22
“Si-kayon aawak tan aahik, iki-ngeli yoy konen ko say amtaen joy ima-imag ko.” 2 Idi inki-ngelan na tothoon man-eesel si Paul na Hebrew, ema-men imeket ira. Et intoloy Paul a kigwan to i 3 “Si-kak ngo, Hodjoak a iyay-anak cha Tarsus cha Cilicia, nem bima-degak chiya Jerusalem a iyan-achalan ko. a Si Gamaliel i maistorok, et intoroan toak na kosto-kosto na emiin a dinteg iren ma afo-afo thayo la. Inpahat koy kabaalan kon iyansilbid Afo Chiyos a inges jon emiin ingkathod niman. 4 Piyadigathan ko ira ma ematid Jesus ingkathod ingkathiy cha. Engalaak ngo ira na daleki tan bibii, et inpakalebos ko ira. 5 Sema kahejangan a pari tan echom a aafo thayo, mebedin a tistigoan cha i agpaysoy kowan kona tep si-kariy engi-kan ired si-kak na sola-solat a mengipaamted aahi thayon Hodjos cha Damascus i gwariy karebengan kon menmet na ematid Jesus. Et iyanbiyahiak cha Damascus a menmet iren ma emati say itolod ko iren ekadinaan chiya Jerusalem et say mechosa ira.6 “Idi manbibiyahiak et man-eesofak cha Damascus na chanchanin alas dosi, biglen gwariy nihal a edafo did dangit a kimi-ki-dat et sinilowan toak. 7 Et iya-kasak cha pithek, et gwariy inki-ngelan kon esel a kigwan to i ‘Saul, Saul, niyana mowan padigathiak?’ 8 Insongbat ko i ‘Afo, siya ka aya?’ Et kigwan na man-eesel i ‘Si-kak si Jesus a i-Nazareth a mowan padigathi.’ 9 Niman sema ngo iren echom ko, mita ra ma nihal, nem eg cha inki-ngelan i esel niwa man-eesel cha si-kak. 10 Et kigwan ko i ‘Afo, nengoy piyan mon a-magen ko?’ Insongbat Jesus i ‘Akgwat ka et tahed Damascus, et gwared man i sa-kin toon mengowan cha si-kam na emiin a a-magen mo.’ 11 Nem nat mahasi-nengak tep esilaak na nihal. Isonga, chigwat chaak na echom ko, et inbalnay chaak cha Damascus.
12 “Gwariy sa-kin dahid ma Damascus a iyanngaran na Ananias. Napiyati thoy dinteg tayo, et emiin a echom tayon Hodjos a naiyan-iyan cha Damascus, narinispiktar cha. 13 Kimowan alis Ananias et imakgwat cha askang kon kigwan to i ‘Saul a ahik, mahasi-neng ka wa mowan.’ Apaman a kigwan to man, nimihal i si-neng ko et mitak si-katho. 14 Et kigwan Ananias i ‘Si Afo Chiyos a nachijaw iren ma afo-afo thayo la, pinispis toka say amtaen mo koma i piyan to, tan si-nengen mo komay Maronong ton Bagaen a si Jesu Cristo tan iki-ngelan mo komay esel to. 15 Tep si-kam aliy tistigon Jesu Cristod emiin a too, et konen mo i sini-neng mos si-katho tan inki-ngelan moy kigwan to. 16 Isonga, nengoy mowan sekera? Ibagaim si Afo Chiyos i pekawanan toy basol mo et panbonjag ka.’ ”
Kigwan Afo Chiyos Cha Paul I Mankasaba Na Mapteng A Chamag Ired Ma Gentiles
17 Et intoloy Paul a engowan i “Idi imoliak cha Jerusalem, kimowanak a mankararag cha timplo. Idi mankakararagak, gwariy inbiybiy Afo Chiyos cha si-kak babaen na singen kokip. 18 Mitak si Jesus et kigwan tod si-kak i ‘Kanoim! Betihim a chakos i Jerusalem tep sema iren tothood jay, nat patien chiy mowan kona maypangkep cha si-kak.’ 19 Et insongbat ko i ‘Nem, Afo, amta ra i kimowanak cha emiin a synagog, et emiin a ematid si-kam, inpabaras ko tan inpakalebos ko. 20 Et idi biyono na tothoos Stephen a tistigom, gwaraak ngod man a intolok koy imag cha, tan si-kak i iyanbantay na ta-kep na baro iren ma emonod si-katho.’ 21 Nem kigwan Jesus cha si-kak i ‘Betik ka wa tep kowan ito-no ked aragwi say konen moy mapteng a chamag ired ma Gentiles.’ ”
22 Sema iren tothoon esa-sa-nop chiwan, inki-ngelan ches Paul ingkathod iyan-esel maypangkep na Gentiles. Nem idi inki-ngelan cha man, kimeljaw iren kigwan cha i “Bono yo! Nat maykari ma toon manbiyag.” 23 Kimelkeljaw ira ma tothoo tan jiyagjagjag chiy baro ra, et inba-ba-tok chiy depok cha iyaykayang a sinjal na bonget cha. 24 Et sema ekayang a naengibalnay iren ma Romano a sosolcharo, kigwan tod daleki tho i itolod cha dis Paul cha baliy cha, et kigwan to i bechasen ches Paul say ipaamta thoy kagol a kimelkeljawan iren ma Hodjos cha si-katho. 25 Nem idi biyalod na sosolcharos Paul say bechasen cha, inbagen Paul cha kapitan a man-ak-akgwat cha askang to i “Iyaytolok ayed Romano a dinteg a memaras na too na Roma a nat ebistigal nin?” 26 Idi inki-ngelan na kapitan i kigwan Paul, kimowan cha ekayang a naengibalnay na sosolcharon kigwan to i “Nemnem mon pasiya i a-magen mod man tep too kono na Roma.” 27 Isonga, kimowan i ekayang a naengibalnay cha kad-an Paul, et kigwan to i “Kowan moak. Too ka aya na Roma?” Kigwan Paul i “Ahow.” 28 Et kigwan mowan na ekayang a naengibalnay i “Chakel i bijaran kon manbalin na too na Roma.” Insongbat Paul i “Ahow, nem si-kak ngo, iyay-anak na too na Roma tep too na Roma i parintis ko.” 29 Idi inki-ngelan chen emiin iwan, sema iren sosolcharon chanchanin memaras Paul, simoled iren chakos, et timahot iwa ekayang a naengibalnay na sosolcharo tep amta tho wa i too na Roma si Paul et inpabalod to.
Iyanparang Si Paul Cha Sangoanan Iren Ma Naengibalnay Na Hodjos
30 Sema ekayang a naengibalnay na sosolcharo, piyan to pay a amtaan no niyana incharom na Hodjos si Paul. Isonga, idi gwa-gwa tho, inpasa-sa-nop to iriy aafo na papari tan echom a naengibalbalnay na Hodjos. Idi esa-sa-nop ma ira, inpa-kal na ekayang a naengibalnay na sosolcharoy kadinen Paul, et intolod tos Paul cha esa-nofan chen inpaakgwat tos Paul cha sangoanan na naengibalbalnay na Hodjos.