4 Aahi, inges to ngod si-kayo. Iyaydibchi kayod dinteg tep ekipathiy kayod Cristo. Niman mebedin a mayka-chom kayod Criston iyanpawil. Say panpa-noan na ingkayka-chom jod Cristo, esantoan a biyag para cha panchejaw cha Afo Chiyos. 5 Nontan iy napiya-piyati thayoy ngaaw a ogadi thayo, sema ngaaw a kamkam tayo, dima-da-to pay kagol na inpangamta thayo na dinteg. Tep angken nengoy iyayparit cha dinteg, si-kathoy piyan tayon a-magen. Sema panpa-noan na ngaaw a naima-imag tayo, pathiy. 6 Nem niman nagwara wiy karebengan na dinteg cha si-kathayo. Singen etiy kiya wa tan iyaydibchi kiyed dinteg a emalod cha si-kathayo. Isonga, sema pansilbi thayod Afo Chiyos, afil ma. Nontan da sema nainpansilbi thayod Afo Chiyos, babaen na pengiparas tayo a mengonod na sigod a iyaysolat a dinteg. Nem niman ma, sema nainpansilbi thayod Afo Chiyos ket, babaen na pengonod tayo na badon panbiyag a naedafod Ispirito.

7 Nengo ngarod i mekegwan? Mekegwan ngarod i ngaaw i dinteg? Enchi, no diket mapteng i dinteg. Tep no nagwariy dinteg, ekak iyamtaan i banag na basol. Kaspangarigan, no nagwariy dinteg a kigwan to i “Enog i kiyamkaman i nat kegwen mo,” ekak koma amtaen i basol i pengamkam na nat kegwen ko. 8 Nem idi iyamtaan kod dinteg i basol i pengamkam na nat kegwen ko, emiin a kilasin kamkam a ngaaw, dima-tod si-kak. Nem no nagwariy dinteg, nagwara komay toray na basol. 9 Nontan iy ekak pay koston igwathan i dinteg, maradsak i biyag ko tep kin ko i nagwariy basol ko. Nem idi igwathan kon chiliy nakigwan tod ma dinteg, singen sibibiyag mowan i basol. Iyamtaan ko wa i mabesolak gayam tan singen etiyak mala. 10 Sejay a dinteg a in-i-kan Afo Chiyos say amtaen na tothooy chalan cha biyag, ekak piyosin tiyongpal, et para cha si-kak, iyanbalin na chalan cha pathiy. 11 Singen siyaol toak na basol babaen na dinteg. Tep kin ko i posien kon tongpalen i emiin a bilin na dinteg say gwariy biyag ko, nem imbis iyamtaan ko i kowan charaliy dinteg et pathiy i chosak. 12 Isonga, esantoan i dinteg, tan emiin a bili-bilin to, esantoan, kosto, tan mapteng.

13 Piyan niwan ayen a-seden i sema mapteng a dinteg Afo Chiyos i onpathiy cha si-kak? Enchi! Basol i onpathiy. Naiyosal to ma dinteg a naengawis cha si-kak a mengemag na ngaaw say metiyak. Tep sema pangkep na dinteg, mengipaamta na agpayson itsora na basol tan mengibiybiy na emiin a banay a ngaaw to.

14 Amta thayo i sema dinteg, aispiritoan tep edafod Afo Chiyos. Nem tooak bengat a naiyanbasol. Singen bagaen toak na basol. 15 Agpayson ekak egwathan i naimag ko. Tep sema mapteng a piyan ko, nat naimag ko. No diket sema ngaaw a enbalaw ko, si-kathoy naimag ko. 16 No nat piyan kon a-magen i ngaaw a naima-imag ko, si-kathoy mengibiybiy a patien ko i mapteng i dinteg. 17 Isonga, nat si-kak i naengamag niwan, no diket basol a gwared si-kak a naengawis cha si-kak. 18 Tep amtak i nagwaren polos i mapteng cha si-kak, a piyan kon a-seden, sema ngaaw a ogadik. Angken piyan kon mengemag na mapteng, ekak met laeng kayaen. 19 Tep nat naimag koy mapteng a piyan ko, no diket sema ngaaw a nat piyan ko, si-kathoy naimag ko. 20 Isonga, no a-magen koy nat piyan ko, piyan niwan a a-seden i nat si-kak maliy naengamag, no diket basol a gwared si-kak.

21 Isonga, seman na olay i nadiya-kaman ko. No piyan kon mengemag na mapteng, gwara na olay cha si-kak i naengawis a mengemag na ngaaw. 22 Cha nemnem ko, piyan kon agpayson onoran i dinteg Afo Chiyos, 23 nem iyamtaan ko i gwariy afil a naiyantoray cha angel ko. Sejay a naiyantoray cha angel ko, naiyaykontred dinteg Afo Chiyos a piyan na nemnem ko, et say manbesolak. Isonga, singen bagaen toak na basol a gwared si-kak. 24 Kaasiak a pasiya! Siyay mengidibchiak chiya angel kon ekowis a metiy? 25 Mansalamathak cha Afo Chiyos tep iyaydibchiak babaen Jesu Criston Afo thayo!

Sejay miy kasasaad ko. Cha nemnem ko, piyan kon patien i dinteg Afo Chiyos, nem kagol na basol a gwared si-kak, basol et i napiyatik.