Sema Epasamak Cha Paul Nonta Gwared Corinth
18
Idi iyakcheng i obden Paul cha siyodad na Athens, bintihan to et kimowan cha siyodad na Corinth. 2 Nonta gwares Paul cha Corinth, engaspol na Hodjon iyanngaran na Aquila a iyay-anak cha probinsiya na Pontus. Ahay mothok Aquila did Italy, pati imbaliy ton si Priscilla tep kigwan Claudius a i mesepol a bebtihan na emiin a Hodjos i Roma. Et kimowan si Paul a bisitaen tos Aquila tan imbaliy to. 3 Ekiiyan si Paul cha si-kara et ekiobda tep sema panbiyagan chen mengemag na tent, man-inges. 4 No akow na Sabbath, nakimowan si Paul a mekitebal cha synagog say egwisen toy Hodjos tan Gentiles a mematid Jesus.5 Idi mimothok si Silas tan si Timothy alid probinsiya na Macedonia, natiyofog Paul a naiyankasaba tan naengipaneknek ired Hodjos i si Jesus i Cristo. 6 Nem idi kiyontra iren ma Hodjos si Paul et kiyel-ithan cha, jiyagjag Paul i baro thon sinjal a nat mekikadgwa wed si-kara. Et kigwan to i “No chosaen to kayon Afo Chiyos, basol jo. Nat basol ko. Manipod niman toroan ko iriy Gentiles.”
7 Et bintihan Paul i synagog et kimowan a man-iyan cha baliy Titius Justus a Gentile a naiyanchayaw cha Afo Chiyos. Iyay-askang iwa baliy tod synagog. 8 Si Crispus a afo na synagog, ematid Jesus, pati emiin ngon naiyan-iyan cha baliy to. Sema ira ngon chakel a toon gwared Corinth a iyanki-ngel na kigwan Paul, emati ngo ira et iyanbonjag ira.
9 Et idi sa-kin dagwi, imesel si Afo Chiyos cha Paul babaen na singen kokip a kigwan to i “Enog i tahot, no diket itoloy mon mankasaba. Enog i salcheng. 10 Tep kadgwaan taha tan nagwariy toon menogat cha si-kam tep chakel i tothook chiya siyodad.” 11 Isonga, imeket si Paul cha Corinth ingkathod sa-kin tawen tan kagachowen intoro thoy esel Afo Chiyos cha tothood man.
12 Idi iyaysa-dat si Gallio a gobirnador na probinsiya na Achaia, sema iren Hodjos a nat ematid Jesus, iyansa-ki iren mengeden Paul, et iyodop ched pankowisan say icharom ched sangoanan na gobirnador. 13 Kigwan cha i “Seja too, towan awisa iriy toon manchejaw cha Afo Chiyos, nem sema nainpasing chen manchejaw, iyaykontred dinteg mi.” 14 Chanchanin on-esel si Paul, nem edagwas a imesel si Gallio a kigwan to i “No iyanbasol itha too ono engamag na ngaaw, anosan kon mengi-ngel na jowan konen Hodjos. 15 Nem sema engicharoman jod si-katho, maypangkep bengat na ese-esel tan ngaran na tothoo tan dinteg jo, isonga si-kayoy mahaamten mekitebal. Nat piyan ko.” 16 Et inpabtik iren Gallio chiwa pankowisan. 17 Idi imawas ira, sema emiin a too, ida res Sosthenes a afo na synagog, et bicha-bichas ched sangoanan na pankowisan, nem si Gallio, nat inpan-an-ano tho.
Imoli Des Paul Cha Antioch A Gwared Syria
18 Ekiiyan si Paul ired ma ematid Corinth na chakel a akow, et inpayas to ira ma ematid man et iyandogan cha bapor cha probinsiya na Syria a iyodop tos Priscilla tan si Aquila. Nem idi aneng nin iren onda-jat cha Corinth, kimowan nin si Paul cha siyodad na Cenchreae. Chiwan i iyanpapohisan to say ibiybiy to i tiyongpal toy inkari thod Afo Chiyos, et intoloy Paul tan echom tod Syria. 19 Idi mimothok ires Paul cha siyodad na Ephesus, iyan-iyan si Aquila tan si Priscilla chiwan, nem si Paul ngo, sima-mad bengat. Nonta gwares Paul cha Ephesus, kimowan cha synagog et ekitebal ired ma Hodjos chiwan. 20 Inpeked iren ma Hodjos si Paul say man-iyan pay chiwan, nem nat timolok si Paul. 21 Nem idi chanchanin onda-jat si Paul, kigwan to i “No piyan Afo Chiyos, on-oliak alid jay.” Et bintihan toy Ephesus a iyandogan cha bapor.
22 Idi mimothok si Paul cha siyodad na Caesarea, kimowan cha Jerusalem say bisitaen to ira ma ematid man. Et chimalong cha siyodad na Antioch cha probinsiya na Syria. 23 Imeket si Paul cha Antioch na piyen akow, et bimetik a kimowan cha doga-dogad cha Galatia tan Phrygia a inkedsang toy pamati na emiin a ematid man.
Iyantoros Apollos Cha Ephesus Tan Corinth
24 Gwariy sa-kin Hodjon iyay-anak cha siyodad na Alexandria a mimothok cha Ephesus. Iyanngaran na Apollos. Edaing a man-a-sel, tan chakel i amta thon maypangkep na esel Afo Chiyos. 25 Masdon mantoros Apollos maypangkep Jesus, tan podnoy intoro tho tep kostoy intoro red si-katho. Nem sema amta tho, sema intoro-toron John a Naemonjag bengat tan sema inpasing ton emonjag. 26 Inchogin Apollos a etoled a man-esel cha synagog. Idi inki-ngelan Priscilla tan si Aquila, iyodop ched baliy cha, et in-iksplikar ched si-kathoy aneng to pay amtaan maypangkep Jesus tan sema pesing Afo Chiyos a mengisalakan na too. 27 Idi piyan Apollos a onkowan cha Achaia, sema iren ematid Ephesus, tiyolongan cha et iyansolat ired ematid Achaia a inbaga ra i sintilen cha. Idi mimothok si Apollos cha Achaia, banay i tolong to ired ma tothood man a emati wa ira kagol na kaasin Afo Chiyos cha si-kara. 28 Tep edaing a mekidiskotil si Apollos ired ma Hodjos cha sangoanan na chakel a too, et igwak to ira. Tep piyaneknekan to i si Jesus i Cristo babaen na iyaysolat cha esel Afo Chiyos.