Imolis Paul Cha Macedonia Tan Greece
20
Idi simalcheng i ngalawngaw na tood siyodad na Ephesus, siya-nop Paul ira ma emati, et iyan-esel cha si-kara say onkedsang i nemnem cha. Et bintihan to ira et kimowan cha probinsiya na Macedonia. 2 Idi manchachalan si Paul ired echom a parti na Macedonia, binisita tho ira ma ematid man say onkedsang ngoy nemnem cha. Et mimothok cha Greece 3 a imeketan to na tedon bolan. Idi chanchanin mandogan si Paul cha bapor cha probinsiya na Syria, iyamtaan to i iyantinolag i Hodjos i bonoen cha. Isonga, niyemnem to i onbakin manchedan mowan cha Macedonia. 4 Sema iren ekiolop cha Paul, si Sopater a i-Berea a anak Pyrrhus, si Aristarchus tan si Secundus a i-Thessalonica ira, si Gaius a i-Derbe, si Timothy, tan si Tychicus tan si Trophimus a i-Asia ira. 5 Edagwas ira ma daleki et singked cha kawid siyodad na Troas. 6 Si-kawi ngo, imeket kawid siyodad na Philippi ingkathod iyakcheng i Piyasta na Tinapay a Nagwariy Para Debag. Et iyandogan kawid bapor cha Troas. Idi epalabas i dimen akow, mimothok kawid Troas a engaspolan mi na echom min edagwas. Et iyan-iyan kawin emiin chiwan na pithon akow.Engipawil Si Paul Na Etiy Cha Troas
7 Idi edagwi na Sabaro, esa-sa-nop kawin emati say mengan kawi na tinapay a penginemneman mi na ingkathiy Jesus. Et iyantoros Paul ingkathod kawa na dagwi tep kigwan to i onda-jat na gwa-gwa tho. 8 Chakel i silow cha kwadton esa-nofan mid kayang. 9 Et gwariy sa-kin balodahin iyanngaran na Eutychus a mantoktokkong cha tawa. Idi intolo-toloy Paul a iyan-esel, jimonget si Eutychus et iyayjo-kowan, et iya-kas alid maykatdon kayang na baliy. Idi jiyo-pong cha, etiy. 10 Nem sima-kod si Paul cha kad-an Eutychus et iyantalimohod a iyarakop ton kigwan to i “Enog i chanag. Mabiday.” 11 Et simekep mowan si Paul cha baliy et ekipangan kawi. Idi engan kawi la, intoloy Paul a ekitebal cha tothoo ingkathod bosak na akow, et bimetik kawi. 12 Sema ngon balodahin si Eutychus, iyodop ched baliy to et kaimdeng iren chili tep mabiday.
Bintihan Paul I Troas Et Kimowan Cha Miletus
13 Et kigwan Paul cha si-kawin echom to i medebas kawin mandogan cha bapor cha siyodad na Assos tep si Paul ngo, piyan to konon man-ahad ingkathod Assos et mekidogan cha si-kawi. 14 Idi iyaspol to kawin Paul cha Assos, simekep cha bapor min iyandogan kawid siyodad na Mitylene. 15 Idi gwa-gwa tho, iyandogan kawid ma bapor a dima-jat cha Mitylene, et dima-bas kawid Chios. Idi maykadgwen akow, sima-mad kawid Samos, et idi maykatdon akow, mimothok kawid siyodad na Miletus. a 16 Niyemnem Paul i nat onsa-mad kawid Ephesus tep nat piyan ton metaktak chiwed probinsiya na Asia. Tep man-aagag a onkowan cha Jerusalem say no mebedin, onmothok chiwan asan manchogiy Piyasta na Pintikostis.
