-katho. Naepasamak iyay say on-onod kiya na badon panbiyag a inges tos Criston iyanpawil babaen na panakabalin Aweto.5 Tep no iyayka-chom kiyed Cristod ingkathiy to, mayka-chom kiya ngarod ngod si-kathod inpanpawil to. 6 Amta thayo i sema sigod a ogadi thayo, singen iyayka-chom cha Cristo nonta ingkaydansa thod koros say maomas i toray na basol cha si-kathayo et nat bagaen to kiya wa na basol. 7 Tep sema toon etiy, iyaydibchid toray na basol. 8 Kagol na ingkayka-chom tayod Cristod ingkathiy to, patien tayo i mayka-chom kiya ngod si-kathod bado thon biyag. 9 Tep amta thayo i si Cristo, iyanpawil tan nat meti-metiy mowan. Nagwara wiy toray na pathiy cha si-katho. 10 Etiy si Cristo say omasen toy basol. Kagol na kolpin ingkaomas na basol, nat meti-metiy si Cristo mowan. Niman ma sibibiyag say mansilbi tan manchejaw cha Afo Chiyos. 11 Isonga, si-kayo ngo, mesepol a ibilang joy angel jon etiy a singen nagwara wiy toray na basol cha si-kayo. Et ibilang jo wiy angel jon ebiyag mowan say mansilbi tan manchejaw kayod Afo Chiyos tep iyayka-chom kayod Cristo Jesus.
12 Isonga, enog i intolok i basol a mantoray cha angel jon metiy met laeng. Enog i piyati i ngaaw a kamkam a piyan na angel jo. 13 Enog i in-i-kan i kompormin parti na angel jod basol say maosal a mengemag na ngaaw. No diket ipasnek jon i-kan i angel jod Afo Chiyos tep singen etiy kayo et iyay-i-kanan kayo wa na badon biyag. I-kan jon emiin i parti na angel jod Afo Chiyos say maosal a mengemag na mapteng. 14 Tep say nat mantora-toray miy basol cha si-kayo tep sema naiyantoray med si-kayo, nat sema dinteg a emalod kayod basol, no diket sema kaasin Afo Chiyos a engidibchi kayod basol.
15 Nengo ngarod i piyan niyay a a-seden? Maytolo-toloy ayen manbeso-besol kiya tep nat sema dinteg a naiyantoray cha si-kathayo, no diket sema kaasin Afo Chiyos? Enchi! 16 Amta yo ngarod i no itolok joy angel jon manbalin na bagaen, bagaen to kayo niwa napiyati yo. Isonga, no basol i napiyati yo, sema panpa-noan to di, pathiy tan chosen nagwariy pengingkaan to. Nem no si Afo Chiyos i napiyati yo, sema panpa-noan to di, esantoan a panbiyag. 17 Mansalamathak cha Afo Chiyos a angken bagaen to kayo na basol nontan, niman enchi wa tep nainpasnek jon onoran i podnon toron iyaytorod si-kayo. 18 Iyaydibchi kayod basol tan iyanbalin kayo na bagaen na kinachonong. 19 Kowan iarig i bagaen say inam-ay a egwathan jo i kowan kona. Nontan in-i-kan jon emiin i parti na angel jod ensekig tan ngaaw, et sema iyanpa-noan to, miya-ma yo pay a engamag na ngaaw. Niman i-kan jon emiin i parti na angel jod kinachonong say sema panpa-noan to, manbalin kayo na esantoan.
20 Nontan iy bagaen to kayo pay na basol, kiyaya yon inbiyang a mengemag na mapteng. 21 Nengoy kiyongkona yo tep imag jo ira man a enbaing jo wa? Nagwaren polos! Tep sema panpa-noan iren man, pathiy. 22 Nem niman iyaydibchi kayod basol, tan iyanbalin kayo na bagaen Afo Chiyos. Sema kongkonaen jo, manbalin kayon esantoan, tan sema panpa-noan na kinasanto, biyag a nagwariy pengingkaan to. 23 Tep pathiy i dagbo na basol, nem sema rigalon Afo Chiyos, biyag a nagwariy pengingkaan ton iyay-i-kan cha si-kathayo kagol na iyayka-choman tayod Cristo Jesus a Afo thayo.