6 Iyan-iyan si Festus cha Jerusalem na gwalo ono sampolon akow, et imoli ded Caesarea. Idi gwa-gwa tho, kimowan cha pengowisan a timokkongan to et tiya-gway tos Paul. 7 Idi mimothok si Paul, sema iren Hodjos a edafod Jerusalem, dinikmot cha, et chakel i ngaaw a engicharoman ched si-katho. Nem nagwariy paneknekan chen imag Paul ira man. 8 Et insongbat Paul i “Nagwaren polos i imag kon ngaaw maypangkep na dinteg min Hodjos ono timplo wi. Nagwara ngon polos i imag kon ngaaw maypangkep na dindinteg Caesar.” ^a 9 Nem piyan Festus a mengipaimdeng na Hodjos, isonga inbaga thod Paul i “Piyan mon onkowan cha Jerusalem say chiwan i pengowisan kod si-kam maypangkep na engicharoman ched si-kam?” 10 Nem insongbat Paul i “Enchi, nat piyan ko. Tep ajayak chiyay et chiyay i pengowisan mo komed si-kak tep si-kam i chiyotohan Caesar a mengowis. Si-kam et mango, amtam i nagwariy basol kod Hodjos. 11 No iyanbasolak ono gwariy imag kon ngaaw a iyaybagay cha pathiy, ontolohak a metiy. Nem no nat podno ma engicharoman na Hodjos cha si-kak, nagwariy karebengan ton mengiawathak cha si-kara. Isonga, ibagak i on-akgwathak cha sangoanan Caesar a gwared Roma say si-kathoy mengowis cha si-kak.” 12 Et si Festus, ekitebal ired ma ofisiyalis a naengibilin cha si-katho, et kigwan tod Paul i “Ibagam i on-akgwat ked sangoanan Caesar a gwared Roma, isonga si Caesar i kayto-noan mo.”

13 Idi epalabas i piyen akow, sema ari na Hodjos a si Agrippa tan si Bernice a ahi thon bii, mimothok ired Caesarea say bisitaen ches Festus. 14 Idi gwara wa ired man na chakel a akow, inistoriyen Festus cha ari i maypangkep na kason Paul a kigwan to i “Gwariy sa-kin balod chiyay a inpayas Felix. 15 Idi manbibisitaak cha Jerusalem, sema iren aafo na papari tan iyangkaama na Hodjos, kimowan iren mengicharom niwa tood sangoanan ko. Kinchow cha i konen ko i mechosa. 16 Nem insongbat ko i sema ogadi win Romano a mengiawat bengat na toon mechosa no sema iren mengicharom cha si-katho, mekiaspol ira nin a mansinango say mebedin a isongbat niwa too i maypangkep na engicharoman ched si-katho. 17 Isonga, idi mimothok iriy Hodjos chiyay, nat etaktahak, no diket nonta gwa-gwa tho, kimowanak cha pengowisan a timokkongan ko et tiya-gway kos Paul. 18 Et sema iren engicharom cha si-katho, imakgwat et iyan-esel ira. Kin ko i gwariy engicharoman chen ngaaw, nem nagwara. 19 Sema chiyan sosongbathi, maypangkep bengat na pamati na Hodjos tan sema sa-kin etiy a iyanngaran na Jesus a kigwan Paul i sibibiyag ma. 20 Nat iyamtak a memistigal niwan, isonga inbagak cha Paul no piyan ton onkowan cha Jerusalem a mekowis chiwan maypangkep na engicharoman ched si-katho. 21 Nem eg to piyan, no diket inbaga tho i bantayan mid jay say si Caesar i mengowis cha si-katho. Isonga, inpabantay ko ingkathod mebedin a ito-nok cha Caesar a gwared Roma.” 22 Et kigwan Agrippa cha Festus i “Piyan ko ngon mengi-ngel na konen niwa too.” Et kigwan Festus i “Iki-ngelan mo nem megwa-gwa.”

23 Idi gwa-gwa tho, si Agrippa tan si Bernice, kimowan ired pengowisan a iyanbaro ira na palit say ibiybiy chiy kinakayang cha. Simekep ired man a ekiolop ired ma naengibalbalnay na sosolcharo tan ainportantin tothood siyodad. Et tiya-gway Festus si Paul. 24 Et kigwan Festus i “Ari Agrippa tan si-kayon emiin a gwared si-kawi, seja toon jowan si-nenga, si-kathoy incharom na emiin a Hodjos chiyay tan cha Jerusalem a kimelkeljaw iren kigwan cha i nat manbiyag ma koma. 25 Nem iyamtaan ko i nagwariy imag ton iyaybagay cha pathiy. Inbaga tho i si Impirador Caesar a gwared Roma i mengowis cha si-katho, isonga niyemnem ko i ito-nok chiwan. 26 Nem nat sigoradoen ko i isolat kod Impirador maypangkep niya too. Isonga, inpaakgwat kod sangoanan jon emiin, agdalod si-kam, Ari Agrippa, say no bistigalen mi wa, gwariy isolat ko. 27 Tep cha nemnem ko, nat mapteng a mengiawathak na balod cha Impirador no nat iyaypaamtay iyaycharoman to.”