Ekiolop Si Timothy Ired Paul Tan Si Silas
16
Et kimowan ires Paul tan si Silas cha siyodad na Derbe, et intoloy chen kimowan cha siyodad na Lystra. Gwared Lystra i sa-kin ematin iyanngaran na Timothy. Hodjoy ineton ematid Jesus, nem Greek i aweto. 2 Sema iren ematid Lystra tan Iconium, inki-tek ches Timothy. a 3 Piyan Paul a odofen si Timothy. Nem sema iren Hodjos a gwared ma kona-konan cha, amta ra i nat ekogit si Timothy tep Greek i aweto. Isonga, kiyogit Paul say nat mesnit ira ma Hodjos. 4 Et iyanbiyahi ires Paul tan si Timothy cha chakel a doga-dogad, et inpaamta ra ired ematid man i niyemnem iren ma apostolis tan naengibalbalnay cha Jerusalem maypangkep na bili-bilin a onoran cha koma. 5 Isonga, kimedsang i pamati iren ma emati iy maramen iya-a-choman ira na gwiya-gwa-gwa.Sema Inpasing Afo Chiyos A Engipaamted Paul A Onkowan Komed Macedonia
6 Et piyan iren Paul a onkowan cha probinsiya na Asia a mankasaba na esel Afo Chiyos, nem nat timoloy ira tep inparit na Ispirito Santo. Isonga, chidan chiy sahop na Phrygia tan Galatia. 7 Idi mimothok ired kilig na probinsiya na Mysia, piyan chen onkowan cha probinsiya na Bithynia, nem nat intolok mowan na Ispiriton Jesus. b 8 Isonga, chidan chiy Mysia, et chimalong ired siyodad na Troas. 9 Et idi sa-kin dagwi, gwariy inbiybiy Afo Chiyos cha Paul babaen na singen kokip, et eni-neng na dahin i-Macedonia a man-ak-akgwat chiwan, et ekikaasid Paul a kigwan to i “Pangaasim, gomali did ja Macedonia say tolongan mo kawi.” 10 Nonta sini-neng men Paul iwa singen kokip, iyansagana kawin chakos a onda-jat cha Macedonia tep sigorado kawin piyan Afo Chiyos i onkowan kawin mankasaba na mapteng a chamag cha tothood man.
Sema Inpamatin Lydia Cha Jesus
11 Et dima-jat kawid Troas, et iyandogan kawid bapor a diritson kimowan cha probinsiya na Samothrace. Idi gwa-gwa tho, timoloy kawid siyodad na Neapolis. 12 Idi mimothok kawid man, imepas kawi et kimowan kawid Philippi a kabanayan a siyodad cha sahop na Macedonia. Sema gwa-gwa-chen tothood ma siyodad, Romano ira. Et chiwan i imeketan mi na piyen akow.
13 Nonta timpo na Sabbath a akow na pan-inana iren ma Hodjos, imawas kawid ma siyodad, et kimowan kawid kilig na kolos tep niyemnem mi i gwara emoy pankararagan na Hodjos chiwan. Timokkong kawid man, et ekitebal kawid bibiin esa-sa-nop chiwan. 14 Sema sa-kid si-karen manki-ki-ngel, biin i-Thyatira a iyanngaran na Lydia a naiyandaho na epalit a dofot a violet. Gentile a naiyanchayaw cha Afo Chiyos. Diyohatan Afo Chiyos i nemnem to say egwathan toy kigwan Paul et say patien to. 15 Et si Lydia tan emiin a naiyan-iyan cha baliy to, iyanpabonjag ira. Idi iyakcheng iwan, ekiadok si Lydia cha si-kawi i “No agpayson inbilang joak a naematid Jesus, pangaasim, gwali jon man-iyan cha baliy ko.” Inpili-pilit to et ekikowan kawi.
Iyaykalebos Ires Paul Cha Philippi
16 Idi sa-kin akow a mankokowan kawid ma kad-an na pankararagan, engaspol kawi na marikit a bagaen. Iya-janan na dimonyon naengipadto na mepesamak no sa-ki din akow. Kagol na daing niwa marikit, chakel i naiyanpilahan iren ma afo tho. 17 Sema marikit, natine-tined to kawin Paul, et nakimelkeljaw a kigwan to i “Seja iren daleki, bagaen iren Afo Chiyos a Kahejangan! Chiyan kona i pesing jon maysalakan.” 18 Chakel i akow a ima-imag to man ingkathod imaptos Paul. Et singo tho ma marikit, et kigwan tod dimonyon iyay-ejan cha si-katho i “Konen kod si-kam babaen na panakabalin Jesu Cristo i ‘Awas ka wed tan.’ ” Et apaman a kigwan Paul iwan, imawas miy dimonyod ma marikit.
