23
Et diritson sini-neng Paul ira ma naengibalnay na Hodjos a kigwan to i “Aahi, amten Afo Chiyos i edinis i konsinsiyak maypangkep na nainpasing kon naiyanbiyag manipod nonta kanga-ngak ingkathod niman.” 2 Si Ananias a kahejangan a pari, idi inki-ngelan toy kigwan Paul, kigwan tod tothoon kainakgwat cha askang Paul i sedpahen chiy temi tho. 3 Et kigwan Paul cha Ananias i “Si-kam a naengibili-biling a mengowis na kosto, sapay koma sedpahen toka ngon Afo Chiyos. Mantoktokkong ked man a mowan kowisaak a iyaybasar cha dinteg, nem chichal mo ma dinteg nonta kigwan mod si-kara i sedpahen chaak.” 4 Sema iren tothoon kainakgwat cha askang Paul, kigwan cha i “Niyana mowan kelsithi ma kahejangan a parin Afo Chiyos?” 5 Et insongbat Paul i “Aahi, nat amtak i kahejangan a pari man. No iyamtak ma, ekak kigwan iwan tep iyaysolat i ‘Enog i kigwan i ngaaw maypangkep na naiyantoray na tothoom.’ ” a6 Nem si Paul, iyamta tho i sema echom a esa-nop chiwan, Sadducees ira, tan sema ngon echom, Pharisees ira. Isonga, inpekes toy esel ton kigwan to i “Aahi, Phariseeak tan Pharisees ngoy afo-afok da. Say kagol a chiyan kowisaak, napiyatik i manpawil i iyangketiy.” 7 Apaman a kigwan Paul iwan, sema Pharisees tan Sadducees, inchogi ren mansosongbat tep nat man-iinges i nemnem cha. 8 Tep sema iren Sadducees, nat napiyati ra i manpawil iriy iyangketiy, nat napiyati ra i gwariy anghilis, tan nat napiyati ra i gwariy ispirito na tothoo. Nem sema ngo iren Pharisees, napiyati ra man a emiin.
9 Et gwariy ngalawngaw. Sema echom a Pharisees a mamaistoro na dinteg, imakgwat ira et epaladoy songbat chen kigwan cha i “Nagwariy basol niwa toon esafol. Gwara emoy anghil ono ispiriton ekitebal cha si-katho. Nagwariy ngaaw no seman i epasamak.” 10 Idi ema-men iyanngalawngaw ira, timahot i ekayang a naengibalnay na sosolcharo i bi-bi-nihen iren ma toos Paul. Isonga, kigwan to ired ma sosolcharo i a-daen ches Paul et ioli ched baliy cha.
11 Nontan a edagwi iyanparang si Jesus cha Paul a man-ak-akgwat cha askang to, et kigwan Jesus i “Pekedsang moy nemnem mo tep mesepol a tistigoan moy maypangkep cha si-kak cha Roma a inges toy inpanistigom maypangkep cha si-kak chiya Jerusalem.”
12 Idi gwa-gwa tho, esa-sa-nop ira ma Hodjos et iyantotolag ira. Insangba ra i nat mengan tan man-inom ira ingkathod bonoen ches Paul. 13 Sema bilang iren man a iyantolag, esolok a epat a polo. 14 Et kimowan ira ma Hodjos cha kad-an iren ma aafo na papari tan iyangkaama, et kigwan cha i “Insangba wi i agpayson nat mengan kawi ingkathod bonoen mis Paul. 15 Isonga, si-kayo tan echom a naengibalnay na Hodjos, pengito-no kayo na mengibaged ekayang a naengibalnay na sosolcharo i ipakowan tos Paul alid si-kayo. Ibili-biling jo i gwara ngo pay i piyan jon mengibaged Paul. Et seskeren mis Paul cha chalan say bonoen mi asan onmothok chiyay.”
