5 Nem sema ngo iren Hodjos a nat emati, kaapal ira, isonga ena-nop ira na mahedsel a tothoon nagwariy kenkenchat cha say manngalawngaw ired siyodad. Et dinikmot chiy baliy Jason tep chiyan anafes Paul tan si Silas say iawas ched tothoo. 6 Nem idi eg cha ira sipol chiwan, pinidit ches Jason tan echom a ematin ekiolop cha si-kared kad-an na naiyantotoray na siyodad, et kimeljaw iren kigwan cha i “Seja iren daleki, naiyanngalawngaw cha kimowa-kowanan cha. Et niman kimowan ngo ali ched jay. 7 Et si Jason ngo, towan sintila ired baliy to. Sema emiin a tothoo, chichal chiy dinteg Caesar tep nakigwan cha i gwariy afil a arin iyanngaran na Jesus.” 8 Sema tothoo tan naiyantotoray, idi inki-ngelan cha man, iyanngalawngaw ira. 9 Et miyolta res Jason tan echom ton emati, et inbolos cha ira.

10 Apaman a edagwi, into-no iren ma ematis Paul tan si Silas cha siyodad na Berea. Idi mimothok chiwan, kimowan ired synagog na Hodjos. 11 Sema iren Hodjos a igwed ma Berea, mas edohatan i nemnem cha iy say sema iren igwed Thessalonica tep masi-met iren mengi-ngel niwa toro maypangkep Jesus, et naiyachal chiy esel Afo Chiyos na gwiya-gwa-gwa say amtaan cha no podnoy naintoron Paul. 12 Isonga, chakel i Hodjos a emati, pati Gentiles a biin iyangkekayang i kasasaad to tan dalekin Gentiles. 13 Nem sema iren Hodjos chiwa Thessalonica, idi inki-ngelan cha i naintoron Paul i esel Afo Chiyos cha Berea, kimowan ngo ired man, et igwis iren ma i-Thessalonica iriy tood Berea a manngalawngaw say kontraen na tothood Berea ires Paul. 14 Isonga, into-no iren ma ematis Paul cha kilig na baybay, nem si Silas ngo tan si Timothy, epayas ired Berea. 15 Sema iren engolop cha Paul, ekikowan ngo ira ingkathod Athens, et imoli ira did Berea a gwariy bilin Paul cha si-karen kigwan to i si Silas tan si Timothy, tetneren cha komed Athens nem engkay.

16 Idi niyansekeren Paul si Silas tan si Timothy cha Athens, ensahit i nemnem to nonta mita tho i chakel i sinan chiyos chiwa siyodad. 17 Isonga, nakimowan cha synagog a mekitebal ired Hodjos tan Gentiles a naiyanchayaw cha Afo Chiyos. Nakimowan ngod plasa na gwiya-gwa-gwa say mekitebal ired ma tothood man. 18 Naekitebal ngod mamaistoron sema iren echom a naengonod na toro-toron Epicurus et sema ngo iren echom a naengonod na toro-toro na tothoon iyanngaran na Stoics. Sema echom a mamaistoro, kigwan cha i “Nengoy niyankonen ja too? Nagwaren polos banag to.” Sema echom ngo, kigwan cha i “Singen towan iistoriyay maypangkep ira na chiyos a nachijaw ched echom a ili-ili.” Kigwan cha man tep niyan-ikasaben Paul i maypangkep Jesus tan panpawil na iyangketiy. 19 Et sema imag iren ma tothoo, iyodop ches Paul cha esa-nofan na kahejangan a kokowis a engaranan na Areopagus, et kigwan ched Paul i “Piyan min amtaan i maypangkep nitha badon toron mowan kona. 20 Tep sema iren echom a nakigwan mo, afil cha inki-ngelan mi nontan. Isonga, piyan min amtaan no ngoy banag to.” 21 Kigwan cha man tep emiin a i-Athens tan sema iren edafod echom a doga-dogad a man-iyan chiwan, naiyanki-ngel ira na olay na badon toro-toro tan nainpakitebal cha.

22 Et imakgwat si Paul cha sangoanan iren ma esa-sa-nop chiwa Areopagus a kigwan to i “Si-kayon i-Athens, amtak i agpayson nachijaw jo iriy chiyos jo. 23 Tep idi man-aaharak chiyed siyodad jo, sini-neng ko iriy dogad a naiyanchayawan jo na ekila-kilasin chiyos. Gwara ngoy sa-kin altar a sibik a iyaysolathan na ese-esel a kigwan to i ‘Sejay i altar na chiyos a nat amta wi.’ Sema chiyos a nachijaw jon nat amta yo, si-kathoy kowan ipaamted si-kayo. 24 Si-kathoy Chiyos a emarsowa na dobong tan emiin a gwared jay, tan si-kathoy Afo na dangit tan dobong. Isonga, nat naiyan-iyan si Chiyos ired timplon imag na too. 25 Et nagwara ngoy mebedin a a-magen na tothoo para cha si-katho tep nagwariy kolang to. Tep si-katho ngoy naengi-kan cha emiin a tothoo na biyag cha tan jasjas cha tan emiin a mesepol cha. 26 Si Afo Chiyos i emarsowa na pilmiron toon edafoan na ekila-kilasin tood ja dobong. Nonta bayag da, niyemnem to ngoy timpo na pantoray na gropon too tan bordak na pan-iyanan cha. 27 Imag Afo Chiyos iwan say anafen iren ma toos si-katho et say sepolen cha emos si-katho. Nem sema podno, nat iyay-aragwis Afo Chiyos cha si-kathayo. 28 Tep gwariy engowan i ‘Si-kathoy kagol a gwariy biyag tayo tan mankiykiykiy kiya tan sibibiyag kiya.’ Tep angken sema echom jo ngon naengisolat, kigwan cha i ‘Agpayson anak to kiya.’ 29 Isonga, no anak to kiyen Afo Chiyos, nat mekegwan koma i si Afo Chiyos, inges to iriy bolto na sinan chiyos a aamag na balitok, silbir, tan batho. Tep sema iren bolto, naedafo bengat i itsora red nemnem na tothoon naengamag babaen na daing cha. 30 Nontan den nat amta iren ma toos Afo Chiyos, imeke-eket bengat si Afo Chiyos maypangkep na ngaaw a ima-imag cha. Nem niman, kigwan tod emiin a toon gwared ja dobong i mesepol a manbabawi ira et bebnekan chiy ngaaw a naima-imag cha. 31 Tep pinispis Afo Chiyos i akow a pengowis to di na emiin a too. Pinispis to ngoy dahin mengowis, tan sema pesing niwa dahin mengowis, kosto-kosto. Et piyaneknekan Afo Chiyos cha emiin a too i seman a dahi, si-kathoy pinispis to, tan sema inpasing ton engipaneknek, inpanpawil to ma dahi.”

32 Idi inki-ngelan na tothooy kigwan Paul maypangkep na panpawil na iyangketiy, sema echom, iyangja ra, nem sema echom ngo, kigwan cha i “Piyan mi pay a iki-ngelan i maypangkep iren tan a mowan kona no sa-ki din akow.” 33 Et bintihan Paul iwa esa-nofan. 34 Nem gwariy echom a dalekin ekika-chom cha si-katho, et emati ired Jesus. Sa-kid si-kara, si Dionysius a kowis cha Areopagus. Sema sa-ki ngo, biin iyanngaran na Damaris. Gwara ngo pay iriy echom a emati.