7 Idi mimothok kawid Ptolemais alid Tyre, imepas kawi. ^e Et kimowan kawin iyanbisita iren ma ematid man, et ekiiyan kawid si-kara na sa-kin akow. 8 Idi gwa-gwa tho, dima-jat kawin kimowan kawid Caesarea. ^f Idi mimothok kawid man, sima-mad kawid baliy Philip a naiyantoro na mapteng a chamag maypangkep Jesus. Si-kathoy sa-kin ma pithon dalekin pinispis chen menolong na iyangkebitheg cha Jerusalem. ^g 9 Gwariy epat a anak Philip a marikit a aneng mengimbaliy. Nainpadto iren ma anak to i inpaamten Afo Chiyos cha si-kara.

10 Idi gwara kawid man na piyen akow, mimothok i profiten iyanngaran na Agabus a edafod Judea. 11 Kimowan cha kad-an Paul, et ida thoy balkes Paul et inbedbed tod diwa tho tan seki tho. Et kigwan Agabus i “Sejay i kigwan na Ispirito Santo a ‘Sema Hodjos cha Jerusalem, inges niyay i pesing chen memedbed na mahakegwen niya balkes, et iawat ched Gentiles.’ ”

12 Idi inki-ngelan mi man, si-kawi tan sema iren echom a tothoon gwared man, ekikaasi kawid Paul a nat onkowan cha Jerusalem. 13 Nem insongbat Paul i “Niyana mannanangis kayo? Jowan ipasahit i nemnem ko. Esaganaak a maykalebos cha Jerusalem angken ingkathod metiyak kagol Afo Jesus.” 14 Idi nat intolok Paul i kigwan mi, simalcheng kawi et kigwan mi i “Sapay koma metongpal i piyan Afo Chiyos.”

15 Idi iyakcheng iwan, iyansagana et kimowan kawid Jerusalem. 16 Sema iren echom a ematin i-Caesarea, ekiolop ired si-kawi. Idi mimothok kawid Jerusalem, iyodop cha kawid baliy Mnason a sa-maran mi. Si Mnason, i-Cyprus, tan si-kathoy edagwas a emati.

17 Idi mimothok kawid Jerusalem, kaimdeng iriy ematin engaspol cha si-kawi. 18 Idi gwa-gwa tho, kimowan kawin Paul a manbisited James. Emiin a naengibalbalnay iren ma ematid Jerusalem, gwara ngo ired man. 19 Et si Paul, kiyomosta to ira, et in-is-istoriya thoy emiin a ima-imag Afo Chiyos para cha Gentiles babaen na inpankasaben Paul na mapteng a chamag cha si-kara. 20 Idi inki-ngelan ma iren ma ematiy kigwan Paul, chijaw ches Afo Chiyos. Et kigwan ched Paul i “Ahi, amtam i sema dinibon Hodjos, naemati ired Jesus, nem kosto-koston napiyati ra pay i dinteg Moses. 21 Inki-ngelan cha i naiyantoro ka konod emiin a Hodjos a naiyan-iyan cha doga-dogad ira na Gentiles i bebnekan cha komiy dinteg Moses. Nakigwan cha i nainbilin mo kono i nat kogithen koma iren ma Hodjos i aanak cha tan nat onoran cha komay ogadi thayon Hodjos. 22 Nengoy pesing tayo say amta ra i naiyonoran moy ogadi thayo? Tep sigoradon amtaan cha i mimothok ka. 23 Isonga, sejay i piyan min pesing mo. Ijed jay i epat a dalekin iyansapathed Afo Chiyos et chanchanin metongpal i sapatha ra. 24 Pekiolop ked si-kared timplo et pekika-chom ked si-kara no a-magen chiy ogadi na pandinis a onoran chiy dinteg Moses. Et no mekcheng ma man, bayarim i kastos na animal a itangdal cha say mebedin a manpapohis iren sinjal a tongpalen cha wiy sapatha ra. Et no a-magen mo wa man, amtaen na emiin a too i nat podno ma notnot a inki-ngelan cha maypangkep cha si-kam tep si-nengen cha i agpayson naiyonoran moy dinteg Moses. 25 Nem sema ngo iren Gentiles a naemati, engipaw-it kawi wala na solat cha si-karen kigwan to i nat mengan koma ira na iyaytangdal cha sinan chiyos, nat mengan koma ira na chala, nat mengan koma ira na epososan a animal, ^h tan nat menechog koma ira na nat imbaliy cha.”