16 Nem sema panganahan Paul a anak na ahi ton bii, iyamtaan toy maypangkep niwa plano iren ma Hodjos. Isonga, kimowan cha baliy iren ma sosolcharo say ipaamta thod Paul. 17 Et ena-gway si Paul na sa-kin kapitan, et kigwan to i “Olop mo ja balodahid ekayang a naengibalnay na sosolcharo tep gwariy konen tod si-katho.” 18 Isonga, iyodop na kapitan iwa balodahid kad-an na ekayang a naengibalnay, et kigwan to i “Si Paul a balod, tiya-gway toak et inbaga tho i odofen ko ja balodahid si-kam tep gwara konoy konen tod si-kam.”
19 Et chigwat na ekayang a naengibalnay i balodahi, et inkilig to. Et inbaga tho i “Nengoy konen mo?” 20 Insongbat na balodahi i “Iyantolag ira ma Hodjos i ibaga ra i ito-nom si Paul cha esa-nofan na naengibalbalnay na Hodjos nem megwa-gwa. Ibili-biling cha i gwara ngo pay i piyan chen mengibaged si-katho. 21 Nem enog i inki-ngelan ira tep gwariy esolok a epat a polon dalekin mansesked cha Paul cha chalan. Tep sema iren daleki, insangba ra i nat mengan tan man-inom ira ingkathod bonoen ches Paul. Esagana wa ira. Manseseked ira ingkathod konen mo i ‘Ahow.’ ” 22 Et inpabtik na ekayang a naengibalnay ma balodahi a kigwan to i “Enog i ingwanggwanggwang cha angken siyen tooy kigwan mod si-kak.”
Iyodop Ches Paul Cha Kad-an Gobirnador Felix Cha Caesarea
23 Et sema ekayang a naengibalnay na sosolcharo, ena-gway na chegwen kapitan et kigwan to i “Pena-gway kayo na chegwen dasos a sosolcharo et kowan jo i mansagana iren manbiyahid Caesarea na alas nowibi na edagwi. Pengolop kayo ngo na chegwen dasos a sosolcharon mankayang ira tan pithon polon sosolcharon mansahay cha kabajo. 24 Ala kayo pay na kabajon pansahayan Paul, et ikowan jod Gobirnador Felix. Bantayi yon kostos Paul say nagwariy mepesamak cha si-katho ingkathod iparang jod Felix.”
25 Et insolat ngo na ekayang a naengibalnay cha Felix a kigwan to i 26 “Afo Gobirnador Felix, si-kam a epateg, sema iyansolat cha si-kam, si-kak si Claudius Lysias. Komosta ka? 27 Setan den toon into-nok cha si-kam, ida iren ma Hodjos et chanchanin bonoen cha. Nem si-kawin sosolcharok, kimowan kawin menolong cha si-katho tep iyamtaan ko i too na Roma. 28 Piyan kon amtaan no nengoy engicharoman iren ma Hodjos niwa too. Isonga, inkowan kod naengibalbalnay iren ma Hodjos. 29 Idi inki-ngelan koy chiyan tabtabala, iyamtaan ko i nagwariy basol niwa toon iyaybagay cha kaykalebosan to ono ketiy to. Tep sema engicharoman ched si-katho, maypangkep bengat na dinteg cha. 30 Et iyamtaan ko ngo i iyantolag i echom a Hodjos a memono niwa too. Isonga, into-nok a chakos cha si-kam, et kigwan ko ired ma engicharom i si-kam i mengi-ngel na engicharoman ched si-katho. Setan bengat i konen ko.”
31 Et idi edagwi, imag iren ma sosolcharo i kigwan na ekayang a naengibalnay cha si-kara, et ida res Paul et iyodop ched siyodad na Antipatris. 32 Idi gwa-gwa tho, sema iren sosolcharon iyan-ahad, imoli ira ded baliy ched Jerusalem, tan sema iren iyansahay na kabajo, iyodop ches Paul cha Caesarea. 33 Idi mimothok ira ma sosolcharod Caesarea, in-i-kan cha ma solat cha gobirnador, et in-awat ches Paul cha si-katho. 34 Idi bisa na gobirnador iwa solat, inbaga thod Paul no nengoy probinsiyen iyay-anahan to. Idi kigwan Paul i i-Cilicia, 35 kigwan na gobirnador i “Bistigalen taha no onmothok iriy engicharom cha si-kam.” Et inbilin to i bantayan ches Paul cha baliy Herod.