Iyay-i-kanan Ira Ma Ematid Ephesus Na Ispirito Santo
19
Idi man-iiyan si Apollos cha siyodad na Corinth, chidan Paul i chonchontog ingkathod siyodad na Ephesus. Idi mimothok chiwan, enagwi na echom a ematid Jesus 2 et inbagaan to ira i “Iyay-i-kanan kayo na Ispirito Santo nonta emati kayo?” Insongbat cha i “Enchi, nat inki-ngelan mi pay i gwariy Ispirito Santo.” 3 Et kigwan Paul i “Nengoy ekilasin bonjag jo?” Insongbat cha i “Sema bonjag John a Naemonjag.” 4 Et kigwan Paul mowan i “Sema intoron John, sema bonjag i pesing a mengibiybiy a iyanbabawiy too tan binekan chiy basol cha. Kigwan ngon John cha tothoo i memati koma ired toon mantetened cha si-kathon si Jesus.” 5 Idi inki-ngelan na tothoo man, iyanpabonjag mowan ira say maypaamta i emati wa ired Afo Jesus. 6 Et insagpat Paul i diwa thod si-kara et iyay-i-kanan ira na Ispirito Santo. Et imesel ira na ekila-kilasin esel a nat amta ra, et inpaamta red echom i inpaamten Afo Chiyos cha si-kara. 7 Et emiin a dalekin biyonjagan Paul, sema bilang cha, chanchanin sawal na chegwa.8 Kimowan si Paul cha synagog et etoled a naiyan-esel a naekitebal ired ma too maypangkep na pantorayan Afo Chiyos a inparas ton mengegwis cha si-kara say memati ira. Imag to man na tedon bolan. 9 Nem sema echom cha si-karen iyanki-ngel, esolpeng ira et nat piyan chen memati. Et ngaaw i nakigwan cha maypangkep na toro-toron Jesus cha sangoanan iren ma emati. Isonga, bintihan iren Paul et iyodop to ira ma emati wed Jesus. Et kimowan si Paul cha pantoroan Tyrannus, et chiwan i naiyantoroan to na gwiya-gwa-gwa. 10 Intoloy Paul a iyantoro na chegwen tawen. Isonga, emiin a naiyan-iyan cha probinsiya na Asia, pati Hodjos tan Gentiles, inki-ngelan chiy esel Afo Chiyos maypangkep Jesus.
Sema Epasamak Ired Ma Pithon Anak Sceva
11 Epaladon kaskasdaaw i milagron inpa-mag Afo Chiyos cha Paul. 12 Angken panjo tan towaljen iyosal Paul, no a-daen cha para cha mansekit, namimapteng ira, tan no a-daen cha para cha iya-janan na dimonyos, nabimetik i dimonyos. 13 Et gwara ngoy Hodjos a iyan-aha-ahad a naenagchag na dimonyos. Inparas chen engosal na ngaran Afo Jesus say menagchag na dimonyos a kigwan cha i “Si-kam a dimonyo, babaen na karebengan Jesus a nainkasaben Paul, konen taha i ‘Awas ka wa.’ ” 14 Iyaytompong a gwariy pithon san-aahin dalekin naenagchag na dimonyos a inges to man. Si Sceva i awecha. Hodjon sa-kin afo na papari. 15 Nem insongbat niwa dimonyod si-kara i “Amtak si Jesus tan amtak si Paul, nem siya kayo?” 16 Et sema dahin iya-janan niwa dimonyo, iyosil to ira, biyoksing to ira, et igwak to iren emiin. Et sema iren daleki, bintihan chiy baliy a edagosan tan esogathan. 17 Emiin a naiyan-iyan cha Ephesus, pati Hodjos tan Gentiles, idi inki-ngelan chiy epasamak ired ma pithon daleki, timahot iren emiin a chili et nachijaw ches Afo Jesus. 18 Chakel i ematin engipodnod echom cha na ngaaw a ima-imag cha. 19 Chakel iren ma emati wen naengamag na magic, sini-si-nop chiy dibcho ra maypangkep na mengemag na magic, et piyoolan ched sangoanan na emiin a too. Kiyowinta riy bayad iren ma dibchon say banol to, sampolon dimen dibon papalata. 20 Isonga, sema esel Afo Chiyos maypangkep Jesus, iyaychama-chamag, tan sema ngo iren emati, iya-a-choman ira.