Sema Kigwan Paul Ired Ma Naengibalbalnay Iren Ma Ematid Ephesus
17 Isonga, idi mimothok kawid Miletus, engito-nos Paul ired ma naengibalbalnay iren ma ematid Ephesus, et ibaga tho no mekiaspol ired si-kathod Miletus. 18 Idi mimothok ira ma naengibalbalnay, kigwan Paul i “Amta yoy panbiyag kod si-kayo manipod nonta pilmiron inmothok ko did Asia. 19 Amta yo i naiyansilbiak cha Afo Chiyos cha kombaba tan saya. Naiyansilbiak cha si-katho angken edigathanak a pasiya kagol na plano iren ma Hodjos a naengontred si-kak. 20 Amta yo i kigwan kod si-kayo i emiin a panmaptengan jo. Nagwariy ekak inpaamted si-kayo nonta intoroan tahejo ired ma esa-nofan jo tan baliy jo. 21 Amta yo i man-inges i naintorok cha Hodjos tan Gentiles. Kigwan kod si-karen emiin i mesepol a manbabawi kiya na basol tayod Afo Chiyos tan memati kiyed Jesu Criston Afo thayo.
22 “Et niman onkowanak cha Jerusalem tep setan i kigwan na Ispirito Santon a-magen ko, et nat amtak i mepesamak cha si-kak chiwan. 23 Amtak bengat i maykalebosak tan medigathanak tep setan i inpaamta na Ispirito Santod si-kak cha emiin a kimowanan ko. 24 Nem angkena no gwara emoy ngaaw a mepesamak cha si-kak tep angken no metiyak, sema kapategan cha si-kak, onsagwiak na pengingkaan na dongbaan et kekchengen koy obden in-i-kan Afo Jesus cha si-kak a mengowan na mapteng a chamag maypangkep na kaasin Afo Chiyos.
25 “Si-kayon emiin a intoroan ko maypangkep na pantorayan Afo Chiyos, amtak i nat si-si-nengen joak mowan. 26 Isonga, kowan koned si-kayo niman a akow no gwariy tood si-kayon nat iyaysalakan, nat basol ko. 27 Tep kigwan kod si-kayoy emiin a piyan Afo Chiyos a amtaen jo. 28 Bantayi yoy angel jo tan emiin a naematin inpakajo na Ispirito Santod si-kayo. Kajoi yo iren inges toy naiyanbantay na kalniro tep si Afo Chiyos, inpanbalin to ira na tothoo to babaen na chala na Anak ton mismon imayos nonta ingkathiy to. 29 Tep amtak i no onda-jathak chiyay, gwara iriy toon onkowan alin mengitoro na nat podno say mechechal i pamati yo. Sema iren too, inges chiy ason emanekot a naemono na kalniro. 30 Et nat setan bengat, nem gwara ngoy tothood si-kayon mantoro na ite-itek say egwisen cha ira ma naematin on-onod cha si-kara. 31 Isonga, pantanchaan kayo. Enog i diningding i nonta gwiya-gwa-gwa tan diyagwi-dagwi na tedon tawen, intolo-toloy kon iyanbili-bilin cha si-kayo, tan chakel i saya-sayak kagol na pengisahit kod si-kayo.
32 “Et niman, ipiyal tahejod Afo Chiyos tan kaasi thon inkari thod si-kayo. Tep kabaalan Afo Chiyos a mengikedsang na pamati yo babaen na esel to, tan i-kan tod si-kayo iriy bindisjon a itawid tod emiin a inpanbalin ton tothoo to. 33 Si-kak ngo, nagwariy toon kiyamkam koy kabaknang to, nat pilak to ono balitok to ono baro tho. 34 Tep amta yo ngo i inbediyan koy mesepol ko tan mesepol na echom ko. 35 Inbiybiy kod si-kayo babaen na emiin a ima-imag ko i mesepol a man-obda kiya say gwariy itolong tayo para cha gwariy kolang to. Tep nemnemnemen tayo koma i kigwan Jesus i ‘Mas kaimdeng i mengi-kan iy say sema may-i-kanan.’ ”