19 Idi iyamtaan na aafo na marikit i nagwara wiy panpilahan cha, ida ra ires Paul tan si Silas, et inkoyod cha ired plasen esa-nofan na naiyantotoray na siyodad. 20 Et inpaakgwat cha ired sangoanan na kokowis, et kigwan cha i “Seja iren tothoo, Hodjos ira, et naiyanngalawngaw ired ja siyodad tayo. 21 Tep naiyantoro-toro ira na ogadin naiyaykontred dindinteg tayo, et si-kathayon Romano, nat mebedin a onoran tayo.” 22 Et emiin a toon esa-sa-nop chiwan, ekikeljaw iren engicharom Paul tan si Silas. Et inpa-kal na kokowis i baro ra et inpabara-baras cha ira. 23 Idi inda-karan cha iren bicha-bichas, inkalebos cha ira, et binidin chiy kowadja i isingpet to iren bantayan. 24 Idi inki-ngelan ma na kowadja i inbilin na kokowis, intolod tos Paul tan si Silas cha kawa na kalebosan a in-ejan toy seki red kawa na chegwen kejow, et intolbek to ma kejow.
25 Idi chanchaniy kawa na dagwi, mankakararag si Paul tan si Silas, et mankankansiyon iren manchachayaw cha Afo Chiyos. Et sema echom a balod, manki-ki-ngel ira. 26 Et biglen gwariy mapkes a jegjeg, et sema kalebosan, kimi-gwed a chili. Iyandohat a chakos i emiin a bengbeng to, et iya-kal i emiin a kadina ira na balod. 27 Idi bimangon i kowadja, mita tho i edohatan ira ma bengbeng. Isonga, iyoksot toy ispada tho say bonoen toy angel to tep kin to i bimolos ira ma balod. 28 Nem kimeljaw si Paul a kigwan to i “Enog i biyonoy angel mo tep aja kawin emiin.” 29 Kigwan na kowadja ired ma echom to i a-daen cha diy silow. Et imagag a onsekep cha kad-an Paul tan si Silas, et iyantalimohod a kabayedbed cha sangoanan cha. 30 Et in-awas ira na kowadjen kigwan to i “Afo, nengoy mesepol a pesing ko say maysalakanak?” 31 Si Paul ira, insongbat cha i “Pemati ked Afo Jesus, et maysalakan ka, pati emiin a naiyan-iyan cha baliy mo.” 32 Et inkasaba riy esel Afo Chiyos chiwa kowadja tan emiin a naiyan-iyan cha baliy to. 33 Et angken kawa na dagwi pay, intolod ira na kowadjed kad-an na chanom, et kiyaskas toy sogat cha. Apaman a iyakcheng iwan, ebonjagan iwa kowadja, pati sema iren naiyan-iyan cha baliy to. 34 Et ininbitar na kowadjes Paul tan si Silas cha baliy to, et pikan to ira. Sema kowadja tan emiin a toon naiyan-iyan chiwa baliy to, kaimdeng iren pasiya tep emati wa ired Afo Chiyos.
35 Idi dadabi, into-no na kokowis i polis a konen cha iwa kowadja i “Ibolos mo ma daleki.” 36 Isonga, kigwan na kowadjed Paul i “Inpaw-it na kokowis i bilin i maybolos kayon Silas. Isonga, tahejo et betik kayo. Et sapay koma gwariy talned si-kayo.” 37 Nem kigwan Paul ired ma polis i “Bichas cha kawid sangoanan na tothoo angken eg cha kawi binistigal, et inkalebos cha kawi. Imag cha ira man cha si-kawi angken too kawi ngo na Roma. Et niman piyan chen onbetik kawi a nagwariy mengamta. Nat mebedin met! Kowan jod ma kokowis i onkowan koma ira did jay say si-kariy mengibolos kawi.”
38 Et kimowan i polis cha kad-an na kokowis, et ingwanggwang chiy kigwan Paul. Timahot a pasiya ira ma kokowis nonta inki-ngelan cha i si Paul tan si Silas, too ira na Roma. 39 Isonga, kimowan ired kalebosan say mekikaasi ired Paul tan si Silas. Et in-awas cha ira, et inbagaan ren onbetik cha siyodad cha. 40 Et si Paul tan si Silas, bintihan chiy kalebosan, et kimowan ired baliy iren Lydia. Ekitebal ired ma iyangkematin esa-nop chiwan say onkedsang i nemnem cha et bintihan cha wiy siyodad.