Iyanngalawngaw I Tothood Ephesus
21 Idi iyakcheng ira man, niyemnem Paul a onkowan cha Jerusalem a chedanen toy probinsiya na Macedonia tan Achaia. Et kigwan to i “No onkowanak med Jerusalem, mesepol a onkowanak ngod Roma.” 22 Isonga, kigwan Paul ired ma chegwen naenolong cha si-kathon si Timothy tan si Erastus i medebas ired Macedonia tan Achaia iy maramen man-iyan pay chiwed Asia.
23 Idi gwara pay si Paul cha Ephesus, sema tothood man, iyanngalawngaw ira tep emati wiy tothood Jesus. 24 Tep gwariy sa-kin toon iyanngaran na Demetrius a para selbit na silbir. Naengamag na otikel a baliy a singen timplon naiyanchayawan chen Artemis a chiyos chen bii. Si Demetrius tan sema echom a naekiobda, banay i naiyafit cha kagol na obda ra. 25 Isonga, sini-nop Demetrius i echom ton naekiobda tan sema iren echom a para selbit, et kigwan tod si-kara i “Si-kayon echom ko, amta yo i sema kinabaknang tayo, naedafod obda thayo. 26 Sini-neng jos Paul tan inki-ngelan joy towan koned tothoo. Nakigwan to i sema iren chiyos a naimag na too, nat podnon chiyos. Chakel i tood ja Ephesus a emati na kigwan to, tan nat chiyed Ephesus bengat, nem cha gwa-gwa-chen dogad cha Asia. 27 Ngaaw emoy panpa-noan to tep sema obda thayo, konen na tothoo i nagwariy silbi tho. Tan nat setan bengat, nem sema timplon Artemis a kahejangan a chiyos, nat maypateg ma. Tan angken si Artemis ngon nachijaw na emiin a tood Asia tan angken dobong, mechechal i chayaw to.”
28 Idi inki-ngelan na tothooy kigwan Demetrius, bimonget iren pasiya, et kimelkeljaw iren kigwan cha i “Epateg si Artemis a chiyos tayon i-Ephesus!” 29 Et emiin a tood siyodad, iyanngalawngaw iren chakos. Ida res Gaius tan si Aristarchus a echom Paul a edafod Macedonia, et inkoyod cha iren manbebetik ired esa-nofan cha. 30 Si Paul ngo, piyan ton onkowan chiwan say mekitebal ired ma chakel a too, nem nat intolok iren ma emati. 31 Tan angken sema iren ofisiyalis na probinsiyen kajem Paul, engito-no na mengowan cha Paul i nat manparang komed ma esa-nofan.
32 Sema iren tothood ma esa-nofan, afil i inkelkeljaw na sa-ki tan sa-ki. Tep iyanngangalawngaw ira et sema gwa-gwa-ched si-kara, nat amta riy kagol na esa-nofan cha. 33 Sema ngo iren Hodjos a gwared ma esa-nofan, inpaakgwat chiy echom chen si Alexander cha sangoanan na chakel a too say ipaamta thod si-kara i nat Hodjos i kagol na ngalawngaw. Iyanchingjas si Alexander ired ma tothoo say on-eket ira et say iki-ngelan chiy konen to. 34 Nem idi iyamtaan na tothoo i Hodjos si Alexander, ema-men kimeljaw iren iyansa-ki a kigwan cha i “Epateg si Artemis a chiyos tayon i-Ephesus!” Inkelkeljaw cha man na chanchanin chegwen oras.
35 Et iyanparang i mayor na siyodad et inpa-ket toy tothoo. Kigwan to i “Si-kayon i-Ephesus, emiin a toon gwared dobong, amta ra i si-kathayon i-Ephesus i naengajo na timplon Artemis a kahejangan tan sema bathon singen si Artemis a iya-kas alid dangit. 36 Nagwariy toon mebedin a konen to i itek iwan. Isonga, on-eket kiya cha say nagwariy panbabawian tayo. 37 Tep sema iren dalekin intolod jod jay, nagwared timplo thayoy kinibot cha, tan nagwariy ngaaw a kigwan cha maypangkep na chiyos tayo. 38 Isonga, si Demetrius tan sema iren echom a para selbit, no piyan chen mancharom, gwariy akow a pengowis tan gwariy kowis cha opisina ra. Mancharom koma ired korti. 39 No gwara ngo pay i piyan jon itongtong, seskeren jo komay koston esa-nofan na tothoo say tabtabalen jod man. 40 Kagol na epasamak niman, icharom cha kiya emon konen cha i iyanngalawngaw kiya tep nagwariy koston kagol na imag tayo.” 41 Et idi iyakcheng a kigwan na mayor iwan, inpabtik to ira ma tothoo.