Sema Panpa-noan Na Pengibilang To Kiyen Afo Chiyos A Maronong
5
Isonga, kagol na engibilangan Afo Chiyos cha si-kathayon maronong babaen na pamati thayo, mapteng i pekitimtimpoyog tayod si-katho kagol na imag Jesu Criston Afo thayo. 2 Babaen Cristo, emangkeda-kami wiy kaasin Afo Chiyos. Tan maradsak kiya tep sigorado kiyen mekida-kam na kinamapteng tan kinahejang Afo Chiyos. 3 Nat setan bengat, nem maradsak kiya ngo kagol na pandigathan tayo. Tep amta thayo i say panpa-noan na pandigat, sema kaanos, 4 et say panpa-noan na kaanos, sema ogadin eparas, et say panpa-noan na ogadin eparas, sema namnamen tongpalen Afo Chiyos a inkari tho. 5 Tan nat medismaya kiya tep sigorado kiyen metongpal ali ma namnama thayo. Tep inpadeknen Afo Chiyos i banay a semek tod si-kathayo babaen na Ispirito Santon in-i-kan tod si-kathayo.6 Nonta koston timpon pinispis Afo Chiyos angken nonta nagwara pay i kabaalan tayon mengemag na piyan Afo Chiyos, etiy si Cristo para cha si-kathayon naiyanbasol. 7 Nagwara emoy mahapiyan a metiy para cha toon naengonod na olay na dinteg, nem mebedin emon gwariy ontoled a metiy para cha toon mapteng tan mahaasi. 8 Nem si Afo Chiyos, inpabiybiy toy banay a semek tod si-kathayo tep etiy si Cristo para cha si-kathayo angken nonta mabesol kiya pay. 9 Isonga, no inbilang to kiyen Afo Chiyos a maronong kagol na chalen Criston imayos nonta ingkathiy to, mas sigoradon isalakan to kiyen Cristo et say nat chosaen to kiyen Afo Chiyos. 10 Tep nonta nakiyontra tayo pay si Afo Chiyos, inpaoli to kiya did si-kathon mismo babaen na ingkathiy na Anak to. Niman a imoli kiyed si-katho, mas sigoradon isalakan to kiya babaen na panbiya-biyag na Anak to. 11 Tan nat setan bengat, nem maradsak kiya ngo kagol na inpakitimpoyog tayod Afo Chiyos tep inpaoli to kiya din Afo Chiyos cha si-kathon mismo babaen na imag Jesu Criston Afo thayo.
Sema Ketiy Babaen Adam Tan Biyag Babaen Cristo
12 Niman ma kagol na sa-kin toon si Adam, simekep i basol tan pathiy cha dobong. Tep idi iyanbasol si Adam nontan da, seman i kapoanan na inpanbasol na tothoo. Kagol na iyanbasolan to, etiy, tan manipod nontan naetiy ngon emiin i too tep naiyanbasol iren emiin. 13 Angken nonta nat in-i-kan pay laeng Afo Chiyos i dinteg tod Moses, naiyanbasol i tothoo. Nem kagol a nagwara pay i dinteg, nat iyaybilang i basol chen menechal niwa dinteg. 14 Nem manipod nonta timpon Adam ingkathod timpon Moses tan sema inpangi-kan na dinteg, etiy a emiin i tothoo angken eg cha chichal i sa-kin bilin Afo Chiyos a inges toy inpasing Adam. Isonga, amta thayo i iyanbasol ira.
Si Adam, gwariy kay-ingesan tod Criston imonod cha si-katho tep sema imag chen chegwa, gwariy tongpal to para cha emiin a too. 15 Nem sema iyantongpalan na imag cha, nat man-inges tep say rigalon in-i-kan Afo Chiyos, afil cha basol a imag Adam. Tep babaen na basol na sa-kin toon si Adam, chakel i toon etiy. Nem mas ainportantiy kaasin Afo Chiyos tan sema rigalon in-i-kan tod chakel a too babaen na kaasi na sa-kin toon si Jesu Cristo. 16 Sema rigalon Afo Chiyos, afil cha basol Adam. Tep imonod i pengowis Afo Chiyos chiwa sa-kin basol Adam, et sema iyanpa-noan to, iyangkechosay tothoo. Nem imonod i rigalon Afo Chiyos chiwa chakel a basol na tothoo, et sema iyanpa-noan to, inbilang Afo Chiyos i tothoon maronong. 17 Kagol na basol niwa sa-kin too, mesepol a metiy i tothoo, nem kagol na inpasing na sa-kin toon si Jesu Cristo, mas ainportantiy iyantongpalan to. Tep babaen cha si-katho, sema iren mengegwat na banay a kaasin Afo Chiyos tan sema rigalo ton kinachonong, kenasen chiy biyag a nagwariy pengingkaan to tan mayka-chom ired Cristod pantorayan to.
18 Isonga, kagol niwa sa-kin basol Adam, mechosen emiin i too. Nem kagol na sa-kin mapteng a inpasing Cristo, mebedin a maybilang a emiin i toon maronong say gwariy biyag chen nagwariy pengingkaan to. 19 Tep kagol na sa-kin toon nat piyati thos Afo Chiyos, chakel i toon iyanbalin na mabesol. Nem kagol na sa-kin toon piyati thos Afo Chiyos, chakel i toon pechonong Afo Chiyos. 20 In-i-kan Afo Chiyos i dinteg tod Moses say amtaen na too i emangkeda-toiy basol cha. Nem angken ngorechan emangkeda-toiy basol, emangkeda-toi ngo pay i kaasin Afo Chiyos. 21 Sigod a naiyantoray i basol, isonga etiy i tothoo, nem niman ma naiyantoray i kaasin Afo Chiyos, isonga sema iren inpachonong Afo Chiyos, gwared si-kariy biyag a nagwariy pengingkaan to babaen Jesu Criston Afo thayo.