“Afo Felix, si-kam a epateg a chili, ebayag a etalniy biyag tayo kagol na chakel a ima-imag mon panmaptengan na tothoo wi. 3 Naiyansalamat kawi na olay cha si-kam cha emiin a doga-dogad kagol iren ja mapteng. 4 Nem nat piyan min taktahen mika, isonga ibaga wi i iki-ngelan mo pangoy otik a konen mi. 5 Iyamtaan mi i distribo ja too. Nainpanngala-ngalawngaw to iriy Hodjos cha intiron dobong. Et si-kathoy sa-kin naengibalnay na gropon naengonod na toro-toro na i-Nazareth. 6 Inparas to ngon engipaskig na timplod Jerusalem, nem chinmet mi, [et piyan min mengowis cha si-kathon iyaybasar cha dinteg mi. 7 Nem si Lysias a ekayang a naengibalnay na sosolcharo, kimowan ali et kiyojod tos Paul. 8 Et kigwan to kawi i mesepol a onkowan kawid jay say ipaamta wiy engicharoman min Paul cha sangoanan mo. No bistigalen mo ja too, amtaan mo i podnon emiin i engicharoman mid si-katho.”] ^a 9 Emiin ngon Hodjos a gwared man, iyayka-chom ngo iren engicharom Paul et tinistigoan cha i podnon emiin i kigwan Tertullus.

10 Et iyanchingjas i gobirnador a man-esel si Paul. Et kigwan Paul i:

“Afo Felix, amtak i ebayag a kiyowis moy tothoo wi. Isonga, kaimdengak a menongbat na engicharoman ched si-kak. 11 Inam-ay a cho-peten mo i sawal na chegwen akow bengat i inkowan kod Jerusalem say manchejawak cha Afo Chiyos. 12 Seja iren Hodjos, nat mita raak a ekisongbat ono engipangalawngaw cha timplo ono synagog ono kompormin dogad cha Jerusalem. 13 Nagwara ngoy paneknekan cha i podnoy engicharoman ched si-kak. 14 Nem tistigoan ko i nachijaw kos Afo Chiyos a nachijaw iren ma afo-afo wi len naiyonoran koy toro-toron Jesus a nakigwan na Hodjos i nat podno. Napiyatik ngon emiin i dinteg mi tan sola-solat iren ma profita. 15 Sema kowan namnamaa, inges toy nainpannamnama iren ja Hodjos a panpawil Afo Chiyos i emiin a iyangketiy, mapteng tan ngaaw. 16 Isonga, nainpahat koy kabaalan kon mengemag na mapteng say edinis i konsinsiyak cha Afo Chiyos tan echom kon tothoo.

17 “Nonta nagwaraak med Jerusalem na piyen tawen, imoliak ded man say mengi-kanak na pilak cha tothoo wi a tolong para cha iyangkebitheg tan say mengitangdalak cha Afo Chiyos. 18 Seman i kowan amaga nonta sema iren echom a Hodjos a i-Asia, sibi raak cha timplo. Kincheng ko waliy ogadi wi na pandinis. Nat chakel i tood man tan nagwariy manoteng. 19 Sema iren Hodjos a i-Asia, si-kariy mahaamta na imag ko. Isonga, gwara koma ired jay cha sangoanan mo say icharom chaak no agpayson gwariy ipabasol ched si-kak. 20 Nem no enchi, angken seja iren tothood jay, konen cha koma no gwariy basol kon diyoktalan cha nonta imakgwathak cha sangoanan iren ma naengibalnay na Hodjos cha Jerusalem. 21 Nem nagwariy imag kon basol. Sema sa-kin imag ko iy maramen man-ak-akgwat cha sangoanan cha, kimeljawak a kigwan ko i ‘Say kagol a chiyan kowisaak niman a akow, napiyatik i manpawil i iyangketiy.’ ”

22 Si Felix ngo, chakel i iyamta thon maypangkep na toro-toron Jesus, isonga insalcheng toy bistigal a kigwan to i “No onmothok si Lysias a ekayang a naengibalnay na sosolcharo, kekchengen kon mengitongtong na kasom.” 23 Et inbilin tod kapitan na sosolcharo i ipabantay tos Paul, nem i-kanan cha na otik a gwaya tan itolok chen itolod ali na kakajem toy mesepol to.

24 Idi epalabas i piyen akow, imoli dis Felix mowan a iyodop tos imbaliy ton Hodjon iyanngaran na Drusilla. Et tiya-gway Felix si Paul et inki-ngelan chiy kigwan Paul maypangkep na pamatid Cristo Jesus. 25 Nem idi timbal Paul i maypangkep na kinachonong tan pengitifel na piyan na angel a a-magen tan sema pengowis alin Afo Chiyos, timahot si Felix a kigwan to i “Kosto wa, taha wa. No egwayaak ma, ta-gwayen taha mowan.” 26 Natiya-gway Felix si Paul say mekitebal cha si-katho, nem sema gwared nemnem to, piyan tos Paul a soksohan tos si-katho na katad na pilak.

27 Idi epalabas i chegwen tawen, iyaysa-dat si Porcius Festus cha Felix a gobirnador. Nem nonta bimetik si Felix, eg to inbolos si Paul cha kalebosan tep piyan ton paimdeng ira ma Hodjos.