26 Et ekika-chom si Paul ired ma epat a daleki, et nonta gwa-gwa tho, ekiolop cha si-kared timplo say a-magen chiy ogadi na pandinis. Et simekep si Paul cha timplon mengowan ired papari i akow no metongpal i sapatha ra tep setan i akow no mengitangdal iren sa-ki tan sa-ki.

27 Idi chanchanin mekcheng i pithon akow na ogadi na pandinis, sema iren Hodjos a edafod probinsiya na Asia, mita res Paul chiwa timplo. Isonga, igwis chen manngalawngaw ira ma too, et ida res Paul 28 a inkeljaw cha i “Si-kayon poli-polin Israel, gwali jod jay a tolongan jo kawi. Tep seja too, si-kathoy naiyantoro ired ma tood emiin a dogad a disjonen cha kiyen Hodjos tan sema dinteg Moses tan seja timplo thayo. Et nat setan bengat, nem inpaskep to ngo iriy Gentiles cha timplo et inpaskig to ja esantoan a dogad.” 29 Kigwan cha man tep si Trophimus a Gentile a i-Ephesus, mita ren ekiolop cha Paul cha siyodad. Et kin cha i inpaskep Paul cha timplo.

30 Et iyanngalawngaw i emiin a toon gwared ma siyodad, et iyanbetik iren emiin cha timplo. Ida res Paul et inkoyod chen engiawas cha timplo, et inbengbeng chen chakos i selbeng to. 31 Idi chiyan parasen bonoen si Paul, inpaamta na tood ekayang a naengibalnay na Romano a sosolcharo i manngangalawngaw i emiin a tood Jerusalem. 32 Ena-gway iwa ekayang a naengibalnay na kakapitan tan sosolcharo, et iyanbetik ired kad-an na tothoo. Idi mita iren ma too i ekayang a naengibalnay tan sosolcharo, insalcheng chen emoksing Paul. 33 Kimowan i ekayang a naengibalnay cha Paul a chinmet to et inpabalod tod chegwen kadina. Et inbaga thod tothoo i “Siya ja too? Nengoy imag to?” 34 Kimelkeljaw i emiin a tothoo, tan afil i kigwa-kigwan na sa-ki tan sa-ki. Kagol niwan, nat tiyongolan na ekayang a naengibalnay i epasamak. Isonga, inpakowan tos Paul cha baliy na sosolcharo. 35 Idi sibi iren ma sosolcharoy pakchal a ontorong cha baliy cha, mesepol a sakbathen ches Paul say nat bonoen na chakel a too tep epaladoy i bonget ched si-katho. 36 Tep timene-tened ira ma toon kimelkeljaw a kigwan cha i “Bono yo!”

37 Idi chanchanin ipaskep ches Paul cha baliy na sosolcharo, kigwan Paul cha ekayang a naengibalnay na Romano a sosolcharo i “Kanin pango, gwariy konen ko.” Insongbat na ekayang a naengibalnay i “Apay nga amtam a man-a-sel na Greek? 38 Kin ko i si-kam iwa i-Egypt a emakal na gobirno nontan a engibalnay na epat a dibon tolisan cha dogad a nagwariy toon naiyan-iya-iyan.” 39 Et insongbat Paul i “Nat si-kak iwan. Hodjoak tan iyay-anahak cha Tarsus a naechamag a siyodad cha probinsiya na Cilicia. Pangaasim, gwariy konen kod tothoo.” 40 Et intolok na ekayang a naengibalnay na sosolcharo. Isonga, imakgwat si Paul cha pakchal, et iyanchingjas say on-eket ira ma tothoo. Idi imeket ma ira, inchogin Paul a man-esel na Hebrew a kigwan to i: